ندبة الروح .

البارت الثاني والعشرون . ندبة الروح

rose_____ali
.
والعزيز اليبتعد تكثر معزته
أبعد شما تبتعد تبقى انته انته

...
البارت الثاني والعشرون . .
.
وسام . .
بعد اتصال ياسمين خابرت صاحبي المحامي حتى امشي بقضيه الطلاق واذا بقينه متفقين من جلسه وحده راح يتم الطلاق    مر اسبوعين ع وضعنه لا هي تحجي ولا اني . رغم اشتياقي الهه  لكن اني طبعي كلش اكابر . ومستحيل ابدي . تناسيت الوضع وصار كل همي شغلي   اروح من الصبح للشركه ارجع ساعه 1 او 2 . صرت عصبي اكثر من الاول اي احد يحجي ويايه او يغلط ينطرد .حتى بالبيت صارو يتجنبوني . هالفترة هاي دخلت هواي صفقات استيراد  . لكن اخر وحده راح اضطر اسافر التركيا علمودهه  . غيث بالامارات  فلازم اروح اني .بدايه الاسبوع الجديد . ..
.
.
ياسمين .
صارلي اسبوع ضجت كلش من ملاحقات شريك وسام  الي اسمه قصي هو بالاصل مو شريكه لان وسام رفض شراكته ..  وين ما اروح  اشوفه كدامي  باب الجامعه اشوفه من ارجع للبيت اشوفه براس الفرع حتى خفت وحرت لا الناس تحجي كلمه  . المن اكول  . معقوله اكول الوسام  لا طبعاً مستحيل  . اخذ عقلي التفكير شيريد وليش .  .. .
.
عبير .  ياسمين . شبيج صافنه وبالج مو ويانه . 
.
ياسمين . شوفي راح اكلج شي . مره طلعنه اني وسام بعشا شغل  فكان اكو ع اساس شركاء جدد ثنين .  واحد منهم  بنفس المطعم حاول يتقرب مني لكن اكل كتل من وسام المهم هذا الشخص صار اسبوع اشوفه بكل مكان وين ما اطلع نظراته تخوفني  شيريد مني مادري .وليش هم مادري عبير دبريني تره والله راح اموت خوف حتى ليلي مدا انامه . كليلي شسوي   .. .
.
عبير . مادري شكلج بس ماكو غير حل نحجي السامر والياسر
.

ياسمين . ديري بالج تكليلهم شي او توصليلهم كلمه ...اموتج والله  .
.
عبير . ماشي ياله لتخافين ماكول   .
.
ياسمين . اني راجعه للبيت ترجعين لو لا .
.
عبير .. شجاج .. صايره تضربين محاظرات شالقصه هاي عود انتي الشاطره . العاقله . .
.
ياسمين . طاكه روحي .  خل اولي . ابقي انتي كملي محاظرات ودزيلي التلخيص والمهم . .
.
عبير . هو اني ادري واكعه براسي  .
.
ياسمين ياله باي . rose_____ali
.
طلعت من الجامعه وهم شفته واكف .. شكد اخاف اني من ابو التكسي بس هالمره اخذت تكسي حسيت خوفي منه اكثر  لان يراقبني  .  . وصلت الراس الفرع كتله عفيه نزلني هنا دفعت الكروه ونزلت بسرعه بأرتباك امشي وسرعه وخوف . 
وصلت الباب بيتنه شفته فات بسيارته بس من وصل يمنه خفف المشي اني من خوفي اريد افتح الباب ما اكدر . عاد نفتحت بسرعه دخلت وطبكتهه حيل . همزين اليوم خميس . منا للاحد بلكت
بعد ميجي ويمل . ((اوف ياربي  ساعدني
ماعندي غيرك يا الهي ))
.
سولاف . شبيج ولج . وجهج اصفر  . جنج مخروعه .
.
ياسمين . ها لا ماكو شي .  بسرعه ذبيت جنطتي ودخلت للمطبخ عندي مرك جامد حميته  وسويت تمن وزلاطه وطرشي وكعدت اتغدى اني ومرت عمي  
.
خاله معقوله ماكو خبر من  عمو ولا ريم ولا امير . .
.
سولاف . والله عمج مادري بيا ديره بس الصبح اليوم خابر  . وريم انتي تعرفيهه اهم شي عدهه نفسهه   . والي عرفته امير طالع الى المانيا مدري وين بالبحر ومتشعوط بالاقامه والله مفتهمت ابو امير حجاهن ع السريع وبعصبيه
وسد الموبايل .امير يتواصل ويه ابو علمود فلوس .اني بعد ماكو فايده مني ...
.
ياسمين .
نقهرت عليهه من حجت هيج . حقهه من القوه والعائله والفلوس للضعف والوهن والنبذ والوحده . .
.
الله كريم خالة لتشغلين بالج .  .
.
كملنه غدا وصعدت اقرا كتبي يمي وصوره محمد هم  اباوع ع الصوره وارجع اقرا . . محسيت ع الوقت صارت ساعه 6   عفت الكتب ومطيت جسمي تعبانه كلش بعدني ردت انزل دك فوني . .
.
.
وسام .
اليوم تعبت كلش طبيت للبيت ساعه 5 طبيت وكالعادة متنرفز واحس دمي يغلي بسبب اشتياقي الهه ..حتى وهي بعيدة يوم عن يوم حبي الهه يزيد اول مطبيت للبيت اجاني اتصال من صاحبي المحامي الي هو اساسا محامي الشركه مالتنه . .
.
📞📞📞 

