زواجك بالاكراه وعلاجك قدري ( صكر الصخرة)

الفصل الثاني ..

لا القمر يتحمل حراره الشمس ولا النار تتحمل بروده الماء .. الحب حكايه سحريه تجعل منا نصدق الاحلام مثل الذي يقطع الجبال وفي النهايه لايلتقي بحبيبه ..ومثل الذي يعبر جسور الموت من اجل نظرة واحده ..
........................

صكر اخذ هند من كراج سيارات المستشفى الي تعمل فيها .. اخذها تحت تهديد السلاح .. وهو مايعرف هي منو مايعرف غير اسمها .. وهي ماتعرف منو هو ماتعرف غير انه مجرم واختطفها ..
بعد وقت قصير جدا من لحظه ركوبها السياره وياه .. دخلو لمزرعه بوسط مكان شبه صحراوي ماكو احد حولهم بس هما وبداخل المزرعه اكو اسطبل للخيول .. طبت سياره صكر وسدو البيبان الجبيره .. وكف ونزل .. وصاح بصوت يفزز

صكر .. نزلي ..يلا ..

رجفت هند من الصوت .. لكن نزلت وبعيونها اكو مقاومه غير طبيعيه .. صاحت هي هم بكل ثقه وكالت ..

هند . انت واحد مجرم .. خطفتني وجبتني لهنا .. شتريد مني ..

صكر .. اكو واحد جوا متصاوب اريدج تحيه .

هند .. اخذوه للمستشفى ..لو انت الي صاوبتا واتخاف لاتدخل سين وجيم ..

اتقرب عليها ولزمها من ايديها وجرها وطببها للغرفه الي جانت بيها الولد المتصاوب وكال ..

صكر .. انت مالج علاقه غير انه تداوينه وبعدين راح ارجعج من وين مااخذتج .. شوفي لحد الان زين وياج ..اسمعي الكلام احسن الج والي ..

التفتت هند حواليها ..الغرفه مجهزه بكلشي وكانه فعلا صاله عمليات .. الكل متلثم ماشافت وجه ولاواحد بيهم ..حتى هذا الي اخذها .. كالتله

هند .. ماشالله الغرفه وكانه وحده من غرف المستشفيات لازم اتسون هوايا عمليات اهنا .. لو اتاجرون بالاعضاآ

فقد صكر صبرا وكال .. لج انت من ياصنف مخلوقه .. شلون تحجين هيج وتتهميني باشياء ..استغفر الله ..

طلع مسدسا من ورا ضهرا وخلاها على راسه وصاح .. اشتغلي وبلا حجي لاافرغ هذا براسج واكون لاول مره اقتل شخص بريئ .. راح يساعدج اهنا هذا الولد .. هو ممرض ..

صاح صكر على الولد وكال .. خالد اوكف ويا الدكتوره لبين ماتخلص .وعينك عليها . .. دكتوره هند اريده يعيش فهمتي

هند .. ياربي دخيلك ..

صكر بصوت عالي .. فهمتتتتي

هند .. فهمت .. اطلعو .. وابقى انت بس خالد .. يلا

طلع صكر .. سد الباب وبقت هند وخالد يسعفون المتصاوب ويسوله عمليه .. الرصاصات وحده ابكتفا والثانيه صايره بصفحتا .. ابتعد من الغرفه الي بيها الدكتوره .. واتكأ على السياج مال الحديقه جان عالي. اجاله واتقرب اله سامر وكال ..

سامر .. هاي من وين جبتها ..

صكر .. شفتها كدامي اول مطبيت للمستشفى .