خطايا وغفران || باللهجة العراقية

"باقٍ على حبي ورغبتي فيكِ" Chpt 26

ملاحظة ؛ خاف نسيتوا أحداث الفصول السابقة بسبب حُسام أبو زرور فتوقفنة عند الفصل ٢٣ .
نور چانت تعامل أبو البيت وطلب منها يگضي وياها ليلة علمود ينزل السعر وچان تضربة بالمنطقة الحساسة

خالد راد يرجع نور وماقبلت ولاقبل يطلگها

هُشام شك بسارة من چانت تلعب بجهازها ولصدف القدر أكجد خابرة لأن لگالة سالفة على زين

چانت شميم بالمطبخ تعلف
وتوقفنة عند أبو زرور من لگفتهم شميم وهمة يتشابگون ودفرها وحيروها وأخذ الأضواء إله بس هسة نرجع لهويشم وزيونة ‏‏☻💚

_ _ _ _ _ _ _

#خطايا_وغفران
#للكاتبة_زهراء_شلتاغة

(موقف معاد)
من شافتها شَميم گامت گبل طفرت وخلت المسافة بينها وبين غرفتها بطفرة وإنتظرت نبأ تنهزم من الغرفة ، بقى هذا الموقف يدوي ببالها وحاولت تلگاله تفسير إله ولحواراتهم المُبهمة ؛

_أشو بالبداية من چان شابگها چان عبالي أكو علاقة بينهم لامحال بس شصار بعدين أشو نگلبت الآية ؟ .

بهالأثناء راح حُسام عالتخت وگعد عليه ، حط إيديه على راسه وعصره بقوة وشدد قبضتة عليه وهو يحس بإختلاجات المشاعر بداخلة وإضطراباتها .. ضايع ومشتت بين الهوى والكبرياء وتمتم بينه وبين نفسة بحسرة وغصة ؛

_لچ هيچ سويتي بيه يانبأ ليش .. الله لاينطيچ عساني لاعرفتچ ولاحبيتچ ! .

كُلما چان يحاول ينسى ذاك الموقف يصير گدام عيونه ويهتز كيانه من هول الصدمة والمشاعر المتضادة إلي هاجت بداخله ومانطمت طول هالوقت .

(هنانة تبلش الأحداث الجديدة) .

بقى حُسام گاعد ويعصر براسة بقبضة إيديه والتفكير ياكل روحة ، مرت نص ساعة وهو على هاي الحالة إلى أن قرر يحط راسة عالمخدة ويرتاح من هم نبأ القلبلة حياتة .

بهالأثناء چانت شميم جبغرفتها تمشي وترد بيها وحاطة أصبع السبابة ببداية شفاهها كدلالة على كونها تفكر وتمشي وتدردم ؛

_ولچ شمشومة هاي شدتصير من عمايل بهالبيت من وراچ بلية علمچ ؟ حتى بزر الگعدة بيهم يسوي سوايات وعايش الدور؟ .

عضت شميم إصبعها وردت على نفسها ؛
_لچ أوف منچ يانويرة من يوم إلي تزوجتي خويلد أبو الطلايب عرفت ماراح تجي منچ بعد بس المصايب أويلي منچ ومن بزرتچ .

وگفت شَميم وعدلت نفسها وصفعت نفسها راشديات خفيفة وگالت ؛
_ولچ شمشومة لاتديرين إلهم بال أول وتالي تلگفيهم وتطيحين حظهم مثل ماسويتي بنسوان حموچ وراويتهم النبي عرب ، وين يشردون من الله ومنچ؟ إرتاحي ياشمشومة ونامي السهر موزين على عويناتچ الحلوة نامي يحلوة نامي .