الملعونة

الجزء الثالث

خلص اليوم و صورة امي ببالي ما تغيب و صوتهة يرن باذاناتي كلما اصفن اتذكر شكلهة و شعرها المشلعتة .. جسمي كلة يكزبر من الخوف

اجة الليل و اني بعدني ما نسيت الي شفتة و لهذا السبب ما كدرت انام بنفس الغرفة الي نايمة بيهة امي اخذت مخدتي و شردت يم بيبتي ..

شافتني امي .. باوعتلي و عيونهة متروسة دموع : " لارا تعالي نامي يمي حبيبتي ... "

باوعتلهة و خفت تسويلي شي : " لا ما اريد انام يمج "
باوعتلي و بعد ما تسيطر على دموهة و كام ينزلن عشرة عشرة : " بنيتي لا تخافين مني .. تعالي خلشبكچ باچر ابوچ يوديني يم بيت جدج و بعد ما تشوفيني "

باوعتلهة بكره و عفتهة مع العلم ما جنت اعرف شنو الي بداخلهة جبرهة تسوي هيج شي و ركضت لغرفة بيبيتي ظليت الليل كلة ما اكدر انام عيوني نعسانات بس ما اكدر انام بس افكر و اتخيل شراح يصير ..

و اجة الصبح و اني لسة ما نايمة و افكر كعدت غسلت وجهي و لكيت بيبيتي لابسة عبايتهة : " ها بيبي وين راح تروحين "

باوعتلي بنظرة مال واحد لعبانة نفسة : " راح انودي امج لاهلهة بعد ما نريدها تضل هنا "

يا رربي بعد ما اشوف امي .. صح اني ضجت منهة بس مو لدرجة تعوفنة و تروح .. ركضت لغرفتهة ..

لكيتهة تجمع اهدومهة بالجنطة تريد تروح .. : " وين راح تروحين .. و تعيفنة "

دارت وجهة : " لارا بنيتي .. ابوج بعد ما يريدني راح اروح يم بيت جدج "

اباوعلهة و بقلبي اكول : " شبيهة هاي ليش تسوي هيج شلون تعوفنة و تروح مو يكولون الأم اعز شئ عدهة بزرهة شلون راح تعوفنة لعد "

لحكناها اني وخواتي للباب مال البيت اجت بوست خواتي : " مريومة .. ميس اني احبجن لا تخافن فترة و ارجع ميخالف "

شالت راسهة و شافتني واكفة : " لارا .. ديري بالچ على خواتج انتي الجبيرة .. و تعالي لبيت جدج حتى اشوفج .. احبج " و باستني

دفعتهة و ركضت ليجوة و كمت ابجي .. تحبني اذا تحبني ليش عافتني و راحت : " اني ما احبج ماكو ام تعيف جهالهة و تروح " ضليت ابجي و احجي بقلبي

مر شهر و اني ما شايفتهة .. الصبح كاعدين على الريوك كالي ابوي .. : " لارا بدلي لخواتج و تحضرن حتى اوديجن تشوفن امجن "

فرحت بس ما بينت هلشي صح مشتاقتلهة بس بعدني زعلانة من تصرفهة : " اي بابا صار "

بدلت لاخواتي و اني هم بدلت .. و رحت اكول لابوي احنة خلصنة : " بابا بدلنة يلا حتى نروح "

وصلنا لبيت جدي و شفناها صايرة عبارة عن هيكل عظمي و عايش حتى حجيهة علكيف و ناصي ..

اول ما شافتنة اخذتنة باحضانهة و بوستنة .. ضلينة لليل يم بيت جدي بعدين اجة ابوي و اخذنة ..

خواتي ضلن يبجن بطلاع الروح يالله رضن يعيفن امي و يمشن .. باستني : " ليش ما ترجعين ويانة بعدج مريضة "

حطت ايدهة على جتفي و باوعتلي : " أني اريد ارجع مشتاقتلجن .. بس ما اكدر ارجع لأن اذا رجعت راح اأذيجن و أني اخاف عليجن من نفسي "

خزرتهة بعيوني : " انتي جذابة كلشي ما بيج انتي ما تحبينة " و عفتهة و مشيت ..

