فِـي أَحْــــضَانْ الـْــــمَوْتْ

★ الحلقة 49 ★

حلقة 49
تعدا اسبوع...بعد اكا نهار...تحسنت فيه برشا..جيست مازلت نحس بوجيعة صغيرة في جنبي...اما نتحملها و نعديها...حليت عينيا نشوف مع البيت...تلفت شوية...نشوف معاه...مزال راقد...هزيت يدي حطيتها على وجهو...كل ليلة نحكم عليه ببلاصة...مرة بيتو...مرة بيتي...مرة في الصالة...نمرجو لين يفد و يرضى...اصلا منعرفش كيف مزال متحملني لتوا...اما كل لي نعرفو...انو بعد كلشي صار و كلشي تعدا عليا...كان احسن اسبوع عديتو مع زياد...اول مرة نحس بلهوة حد بيا من غير امي و عماد...تبسمت...و قربت منو بستو تحت عينو كي العادة...جبدت روحي منو شوية شوية...و نزلت من سرير...حليت القارد روب...جبدت مريول gris من عندو...و دخلت لبيت البانو...ريقلت اموري...بدلت دبشي...لميت شعري كعكة و خرجت...لقيتو مزال راقد...محبيتش نفيقو...نزلت للكوجينة...دار دافية عكس الجو برا اللي بدا يبرد...اصلا دار هاذي مختلفة برشا...رغم انها منعزلة جملة...اما تحس فيها حياة...و لا انا اللي نحس هكا...حضرت الفطور...و عملت قهوة...اليمات الكل لي تعداو مخلانيش نمس حاجة...انا اكاكا...و نحس بيديه دارت على كرشي...تبسمت نحكي
انا:بونجوور
كبس عليا...و نزل باسني من خدي...بوسة مرصوصة يحكي
زياد:شبيني محسيتش بيك كي قمت
انا:مممم محبيتش نفيقك...جيست بستك
زياد:ممم حسيت بيها هذيكا
تلفت عندو نضحك...حطيت يديا زوز على صدرو نحكي
انا:نعرف عزيزي
زياد:نحب وحدة توا
انا:منلحقش
دور يدو على ظهري...كبس عليا...وطلعني عندو...معادش نحس بالارض تحتي...هزيت يدي حطيتها على خدو...و نزلت بستو تحت عينو...نحكي
انا:هيا توا خلينا نفطرو
زياد:كهو
فهمتو شيقصد...قربت منو اكثر...حطيت شفافي على شفافو نحكي
انا:ممم كهو...خاطر لتوا ما جبتليش فراز
زياد:مزلنا في نفس الحكاية...لتوا ما نسيتش
انا:مش باش ننسى لا جبتلي...لا خليتني نمشي نشريه
زياد:جاب ربي مجيتش تتوحم
انا:هههههه حتى انا مش باش نجيب صغار جملة
زياد:علاش
انا:اكاكا...خلينا نفطرو توا
رخف يدو على ظهري...جبدت روحي منو...هزيت القهوة حطيتها عالطاولة...نتنفس بالسيف...منحبش نفكر في الموضوع هذا جملة...لا هو يحب عالصغار...و لا انا نجم نعيش حياة كيما ناس الكل...صحيح هو معيا توا...اما يمكن معادش باش نلقاه...قص عليا تفكيري...كيف جبدني من يدي...دورني عندو يحكي
زياد:سوار
انا:شنوة
زياد:صدقني وقت يوفا كلشي...باش نمشو من تونس جملة...لاي بلاصة تحب علاها...انا و انت برك
انا:متنجمش تخلي حياتك هوني على خاطري
زياد:انت حياتي...انت برك اثق فيا...و نوعدك باش نخرجو منها زوز المرة هاذي
قربت منو حضنتو...دورت يديا زوز على ظهرو نحكي
انا:خليك معايا ديما...مهما صار ابقى تحبني...حتى و انت مقلتهاش للكلمة...اما يكفي اني نحس بيها...اوعدني زياد باش تحميني ديما
زياد:وعد
خذيت نفس...و جبدت روحي منو...تبسمتلو...نحكي
انا:الماكلة باش تبرد هيا نفطرو
زياد:شيعمل مريولي عندك
انا:مش انت جبرتني نرقد لبارح في بيتك...ملا مكلفتش روحي و لبست من عندك
زياد:مممم حتى هو طلع عليك
انا:نجم ناخو جملة
