خطايا وغفران || باللهجة العراقية

"شرفٌ قد ضاعَ" Chpt 24

ملاحظة ؛ خاف تتيهون لوناسين هاي الأحداث عبارة عن فلاش باك بين حُسام ونبأ وإلي صار بيناتهم،خوش؟ .

وملاحظة ثانية ؛ عنوان البارت الحقيقي هو"الإندومي تجمعنا"

#خطايا_وغفران
#للكاتبة_زهراء_شلتاغة
_ _ _ _ _ _ _ _ _
*قبل عدةِ أشهر .

ورة مُرور إسبوعين من مكوث حُسام بهذا البيت وية أُمه وزين وبيوم من الأيام .

چان بالمطبخ يطبخ يحاول يطبخ المعكرونة وميعرف شلون يسويها ، چانت هاي ثاني معكرونة يسويها وتعجن وتحترگ ، چانت عصافير بطنه تزقزق وهو آيس من روحة .

راح صعد فوگ للغرفة الإنطوه ياه هو وزين وفتح الجنطة الچان معبي بيها أكل گبل ميطلع من البيت ، چانت عيونه تدور بالجنطة عن شي سهل وسريع وموجود بكمية جبيرة حتى يشبع بطنه عجز يلگى شي مفيد ، چان باقي بس چيسين أندومي وببسي وميرندا ، تأفأف بضيق وسحب الچيس والببسي ونزل جوة وهو يحچي ويتذمر ؛

_بلة وين يشبعني هالچيسين؟ هو آني أكل أربع چياس وگوة أشبع شراح أسوي بهذني إلي مايشبعن طفل..أوف لوعندي جهاز إستنساخ للبشر وإستنسخ فد ثنين من هُشام چان آني بخير هسة .

نزل جوة وراد يروح عالمطبخ بس فجأة سمع صوت تگلاه من المطبخ ، عباله رجعت هناء وأُمه وشَميم ، چانت هناء مقترحة تطلع نور من البيت يفترون شوي ويرجعون حتى تخف حالتها النفسية شوية ، فرح بداخلة لأن هناء خوش طباخة .

راح بالمطبخ والبسمة ماتفارگ حلگة وبعدين إنصدم ببنية چانت واكفة عالطباخ وتطبخ ، چانت بلا حجاب ولابسة تيشيرت أبيض وتنورة قصيرة فوك الركب وهادلة شعرها الجوزي على جسمها ، نصدم من شافها وماعرف من وين جتي هالبنية بس بقى يحدق على رجليها ونعومتهن وجمالهن وماحس بشي وراها .

حست البنية أكو شخص موجود وهيَ تسمع صوت أنفاس مضطربة ، إلتفتت لوراها لگت ولد جاي يباوع على رجليها ، إنتفضت وصاحت بصوت عالي وشمرت الچفچير من إيدها بلا وعي منها .

إجة الچفچير على خشم حُسام وأفاقة من شرودة بشكل مؤذي وقاسي ، صاح بحدة وحط إيديه على خشمه والدم ينساب من إصابعه ، طلع من المطبخ بسرعة وراح للحمام يغسل خشمه والدم يتطافر منه والوجع يغلي بداخلة ويتمنى يصيح بأعلى صوته حتى يعبر عن وجعة بس كان الغلط منه .

ورة شوي إجتي البنية ولابسة جُبة وشامره الشال على راسها بإهمال ، داهمت باب الحمام بقوة وشمرت علاگة بيها سبيرتو وچيس گطن وباكيت لصقات جروح عالگاع وطبگت الباب بقوة وعافته ، سحبهن حُسام وطلع من الحمام وگعد عالقنفة حاول يوقف النزيف ونبش عن دهن دَهن بي خشمه وعالجه وخلة لاصقة مال جروح عليه ، چان يحس بوجع چبير براسة فرفع راسة لفوگ وحط إيده على گصته ويحاول يكتم الدموع المُعبرة عن آلمه ويكتفي بإحمرارهن.