لا تلوموني لان حجيت وياهة هيج اني مجرد طفلة و بيبيتي و عمتي كرهني بيهة و بروحي .. يكومن و يكعدن و يكولن امجن ما تحبجن امجن ما تريدجن .. هي ذبتجن

طبعا ابوي كل شهر يودينة نشوفهة مرة استمر الوضع لمدة ثلاثة أشهر بعدين ابوي كام يغلس و ما يودينة .. اخواتي بدن ينسن امي .. بس اني ما نسيتهة و كرهي الهة كام يزيد ..

بيبيتي و عمتي ذلنة هوواي وين ما يروحن يصيحن بنات المخبلة و بنات المخبلة .. خلن خواتي يكرهن امي من كثر الحجي الي يحطنة بعقلهن ..

مرت تسع أشهر و احنة بعدنة مذلولين من قبل عمتي و بيبيتي حصرة علينة حتة الغسلة ..

و بيوم رجعت من المدرسة تعبانة سمعت بيبيتي و ابوي يسولفون سوية : " يمة حاجيت علاء و كالي سارة تحسنت و صارت زينة .. "

و بيبيتي ما صدكت : " اي و ما ترجعهة شمنتظر مو خبلني بناتك ذبتهن و خلتني حايرة بيهن .. "

فرحت هووواي يعني امي راح ترجع .. نسيت كل الحجي الي جان يحجنة عليهة عمتي و بيبيتي و الكره و الحقد الجواي كلة تبخر ..

فررررحانة حيل ما مصدكة شوكت يخلص اليوم و يصبح الصبح و اشوفهة يا ررربي .. طبعاً بما أنو الدنيا صيف و حاررة

فصعدت فوك و فرشت الي و لخواتي الجو حلوو و بارد و السمة حلوة و النجوم .. خلصت الليل اعد بالساعات ساعة ساعة لحد ما نمت و اني ما ادري..

كعدت الصبح الشمس تضرب برأسي و الذبان مزعج مكدرت أكمل نوم نعسانة ما اريد اكوم بس ضوجتني الشمس حركت ظهري ..

زفرت الهوة و كمت كعدت شفت خواتي نايمات يمي مثل الموتة ما يدرن الدنيا وين صارت ، ردت اكعدهن معشتهن من شعرهن ما يكعدن عفتهن و نزلت ..

بعدني انزل بالدرج و افرك بعيوني و بعدني نعسانة شفتهة صارلي سنة كاملة ما شايفتهة مشتاقتلهة هووواي ..

باوعتلي بحنان و ابتسمت كالتلي تعالي اسويلج ريوك ، فرحت نزلت بسرعة غسلت وجهي و رحت للمطبخ وكفت يمهة اريد اساعدهة .. فرحانة كلش فرحانة الدنيا ما شايلتني مشتاقتلهة حيل ...

خلص منا و رايح راح اتعود على وجودها بحياتي اريد احس بحنانهة الي يضفي طعم لحياتي الي ما بيهة طعم من دونهة ...

جاي نسوي ريوك و هي كلش زينة و مبتسمتلي .. لاحظت تصرفاتهة متحسنة كلشش ما شفت اي شي من الأشياء الغريبة الي جانت تسويهة ..

ابوي تحسنت معاملتة الهة و شوية بدة يحترمهة .. أما عن بيبيتي و عمتي فكامن يجنبنهة و يخافن منهة و هذا اعتبرة شي زين على الأقل يجفنهة شرهن

عدت هاي الفترة على خير و بدون اي مشاكل و الحمد لله .. وراها امي حبلت و جانت تريد ولد ... لأن هي دائما جانت تكول اريد ولد يفيدني من اكبر

كل شئ تحسن بعد المعاناة الي عشناها
الشخص الوحيد الي ما تحسن هو أني .. شوكت يوكف هذا الصوت .. شوكت اكدر انام .

اريد انام تعبت بس اريد اعرف ليش صوت الخطوات هذا ما يتوقف ليش صوت التطكطك هذا راح يضل مستمر ..