زياد:ممم نحب مقابل
انا:زايد منحرف...باش ناخو و من غير مقابل زادة
زياد:هههههه باهي خلينا نفطرو ساعة باش نمشي في قضية و نرجع
انا:وين ماشي
زياد:سوااار شقلنا عالاسئلة هاذي
انا:زيااد امان كان ناوي تعدي الليلة برا خبرني توا...منجمش نبقى هوني وحدي
زياد:يا بنتي وين عندي نبات...و زادة رجال هوني محاوطين البلاصة ما تخاف من حتى شي...نكمل شغلي و نرجعلك
انا:باهي
كليت اكا الفطور بالسيف...اول شي جا لمخي...انو باش يمشي عند زينة...اول ما وقف...وقفت في جرتو...قرب مني باسني من راسي يحكي
زياد:رد بالك على روحك
انا:مطولش برشا
زياد:طمن
عدا يدو على خدي...تبسملي...و خرج من الدار...بقيت نشوف معاه من شباك...هز كرهبتو و مشا...خذيت نفس...و رجعت للكوجينة...لميت طاولة...و غسلت ماعون...اما عقلي باقي معاه...كنت باش نمشي لصالة اما رجعت خطوة لتالي...حليت باب البيت لي لوطة...بيت سرية متاعنا...عارضوني نفس الصور...نفس الورق...كلشي باقي على حالتو...جيست مغبر...باز من اكا نهار مرجعش لهوني...قربت من تصويرة امير...تبسمت على جنب لتوا منعرفش كيف نجمت نعدي المهمة هذيكا...غزرت لتصويرة ياسر...عديت صوابعي عليها...منعرفش اذا باش نخبر زياد باللي سمعتو و لا لا...اما كيف ادم دخل في نص...باش نسكت الفترة هاذي...ياسر شريك امير...و العملية التالية زوز مرتبطين فيها...قربت خطوة...غزرت لصورة ثالثة...صابر مختار...لتوا متلقيتوش...منعرفش واحد كيفو شيعمل مع المجموعة هاذي...تي ظاهر فيه محترم...عوجت فمي...تو مبعد نعرفو حكايتو...و كملت لين وصلت لاخر صورة...وقفت علاها...بقيت برشا و انا نشوف معاها...ملامحو ياسر هادية...كيف زياد بالظبط...اما زياد احلى منو...تبسمت على تفكيري...هو الوحيد لي ما نعرف عليه حتى شي...و زياد ميحبنيش نقرب منو...زعمة شكونو...خذيت نفس و تلفت لطاولة...نفركس في دوسيات...الكل لي هوني عندهم صلة مع بعضهم...اما اسم اكا الهم مش مذكور بينهم...و لا صفقة و لا في حتى دوسي...كي هكا شيعمل مع ياسر...اللي متأكدة منو انو هو منهم...و برشا قضايا وراه...فما تفسيرين زوز برك...الاول زياد يحب يجبدو من هذا الكل...خاطرو خوه بالطبيعة...و الثاني يمكن يكون شريكو في كلشي قاعد يصير...و هذا اللي منجمش نصدقو...خاطر كان طلع فما احتمال و لو صغير انو زياد شريك ادم في اللي صرالي...باش نقتلو بيدي وقتها...خذيت نفس و خرجت نجري من البيت...دخلت لبيت البانو لي لوطة...تركزت بيديا عالرخامة...نشوف مع روحي...وجهي اصفر...حليت السبالة...غسلت وجهي...و بليت رقبتي...مجرد التفكير برك...دخلني بعضي و خلى قلبي يدق بالقاوي...منجمش نستخايل لزياد باش يعملها فيا...هو يحبني...اكيد يحبني...خذيت نفس...نهدي في روحي...و خرجت...سمعت تليفوني ينوقز...قربت منو لقيتو زياد...هزيت عليه...نسمع فيه يحكي
زياد:سواار لباس
انا:ممم مليحة...وينك انت
زياد:مشغول توا ساعتين اخرى و نجي
انا؛متنساش الفراز
زياد:باهي
