قَـاتلــة بـرُوح بـريئَــة

الفصل الثالث و العشرون

وسط ساحة خضراء و طبيعة خلابة كترد الروح كتواجد جليسة عبارة على زربية و وسائد و جنبهم  موقد من النار ..
كانت كتجري وراء بنيتة صغيرة و كضحك بصوتها الأنثوي على طريقة الطفلة فالجري الي بحال شي بطة .. بالكاد خطواتها متوازنين و رجليتها المطبزين كل وحدة كتلوحها فجيه ..
أخيراً وصلات ليها و هزاتها عندها كتبوس فيها و تضحك بصوت عالي و الطفلة كتخنزر فيها و تمتم و تشير بيديداتها مبغاتهاش تهزها ..

غدير : ههههه ناري على الفنكوشة ديالي شحال كيووووت .. باغاني ناكلك اممم ( كتبوس فيها )
الطفلة : اعععع .. انننن نا .. م ما ماما
غدير : نعام احبيبة .. باغة تهبطي آا .. راه غادي طيحي و نتي باقي كاع مزاكية فالمشية و عطياها للجرى
الطفلة : انننن ( مادة يديها لواحد الجهة ) ب بابا

تلفتات غدير شافت فالجهة إلي مادة ليها يديها و هو ابان ليها جاي بمشيتو الرجولية و الضحكة مرسومة على وجهو .. نزلات البنيتة إلي باغة تسطا و تمشي عندو كيف حطاتها و هي تجري عندو و كتنغنغ و تضحك ..
تحنا هزها و حضنها كيبوس فيها و اشم ريحتها و حتا هي كتشعبط فيه و تحط فمها على وجهو زعما كتبوسو ..

ركان : الحبيبة ديالي توحشتك .. متوحشتيش بابي آا ؟؟
الطفلة : ب با بابي
ركان : نعام احبيبة باباها
غدير : ( وقفات حداهم ) على سلامتك
ركان : ( قرب و باسها من جبينها ) الله اسلمك
الطفلة : ( كتدفع فيها ) ااااععععع
ركان : 'شاهدة' حشومة تدفعي ماما
غدير : شوف ليك لمسمومة .. غير شافتك تقلبات عليا .. واخة الالة عنداك منين امشي تجي تخشاي فيا
شاهدة : ( شدات فخصلات من شعر غدير و نتفاتها ) اااععع اننن
غدير : آااي
ركان : ( كيفك شعر غدير ) ههههه ناري على المجعورة ديالي كتنتف ماماها .. طلقي شعر مامي راه غادي نتخاصم معاك
شاهدة : ( جمعات شفايفها لقدام )
ركان : ناري غادي تطلقها .. صافي صافي احبيبة .. غير كنضحك معاك .. نتفي و ضربي مكاينش الي اقول ليك شي حاجه
غدير : شتي فشوشك فين وصلنا .. مبقات تقبل إلي هضر معها .. و فاش كتسافر كنوحل فيها أنا
ركان : هادي راه أميرتي و روحي و حياتي ( كيبوس فيها )
شاهدة : ( كتضحك و عاجبها الحال )
غدير : هاني مشيت .. ربحو ببعضياتكم

توجهات غدير للجهة الي فيها الشواية خدات طبسيل من فوق الطبلة و وقفات جنبو كتشوف فيه بابتسامة .. خدام كيشوي لي ستيك و فخاض الدجاج و الخضر و منتابهش لمجيئها ..
غدير : تبارك الله على الشاف ديالنا
عماد : ( ضار عندها و خربق ليها شعرها ) البرهوشة
غدير : برهووشة !! واش أنا والدة و كتقول عليا برهوشة .. كيدرتي ليها ؟
عماد : عاقل غير على البرهوشة إلي كانت كدير الكرينات .. و غادي تبقاي ديما فعيني برهووووشة
غدير : واخة الشارف .. هاك عمر ليا هاد الطبسيل .. ندي لداك الحلوف إلي عندي ياكل
عماد : هههه .. ناري و اسمعك
غدير : آش غيدير كاع ؟ داك الجهد كولو تقادى ليه .. من نهار تزوجنا .. معايا أنا و لا
عماد : اوى حتا لقدامو و عاودي نفس الهضرة
غدير : ( بضحكة متوثرة ) ههههه .. واش سحابك غادي نخاف
عماد : ( شاف من وراها ) سمع اخويا شنو قالت عليك هادي