THE WRONG MR. RIGHT By RJ NUEVAS

CHAPTER 22

THE WRONG MR RIGHT

by rj Nuevas

 

CHAPTER TWENTY TWO

            Dahil pinauwi sina Carlo at Dennis in the middle of a class, mabilis na kumalat ang pambabastos nila…pati na ang ginawang pagtatanggol ni Edge sa akin.

            “Gago talaga yang sina Carlo!” galit na sabi ni Ramil. Nasa canteen kami noon.

            “Okay nga e,” sabi naman ni Karen.

            “Paano naman naging okay yon?” tanong ni Ramil. Ako rin, nagtataka.

            “Imagine, kung hindi binastos nina Carlo si Welcome, hindi siya maipagtatanggol ni Edge. Hindi ba, nakakakilig? Si Edge, just like a knight-in-shining armor!”

            Asus, yun lang pala ang punto niya.

            “Inggit ako, Welcome. Sa akin, wala pang nagtatanggol na gano’n.”

            “Gusto mo talagang mabastos, para lang may magtanggol sa iyo?” tanong ko. “It’s not a good feeling, Karen.”

            “I know. May nambastos na sa akin pero walang nagtanggol. Lalo ko talagang nagugustuhan itong Edge na ito ha!” Tumingin sa akin si Karen. “Hindi mo naman siya gusto, di ba, Welcome? Si Ward ang gusto mo. Sa akin na lang si Edge ha?” sunud-sunod na sabi ni Karen.

            Hindi ko na siya nasagot dahil lumapit sa amin si Ward.

            “Welcome, I’ve heard what happened,” bungad niya.

            Napatango na lang.

            “Dapat talaga, hinatid kita yesterday. Para walang nakapambastos sa iyo.

            Napangiti ako sa sinabi niya. Kinilig.

            “Pinagtanggol naman siya ni Edge,” pahabol ni Karen.

            Nakita ko reaksyon ni Ward. Nagulat. Nagtaka. May halo bang selos?

            “Is that true?” tanong niya sa akin.

            Napatango na lang ako.

            Hindi nakasagot si Ward. Napaisip.

            “Bakit parang hindi ka masaya?” tanong ni Karen. “Hindi ba dapat matuwa ka na iniligtas ng twin mo si Welcome.”

            “I’m glad,” biglang ngiting sagot ni Ward. “I’m glad.”

            Pero bakit parang hindi?

            “Welcome, is it okay for me to take you home after school?” tanong sa akin ni Ward.

            “Ito naman, nagpapaalam pa,” sabi naman ni Ramil.

            “Of course, I need to ask permission first,” nakangiting depensa ni Ward.

            “Napaka-gentleman talaga ni Ward.” Si Karen naman yon. “Siyempre, papayag si Welcome na ihatid mo siya pauwi, no?” sabi ni Karen sabay siko sa akin.

            Nakatingin sa akin si Ward, nakangiting naghihintay ng sagot ko.

            Ngumiti lang ako sabay tango.