علقت عليه...تفرهدت شوية كيف كلمتو...هزيت البيسي...و قهوة...و قعدت عالفوتاي...حطيت اسم ¤¤¤¤ احسن سمعتو لقبو في الحفلة...خرجولي تصاورو...بقيت نشوف فيهم بالوحدة...قلبي يدق بالقاوي و خلاقي دايرة...كان فما شي اسمو كره هو ادم...عرفت لي نجم عليه...وين شركاتو...اللي في تونس و برا تونس...شنية مشاريعو لي عملها الكل...و اهم شي من هكا طلع عندو نادي...و مش اي نادي...تبسمت على جنب...علاش لا...باش تكون البداية من هوني يا ادم...باش يكون السلاح هو البداية بينا...سجلت في نادي من النت...و طلبت موعد بعد اسبوع اكاكا...سكرت البيسي...و تكيت لتالي...منعرفش اذا كانت خطوة باهية او لا...اما لازمني نتقرب منو...لازمني نعفس على جرحي...و ناخو حقي منو...و كيف قرب مني في الحفلة...و عرف اسمي...باز وقت يشوفني باش يقرب مني اكثر...انا باش نكون في طريقو و كهو...اول ما وقفت نوقز تليفوني...في بالي زياد...لقيتو ياسر...تبسمت وحدي...رغم كلشي...اما هو بالذات باهي معايا عاللخر...هزيت عليه نحكي
انا:يااااسر
ياسر:حمد الله كي مزلت مذكرة اسمي
انا:نعرف لانت مغشش مني...اما تعرف ظروفي بالقدا
ياسر:كيفك توا
انا:مليحة ارتحت...عيشك
ياسر:كلمتك من قبل اما تليفونك كان مسكر
انا:كنت تاعبة وقتها على هذاكا...سامحني ملقيتش فرصة اني نشكرك
ياسر:من غير مزية...وينك توا
انا:في المزرعة
ياسر:باش طول غادي
انا:مممم منعرفش...باش نرجع في اقرب فرصة
ياسر:احسن خاطر توحشتك
انا:عيشك ياسر و انت ليك وحشة زادة
ياسر:ممم تو نتأكد مبعد
انا:ههههه باهي
قص عليا زياد من تالي...كي فكلي تليفون من يدي...تلفت ليه مفجوعة...محسيتش بيه جملة...بقا يغزر لتليفون شوية...طلع حاجبو...و علق على ياسر...نزل يدو...و طلع راسو غزرلي...هزني و حطني يحكي
زياد:ملا توحشتو
بقيت نشوف معاه...منجمتش نرجعلو...عدا يدو على وجهو..يهدي في روحو و يحكي
زياد:نسمع فيك
انا:شنوة
زياد:شوف سوار تحل فمك و تفسرلي...احسنلك
انا:نفسرلك شنية ياخي
زياد:¤¤¤¤¤ عليا ياخي...علاش كلمتو
انا:هو كلمني
كبس على تليفون...ورماه على طول يدو...قرب مني شدني من يدي...كبس علاها يحكي و يصيح
زياد:و انت جيست كلمك هزيت عليه...و تزيد ¤¤¤¤ و تكثر معاه في الكلام
انا:سيبني زياد مش كيما فهمت
زياد:سمعتتتك...اما انت متفهمش بالكلام...جيست خرجت من هوني...لقيت سي ¤¤¤¤ متاعك يعبي فراغك
انا:ياخيي فاش تحكي انت...زياد سيبني
زياد:تو رجعت تحل في فمك
انا:وجعتني راك...و زادة فهمت بالعكس...سيبني تو نفهمك
زياد:فرخة قدك...شباش تفهمني
انا:مانيش فرخة...و زادة حكيت معاه عادي
زياد:علاش فما كلام اكبر من اللي قلتو...تي كان تلقى تمشي من توا
انا:زايد معاك الكلام...سيبني...نحب نطلع لبيتي
زياد:مش باش تطلع...لين تحل ¤¤ فمك هذاكا...و تقولي علاش كلمك
انا:جيست يحب يطمن عليا
زياد:صار
انا:ايه...سيبني توا
زياد:اسسسكت
انا:زياااااااد يزي سيبني
زياد:شبي ¤¤¤ تصيح
انا:وجعتني سيبني
دوب رخف يدو شوية...جبدت يدي منو...عفستو و ضربتو على كرشو بكل قوتي...و هربت نجري...نسمع فيه يصيح
زياد:سوااار ايجا لهوني
انا:سيييبني معادش تحكي معايا
زياد:مش باش تتعدالك يا سواار
انا:محسوووب خوفتني
مرجعليش...سمعت صوت خطواتو...عرفتو مخالط عليا...زربت في خطواتي...دخلت لبيتو...اول وحدة جات قدامي...جيت باش نسكر الباب...وقفني...كيف دزو بيدو جابني لتالي...قحرتلو نحكي
