زواجك بالاكراه وعلاجك قدري ( صكر الصخرة)

الفصل الثالث والعشرون

من الممكن انك عندما اصبتني في قلبي لم انزف كثيرا ..لكني خسرت الكثير .. خسرت اخي الذي لم يكن لي سواه ..خسرت مهنتي التي ضاع عمري حتى ازاولها وانجح فيها .. خسرت نفسي وهي تعشق كل ذرة فيك
......................

وصل صكر للمستشفى .. طبك على السريع ونزل ..جان مفور يكره اي شخص يحجي وياه بنرفزه وهند دائما جانت هيج .. صعد للطابق الي هي بيه .. جان اكو وحده داتطلع من غرفتها. انتظر لحد ماخلصت حجي وياهند ..وهو دخل وراها. باوعت بيه وكالت ..

هند .. شكو ..لويش اجيت ..

صكر .. هذا اسلوبج عدليه وياي .. شبيج كل ساعه شكل ..

هند .. طبعا .. بسببك راح اخسر كلشي ..

صكر . شكو احجيلي ..

هند .. شحجيلك .. شكلك ..رئيس المستشفى رزلني بادب وراح يستغنى عن خدماتي هم بادب .

صكر قاطعها وكال .. شنو .. وين هذا ..

هند .. شنو وينه هذا ..شراح اتسوي صكر.

اندار وطلع من غرفتها بلا ميجاوبها وهي طلعت وراه واتريد تلحكه وماكو مثل الصكر بسرعته صار بغرفه الدكتور عادل .. طب حتى بلا استأذان ..جان اكو واحد كاعد وياه طلعه من الغرفه بصوت واحد ..

صكر .. اطلع ..

هند .. صكر اهدأ شداتسوي.

عادل .. دكتوره هند .. شديصير اهنا ممكن اتفهميني.

صكر كال .. اششششش الحجي وياي مو وياها .. انت على اي اساس اتريد اتوقف مرتي عن شغلها.

عادل .. هذا مو من حقك تسال .. وميصير تقتحم الغرفه هيج ..اطلع قبل لااخابر الامن ..

ظرب صكر ايده على الميز الي كدامه واتقرب من الدكتور وكال .

صكر . باوع بيا زين .. شكلي مال واحد يخاف مثلا . باوع بيه باوع .. ولاتنسى هذا الوجه .. مو انت الي تسمع حجي لمرتي ..الدكتوره هند .. شوف دااكلك . تجي بالحسنى كلش زين والا اني اعلمك منو صكر . فهمت ..

مجاوب شي الدكتور عادل من خوفته من صكر .. اندار على هند اخذها من ايدها وهي اندارت على الدكتور تعتذر منه .. سحبها وطلع .. عافت ايدها منه وكالت ..

هند... انت شلون تتهجم على رئيس الاطباء هيج .. اخاف مجان يطردني هسى راح يسويها ..

باوع بيها صكر من فوك لجوه ..يعشق حتى عصبيتها وكال ..

صكر ..محد يكدر يتجاوز حتى لو بكلمه على مرتي فهمتي لو لا .. وهو رجال يطردج.

هند .. شراح اتسوي اذا فعلا سواها ..تقتله لو تهددا بالموت ..

صكر .. اي ذاك الوقت افكر شراح اسوي .. وهسى اذا خلصتي شغلج خلي ارجعج ..

هند .. اووووف ..لابعد مخلصت .. بعدين عندي وراي جيش مو حارسين ياهو الي يشوفهم يخترع ..