وسام . نعم . تفضل .

المحامي : مرحبا استاذ وسام كدرت اجلك موعد الجلسه ان شاء الله مو هذا الاحد بالورا .  .
.
وسام  :هاهيه عاشت ايدك اني ان شاء الله الخميس ارجع . .
.

المحامي : اترخص في امان الله . .
.
_______rose_____ali
.
ام وسام  : ها يمه شلونك . .
.
وسام  زين يوم زين .  بس شويه تعبان .  .
.شفت امي كاعدة و مدده رجلهه بالكاع رحت خليت راسي بحظنهه وهي بدت تمسد بشعري . . وتحجي بهدوء . .

ام وسام . يبعد روحي هونهه تهون وخلي املك بربك كبير ودائما تذكر الايه عسى ان تحبوا شيئا وهو شرا لكم وعسى ان تكرهوا شيئا وهو خيراً لكم . استغفر ربك . 24 ساعه عصبي وطالعه روحك ليش ييمه هيج راح تأذي نفسك .. توضا يايمه واوكف على سجادتك وبين ادين ربك وشوف شلون همومك راح تنجلي كلهه . .راح تصير صلاة المغرب كوم اغسل وحضر نفسك للصلاة وجرب وابدي بداية جديده .  وانسه الي راح .طول عمري متعودة اشوفك قوي وممنهار   .
.
وسام :صار يمه .
.
يوم   .اليوم خابرني المحامي كدر يأجل الجلسه . .
.
ام وسام .  اي خير ان شاء يجوز هذه اشارة من ربك تأجلت ..  الله يهديكم ييمه ويوفقكم . ويجمعكم . .ياله اصعد يمه اصعدارتاح . وكعد من يمك العوبه خل تنزل من جتي من الدوام الحد هسه نايمه ..
.
وسام .
اول مطبيت  للغرفه اتصلت ع ياسمين يمكن كانت مثل الحجه حتى اتصل واسمع صوتهه . .
.
📞📞📞 ياسمين . .
.
ياسمين ..((باوعت ع الاتصال شفته وسام  احس نفسي ارتبكت ودكات قلبي زادت اباوع ع الاتصال  واباوع ع صورة محمد غمضت عيني  وانطيته مشغول   وعفت الفون ونزلت جوة .    .
.
وسام .
ادك ع ياسمين متفتح خط . دكيت اول مرة نطتني مشغول ثاني مره والثالثه متجاوب  .  .صدك قهرتني . 
.
كتبت الهه مسج . تاجلت الجلسه مو هذا الاسبوع الورا . 
(( ردت اكتب الهه السبب كلت لا ليش ابرر الهه ))
دزيت المسج . وغلقت الفون حتى محد يتصل و نزلت يم اهلي صار هواي مكاعد وياهم ..
.
rose_____ali