انا:فاش تعمل ياخي سيبني
قرب مني...وخرت لتالي...لين ضربت في السرير...و جيت قاعدة لتالي...حاولت نقوم...اما كان اسرع مني..رجعني بيدو و جا فوقي...كبس عليا بيديه يحكي
زياد:حل فمك توا
انا:س سيبني فاش تعمل
زياد:باش تتعاقب
انا:منحبش سيبني
بقى يشوف معايا...حاولت ندزو اما شي منجمتش...نزل عليا اكثر...حط شفافو على شفافي...عضني عضة خفيفة يحكي
زياد:هاذي حق تفوريخك
اول ما جيت نحكي...عضني مرة اخرى...نزلو دموعي بالوقت...جبد روحو يحكي
زياد:و هاذي حق ما كلمتو
هزيت يدي بالسيف...حطيتها على جنبو...كبست عليه نحكي
انا:ي يزي وجعتني
نزل عليا اكثر...لين معادش نجم نتحرك...في بالي باش يرجع يعضني...دورت وجهي شوية عليه...حط شفافو على خدي...نحس في قلبي يخض بالقاوي في صدري...باش يخرج من بقعتو...قرب من وذني يحكي
زياد:مزال موفاش عقابك
سكرت عينيا...منجمتش نقاومو اكثر...نفس متاعو خدرني...ريحة برفانتو دخلت خشمي...دورت وجهي شوية عندو...نزل على شفافي...اما المرة هاذي باسني...كبست عليه اكثر...نزل من شفافي لرقبتي...منجمتش نحكي اكثر...بقيت نطاوع فيه...قرب لوذني يحكي
زياد:مزال نسمع منك كلام اكاكا معاه نقتلك و نقتلو...حط في بالك اي حد يقرب على شي متاعي و ملكي باش نقتلو
جيت باش نحكي...رجع سكتني كيف باسني...كلامو دخلني بعضي...ذكرت ادم وقتها...بدني رعش...لحظتها كلامو في اكا الليلة تعاود في وذني بالكلمة...كانو هو اللي فوقي توا مش زياد...منعرفش علاش ساعتها هذا لي حسيتو...قلبي دق بالقاوي...و دموعي نزلو اكثر...حاولت ندزو اما منجمتش...عرفت كان نخليه باش يكمل لي بداه...اما مش مستعدة حتى طرف...للي باش يصير...اصلا نحس في بدني مقيد باكا ليلة...عفتو و منحب حتى حد يقرب مني خاصة زياد...منحبوش يقرب مني لهدرجة...خاطر خوه هو لي اغتصبني...حبي ليه و قلبي مطاوعينو...اما بدني رفضو...حسيت بيديه كي طلعلي المريول...محسش بدموعي...و لا بدزاني ليه...دوب وصل لكرشي...حبستو بيدي نحكي و نبكي فرد وقت
انا:س سيبني امانك...برحمة امك سيبني
رخف يدو عليا...حطها على وجهي...يمسح في دموعي و يحكي
زياد:سواار
انا:م منحبش...سيبني...متعملش فيا كيفو
زياد:سواار فاش تحكي ياخي
هزيت يديا زوز...سكرت وذنيا...نبكي بالشهقة...جبد روحو مني...هز يدو مسحلي دموعي يحكي
زياد:مش قصدي لي صار
انا:سيبني منحب حتى حد يقرب مني...كلكم كيف بعض
عالكلمة...جبد روحو مني جملة...وقف...منجمتش نحل عينيا...قويت في البكا...نسمع فيه يحكي
زياد:كان كنت كيفو كنت ستغليتك من اول نهار...مش بعد ما
سكت...نفخ بالقاوي...تلكمت على روحي اكثر...كمل كلامو يحكي
زياد:زايد الكلام...بعد اللي قلتو انت
