زواجك بالاكراه وعلاجك قدري ( صكر الصخرة)

الفصل الحادي والعشرون

عندما يموت علينا شخص عزيز ..تنير في قلبنا اربعون شمعه .. وخلال اربعون يوما تنطفئ هذه الشموع تباعا حتى اخر واحده . لكن تاتي ذكره ..او رائحه ..او اغنيه ..او موقف ..يوقد هذه الشمعه الاخيره ..فتبقى موقده الى الابد. لانستطيع من خلالها النسيان ..فهي تذكرنا باالفقيد الغالي على قلبنا.
.......................

ايام العزا عدت ببطئ شديد جدا وجانت هند حتى بنومتها ممرتاحه وتفز كل شويه وصكر يهدي بيها. وبعد مخلص العزا وخفت رجل العالم ورجعت الحياة شويا شويا لطبيعتها لكن هند لساتها خامله وحزينه .. رعد مجان بس اخ الها جان اب وام والصديق والسند وفرحتها .. جانت تتذكره وتكول ..

هند . مجان فد يوم متكأب جان دائما يضحك ويحجي نكت .. حتى من يتعصب يهدى بسرعه ..مااجا فد يوم وزعلني وخلا خاطري علمود شي .. حتى جان هو يساعدني بدراستي ويشجعني لحد ماصرت دكتوره .. جنت اتعارك وياه حتى يعوف سلك الشرطه لكن هو جان يكول . مثل ماانت اتحبين الطب اني هيج احب ان اكون ضابط واشتغل بالشرطه ..

اخذها صكر لحضنا جانت الساعه بالعشره بالليل .. جان يمسح على شعرها لحد ماغفت ..لان كل مايسوي هيج هي تغفى بايده ..
نومها على المخده غطاها ونزل .. جانت حليمه داتطلع اتشوف شلونها صارت بوجه صكر .. كالت

حليمه ..شلونها مرتك نامت لو بعدها كاعده ..

صكر ..لا غفت .. خلوها نايمه .

حليمه ..اي زين .. اني اكول لو ترجع للدوام احسن على الاقل تلتهي ..

صكر ..اي راح احجي وياها واشوف شلون .. هسى لاتخلين احديصعد الها وكل شويه روحي شوفيها من بعيد واني اطلع عندي جم شغله ..

حليمه ..روح الله وياك ابني ..

عافها وطلع .. اخذ وياه سامر ورضا ... لان قبل ميصعد سامر ذبله حجايه بانه وصلتله معلومات عن العصابه لان الي اتصابو واحد حاجي وكايل انه الي اتفق ويا اسماعيل شخص جان يريد يتخلص من الدكتوره وزوجها .. ومره سامع اسماعيل يكول انه اكو علاقه بينه وبين جمال الي ربح بالانتخابات ..
وواحد من رجال جمال ..يصير صديق واحد من الي صاوبو هند ..
بالطريق الي طالعين بيه صكر وسامر ورضا ..جان سامر يكول ..

سامر .. اني خايف لايكون سجاد اله علاقه بالموضوع يوم الي انصاب رعد ومات مااجا للبيت من سالت عليه لكن واحد من الحرس كال انه اجا خطيفه وطلع خطيفه ..

رضا .. معقوله اله ايد لو يكون هو فعلا

صكر .. واني دااشك بيه .. نظراته هو والشيخ ابد مو طبيعيه وجان يتهربون من هند كل مااجت اكبالهم ..

سامر .. شراح اتسوي لو طلع هو فعلا ..

صكر ... راح يشوف الي ماشافه بعمره ..
سكتو ثلاثتهم لان الصدمه راح اتكون كلش جبيره .. لو فعلا ابن عمه هو السبب بموت رعد .. معناها راح تموت من قهرها نضال ..وممكن تترمل يمامه بعز شبابها ِ.ويخسر جاسم واحد من ولده .. وهذا الي جان يحز بنفس صكر ..