ချစ်သူ့ နတ်ဘုရား〖 Completed 〗

9.3

<Unicode>

အချိန်တစ်ခု ကြာအောင် စောင့်ကြည့်ပြီးနောက် ရှုမျိုးစုသည် စိုက်ပျိုးရေး အပြင် အခြားစွမ်းရည်များလည်း ကင်းမဲ့ကြောင်း ရှန့်ခယ် သိလာရသည်။ အမဲလိုက်ရန်အတွက် လက်နက်ကမရှိ။ ထောင်ချောက်ဆင်ပုံများက ရိုးရှင်းပြီး  ဖြစ်ကတတ်ဆန်း အကြမ်းထည်သာ ဖြစ်သည်။ ယက်ကန်းအတတ် အပ်ချုပ်အတတ်များ က ကမ္ဘာဦးအစ မူလ အဆင့်သာသာ ရှိသေးသည်။ ပန်းပဲပညာ၊ အနုပညာ၊ ယဥ်ကျေးမှု၊ အရက်ချက်ပညာ စသည့် ပညာရပ်များတွင် အခြား မျိုးစုများဖြင့် ပိုတောင် မယှဥ်နိုင်ပေ။ ဤအချက်ကလည်း တစ်နှစ်ပတ်လုံး အတည်တကျမရှိပဲ လျှောက်သွားနေရတာကြောင့်လည်း ဖြစ်နိုင်သည်။ သင်ယူရန် လုံလောက်သော အချိန်ပေးနိုင်သည့် ပတ်ဝန်းကျင်ကောင်းတစ်ခု ရှိခဲ့မှာ မဟုတ်ပေ။

ရှုမျိုးစု ယခင်ကိုးကွယ်ခဲ့သော နတ်ဘုရားသည် စိုက်ပျိုးရေးပိုင်းနှင့် သက်ဆိုင်တာဖြစ်မည်ဟု ရှန့်ခယ် ယူဆထားလိုက်သည်။ ဤမျိုးစုသည် မြေလွှာနှင့် အပင်သဘာဝအကြောင်းအစုံကို ကောင်းစွာ သိနားလည်ထားပုံပင်။ လအနည်းငယ်အတွင်းတွင် တောင်မြေ ဧကရာနှင့်ချီအောင် ထွန်ယက်နိုင်ခဲ့ပြီး စားကောင်းမည့် အရွက်သီးနှံများစွာလည်း စိုက်ပျိုးနိုင်ခဲ့သည်။ စိုက်ပျိုးထားသော စားပဲသီးနှံများကို တောင်အပြင်ဘက်မှ မြို့ငယ်လေးတစ်မြို့တွင် အခြား လူသုံးပစ္စည်းများနှင့် လဲလှယ်၍ရသော်ငြား အသက်ရှင်ဖို့အရေး အမြဲတော့ အဆင်မပြေခဲ့ပေ။

မူလ သတ်ဖြတ်ခြင်းနှင့် ကျိန်စာ နတ်ဘုရားသည် ရေဆွဲခြင်း၊ မြက်ခုတ်ခြင်း၊ သားရဲများကို တားမြစ်ခြင်းစသော အလုပ်ကြမ်းများသာ လုပ်နိုင်စွမ်းရှိသူဖြစ်သည်။ သို့သော် ရှန့်ခယ်ကတော့ ထိုသို့မဟုတ်။ ယက်ကန်းယက်ခြင်း၊ ပန်းပဲထုခြင်း၊ ချက်ပြုတ်ခြင်း၊ ဆေးပညာ၊ ဂီတပညာစွမ်းရည်မျိုးစုံ တတ်ကျွမ်းထားသူပီပီ ရှုမျိုးစုအား အိပ်မက်များမှတဆင့် ဤ ပညာရပ်များကို သင်ကြားပေးနိုင်လေသည်။

ရှန့်ခယ် ပထမဦးဆုံး သင်ကြားပေးရန် ဆုံးဖြတ်လိုက်သည့်လူမှာ မျိုးစုခေါင်းဆောင်၏ သမီး၊ ယီ တိုင်းပြည်၏ အနာဂတ်မင်းသမီးဖြစ်လာမည့် တီမာ ဖြစ်သည်။ သူမနှင့် ဆက်ဆံရေး ကောင်းဖို့က ရှန့်ခယ်အတွက် အထူးလိုအပ်သော အရာတစ်ခုဖြစ်သည်။ သူမကား ရဲရင့်သော မိန်းမပျိုတစ်ဦး ဖြစ်၏။ ရှန့်ခယ် သူမအိပ်မက်ထဲ ပေါ်လာစဥ်တွင် ကြောက်ရွံ့မှု အလျင်းမရှိသည့်အပြင် စိတ်လှုပ်ရှား၍ပင် နေသေးသည်။ ရှန့်ခယ်က ဘယ်ပညာရပ် သင်လိုလဲမေးရာ သူမသည် သေချာ စဥ်းစားပြီးနောက် ယက်ကန်းအတတ်နှင့် ဆေးပညာကို ရွေးချယ်လိုက်လေသည်။