زواجك بالاكراه وعلاجك قدري ( صكر الصخرة)

الفصل الخامس والعشرون

لم اشعر انني خسرت كل شي هكذا من قبل.
.................

نايمه هند بالجربايه .. تحس كل جسمها يوجعها ..وكانه جانت طالعه من حادث مكسر اعضامها .لكن بالحقيقه هو قلبها الي يوجعها .. قلبها الي مكسور ومتحطم وبعدا داينزف .. روحها الي ذبلت من يوم الي تزوجت بيه صكر .. صح حبته لكن حتى حبه الها مؤلم ..
استنفزت كل طاقتها حتى قدرتها على علاجه بعد متفيد .. غمضت عيونها وهي تفكر ..
(( مابقى بيا حيل حتى للكلام .. ومابعد لي قدره على علاجك ياصكر ))
غطت نفسها وسلمت روحها للنوم ..كانه جانت تهرب بيه وكانه النوم مهرب لكن مع الاسف يرجع الالم من اللحظه الي توقف عدها ..

لما علي سمع الي جان جاي بمأموريه علموده وحضر كل الادله الي ممكن تفتح القضيه مال عمه الشيخ هاشم ..بعد مرور اكثر من 25 سنه على حدوثها .. دز الاوراق والدلائل الى بغداد ..حتى هما يقررون الخطوه التاليه ..
جان كاعد ويا زملائه بالمركز الشرقي للصخره .لما خابره صكر .. فطلب منه انه يلتقون .. واتفقو ان يجيه صكر للمركز ..
بعد ماغلق الهاتف وياه .. اجتيلهم معلومات عن الحادث الي صار على الطريق القديم للصخره من المراكز الاخرى ..وكانت الاحداثيات مالته انه ..
(( انفجار سيارة على الطريق القديم للصخره .. وكان يتواجد في داخلها شخصين ..بعد عملية مناوره مع رجال شرطه الصخره الابطال .. من اجل القاء القبض عليه المشتبه بهم .. سجاد جاسم ال ... وحارث شهاب الملقب بالاسمراني لكن اسفر الاشتباك على انفجار السياره بهم بعد اطلاق عده طلقات ناريه ))
واحد من جماعة علي جان ديقرا التقرير ..ويباوع بعلي .. ينزل راسه ويرفعه مره اخرى ..
انتبه عليه علي وكال .

علي .. شبيك زامل .. اكو شي .. لويش داتباوع بيا هيج ..

زامل ارتبك وكال .. علي .. كلي اخوك مو اسمه سجاد ..

علي ... اي بلي .. سمعتو عنه شي جان مطلوب

زامل ... البقيه بحياتك ..

علي كبل نهض من مكانه وكال .. شنو يعني ..شلون ويمتى

زامل .. هسى الضهر .. هذا التقرير هياته ..

راح علي اتقرب من زامل ..اخذ التقرير مدايصدك الي دايسمعه ..شلون مجان وشما سوى مجان يتمنى الموت لاخوه ..وخاصه بهالطريقه ..
اخذ الاوراق ودايقره ..وعينه مداتستوعب الي تقراه .. كعد من صدمته على الكرسي .. زامل خاف عليه .. ركض وجاب ماي اله .. انطاه اياه وكال

زامل .. علي ..مااكدر اكلك لاتنقهر .. بس شد حيلك .كلنا لهاطريق .. وهو جان مطلوب ..لو مسلم روحه جان هواي احسن .. بس شنكول ..قضاء وقدر

مجاوبه علي ..جانت الاوراق الي بيده صاره كمشه بعد مجانت قبضته مسدوده عليها بكل قوته .. الي جان قاهره اكثر شي هو امه .. ام سجاد .نضال شنو راح يكون شعورها بعد ماتعرف انه ابها مات .. جانت ميته قهر من ااشي الي سواه وهسى راح يكمل عليها ..