💫 #سلســـلة_فيكتـــوريا_الفانتـــازية_الأسطــورية 💫
✨القـــــصــــة1✨
تعريف هذه السلسلة👇🏻
من بعد حبي الكبير للفانتازيا و الخيال و الكتابة فيه قررت نكتب هاد السلسلة لي غتكون عبارة على قصص قصار كل قصة قصيرة غندوي فيها على مخ...
💫سلسلة فيكتوريا الفانتازية الأسطورية💫 ✨القـــــصــــة1✨ 🐺المستذئبة و مصاص الدماء🧛♂ للكاتبة✒️: Victoria kaelin 💜📖الجزء 1💜📖 فوسط من الحرب العظمى لي وقعات بين المستذئبين و مصاصي الدماء كانت تتجري بكل قوتها هازة فيديها طفلة صغيرة مخبياها فردائها الطويل تتحاول تبعدها على هاد الصداع كاملو فنفس الوقت الحرب شاعلة بين هاد المخلوقين الأسطورين المعروفين بعداوتهوم الشديدة منذ القدم جيوش المستذئبين و جيوش مصاصي الدماء فقتال و عراك الموت و الحياة بين البقاء للأقوى كل واحد فيهوم باغي يفرض الهيمنة و السيطرة ديالو على لاخور هاد الحرب لي كان اساس شعلتها هو السلطة نعم السلطة...الخسائر منتشرة فكل مكان و النار شاعلة فكل المناطق و الخراب عايم فالأرجاء و جثث كل من الجنسين مليوحة فالأرض و المرأة و الطفلة لي بين يديها غاديين وسط من دوك الأجواء حتى نجاو بأعجوبة مبعدين على تما اكبر قدر ممكن........ ⏳بـــــعــد 10 ســـــنــــــوات⏳ و فواحد الكوخ فوق واحد الشجرة و فأعماق غابة بعيدة شوية على المدينة كانت واحد البنت هازة واحد الفأس تتقطع بيه الخشب لي قطعاتها تتلوحها حتى جمعات كومة من الخشب دارتو فواحد وعاء حديدي كبير و بكل خفة هزاتو بحالا هازة الريشة حتى لاحتو حدا الشجرة لي فوقها الكوخ بالضبط و طلعات مع الدريجات الخشبين حتى دخلات للكوخ تتسوس يديها حتى وقفات قدام واحد المرأة كانت فالمطبخ واقفة تتحرك فواحد الوعاء ديال الحساء... المرأة ضارت مبتسمة:ساليتي؟ البنت:اه ساليت واش مزال ماطاب؟ المرأة:دابا نحطو سيري جلسي البنت جلسات فالطاولة حطات راسها فوقها تتشوف فالشرجم الجو كان غايم و الضبابة بدات تطيح رغم انه وقت الغداء هدا بقات ساهية فالشرجم حتى سمعات صوت الزلافة الخشبية تحطات فوق الطبلة و هي طلع راسها لقات المرأة حطات الحساء فالزلايف د الخشب و حطات المعالق حتاهوما من الخشب و الماء و جلسات... المرأة:زيلدا مالك؟شفتك ساهية؟ زيلدا:والو ا روبي تنشوف غير فالجو لي نقالب فجأة روبي حطات يدها على يد زيلدا مبتسمة:كولي هو الأول مكليتي من الصباح و نتي تتجهدي على راسك خصك الطاقة مادام متتاكليش اللحوم البشرية زيلدا:اكيد غناكل نتي عارفة بلي تنفضل ناكل فالخضرة ولا نتهجم على شي بشري روبي:نتي مختلفة بزاف ا زيلدا انا وياك تفرض علينا نعيشو بحال الأوميگا بسبب الحرب 💡الأوميگا: هوما المستذئبين الغير مرغوب فيهم و لي حتاشي مجموعة مقبلاتهوم ضمنها و قوتهوم ضعيفة بزاف. و لي قصداتو روبي هنا هو انهم بعاد على عالم المستذئبين ماشي انهم حاولو ينخارطو فشي مجموعة و مقبلاتهومش ولا ضعيفات بزاف. زيلدا:معرفتش علاش هاد الحرب ناضت اساسا روبي:هاداك موضوع طويل حسن متشغليش بيه دماغك كولي دابا ليبرد هزات زيلدا الملعقة الخشبية و غرفات من الحساء الساخن و كلات مع روبي...
فمكان بعيد بزاف على هنايا و بالضبط فواحد القصر كبيير مخييم عليه ظلام قاتم و الدنيا صامتة حس دبانة متيدورش حتى تم داخل واحد الشاب طويل مفورمي بخطوات ثقال و صوت حدائو فقط لي تيتسمع حتى دخل لواحد القاعة كبيرة و واسعة كان فيها واحد الكرسي بحال ديال العرش جالس فيه واحد الرجل هاز فيديه كأس زجاجي فيه سائل أحمر و لي باين من شكلو انه دم الرجل حرك الحاجب ديالو و الشاب قرب منو حتى وقف قدامو... الشاب:سيفطي مورايا الرجل تقاد فالجلسة و حط الكأس فوق طبيلة صغيرة حداه و بصوت زعزع القاعة الخاوية:بنت السافل ديال كونيل كشفو الرجال على موقعها الشاب هز حجبانو باستغراب:المستذئبة لي قلبتي عليها 10سنين هادي؟؟؟ الرجل:هي هي و اخيرا بعد هاد العناء الطويل حنا لتقطنا اثرها بسبب ان الغبية تتخالط مع البشر و بفضل واحد من جواسيسنا فاش سالات الحرب قدرنا ناخدو قطعة من ملابسها من غرفتها هي الوسيلة الوحيدة لي قدرات توصلنا ليها عن طريق الرائحة الشاب:يعني دابا مكانها معروف عندنا؟ الرجل:اه و دابا جات مهمتك الشاب: و شنو هي؟ الرجل ناض حط يديه فوق كتاف الشاب و الشر تيطاير من عينيه:ايه هي الإبنة الوحيدة ل السافل ديال كونيل ابنة زعيم عشيرة المستذئبين و انا غندمو على النهار لي فكر يغلب فيه عشيرة مصاصي الدماء فديك الحرب الشاب:يعني بغيتيني انا لي نجيبها؟ الرجل بابتسامة شر: لا بغيتك تجيب ليا راسها نسيفطو ل كونيل الشاب:ولكن سمح ليا ا بابا علاه مغيكونش احسن نجيبوها و نهددوه بيها؟ الرجل:لا ا ولدي لا التهديد مغينفعش مع دوك الوحوش انا بغيت يشفى غليلي بغيت نشوفو تيتعذب كتر من العذاب لي تعذبتو بسبب الخسارة ديالنا سنين هادي...(بابتسامة شر)جيب ليا راسها ا درايك نتا ولدي انا سيرافينو بلايد رئيس و زعيم عشيرة مصاصي الدماء و مستقبلا نتا لي غادي تربع على هاد العرش نتاقم لعشيرتك ا ولدي و المستقبل كولو غيكون ديالنا درايك بصرامة:واخا ا بابا عتابرها مييتة....
الكوخ
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