كمل كلامو و خرج...الباب متاع برا سمعتها كي خبطت من البيت...تهزيت و تنفضت في بلاصتي...قويت في البكا اكثر...نحاول نلم في روحي...منعرفش شنية لكنت نقول فيه...اما ساعتها هو اللي كان بين عينيا...اكا الليلة تعدات عليا في دقايق هذوكا...منعرفش الكلام لي قلتو جرحو و لا لا...اما منجمتش نقص عالبكا...نحب نكون معاه...نحب نعيش كلشي معاه...اما من غير اكا الماضي...من غير ما يكون ادم هو خوه...تعبت من البكا...لين دموعي نشفو...بقيت محضنة روحي...سارحة في القارد روب...منعرفش قداش تعدا وقت ساعة زوز ثلاثة...منجمتش نتحرك...و لا نحرك شي من بدني...و منجمتش نفكر زادة...و منحبش نحط احتمال اني بعد ما رفضتو باش بمشي لزينة و لا لوحدة غيرها...لااا مش باش يمشي هو يحبني انا...انا و كهو...هو متاعي...و حتى وحدة ما عندها الحق فيه...سكرت عينيا...و دمعة اخرى لقات طريقها...كيف باش يكون ليا...و انا رفضتو...اول مرة فكر يقرب مني رفضتو...بقيت اكاكا...نبكي و نسكت لين هزني نوم و رقدت
||||||||||||||||||||||||
زياد يحكي:
حرقت الكياس...منعرفش قداش بقيت نسوق...خرجت غشي الكل في سواقة...كل مرة نذكر كلامها نهبل في مخي...منعرفش كيف نجمت تقولو...كانت تنجم ترفض...و كنت باش نتفهمها...نعرف لتعدا علاها مش ساهل...و مش بالساهل تنساه...اما بعد كلامها تالي...رجعتني لتالي بعشر خطوات...عكس الخطوة اللي عملتها على جالها...كيف تجمت تقارني بيه مستحيل...ركيت الكرهبة على جنب...عديت يدي على وجهي بعصب...كبست على راسي بيديا زوز...نهدي في روحي...دنيا بدات تظلام...نزلت من الكرهبة...منعرفش على روحي كيف وصلت للبقعة هاذي مرة اخرى...دزيت الباب بيدي و دخلت...اصلا العساسين لي برا مزالو مذكريني...اصوات بدات تعلا في وذني...طلعت راسي نشوف معاها...نفس البدن...نفس لون شعرها اصفر واصل لخسرها...نفس الغزرة...شي ما تبدل فيها...3 اشهر و لا فايت مشفتهاش...اما مزالت كيما خليتها..و مزال الحانة تهتف باسمها...جبدت كرسي...قعدت في اخر طاولة...تكيت لتالي نشوف معاها...شربت الكاسة لاولى و الثانية و الثلاثة...منعرفش قداش...حسيت روحي بديت نسكر...نشوف فيها قاعدة تقرب مني...لين وصلت قدامي...حطت يدها على كتفي...و نزلت باستني من خدي...و قربت لوذني تحكي
زينة:زياااد...قداش توحشت اسمك...و ريحتك...و طلتك...بالمختصر توحشتك
تبسمت على جنب...هزيت يدي...جبدتها من يدها بقوة...جات في حجري...بقيت نشوف معاها...منعرفش قداش بقيت نغزرلها...هزت يدها تعدي فيها على خدي...كبست على خصرها اكثر..و سرحت في عينيها...لي في لون البحر...و شفافها لتحاول تقربهم مني باش نبوسها...اما قدام هذا الكل...تفكيري مش معايا...عقلي و قلبي مش هوني...مع حبيبتي الغجرية...تبسمت على جنب...كيف تعدات صورتها بين عينيا...خاصة شعرها...تي بالحق تقول غجرية وقت يبدا شعرها اكاكا...فقت من سرحتي...على شفافها لي تحطو على شفافي...دورت يدي على ظهرها...و لزيتها ليا اكثر...كاني نحب نخرج غشي و كهو...نحب ننساها توا و ننسى كلامها...اما منجمتش...كل مرة نذكرو...ننزل على زينة اكثر...جبدت روحها مني...و نزلت لوذني تحكي
زينة:شرايك نمشو من هوني نعرف لانت زادة توحشتني
بقيت نشوف معاها...حسيت راسي رزين...يمكن ثقلت في الشرب...اما باقي صورتها بين عينيا...هزت روحها...وقفت...و شدتني من يدي تحكي
زينة:هيا زياد خلينا نمشو
|•|•|•|•|•|•|•|•|•|•|•|•|•|•
زعمة زياد باش يمشي مع زينة 😱😱😱 و كان تسمع بيه سوار 😒😒 توقعاتكم للحلقة الجاية