الملعونة

الجزء الخامس

.... قوية كالحرب لا تهزمها المعارك ....
  
.... عفوية كالسلام لا يهمها الف كلام ....

............ ............. ............... ............... .............

مرت عمي ضلت مساندتني تساعدني هواي بالطبخ و الخبز .. بس كل مرة جنت ارجع من المدرسة .. بدل ما اكعد اقرة مثل باقي البنات الكة اخواني واحد متعور و يبچي واحد جوعان واحد مريض

ويخلص اليوم بينهم من واحد لواحد و ما اكدر لا اقرة و لا الزم الكتب .. مرات جنت اكعد ب2 بليل اقرة شكم كلمة لحد ما انام من التعب ..

اتحملت مسؤولية اكبر من عمري .. ورة فترة اجت بيبيتي ام امي تطمن علينة ظلت يمنة يومين و اني من اجت فرحت الصراحة عبالي تساعدني و تشيل عني الحمل شوية ..

اشو رجعت من المدرسة تعبانة و عندي امتحان رياضيات و خاف ارسب .. صبيت غدة لابوي و رجعت اقرة .. ما احس الا دفرتني دفرة : " كومي ولج .. ما بيج حظ كومي شوفي اخوج شبي ليش يبجي "

اني الي بعمري يلعبن ركيضان و لعبات و بيبيتي تكلي ما بيج حظ اخوج يبجي ... عبالي بيهة خير و تشيل عني شوية .. هههههه والله اني بطرانة ..

والله تجي عمتي يمنة عدهة ثنين بنات وحدة بعمري وحدة اكبر مني .. لبسهن يخبل و يكضنهة لعب و ركض و ضحك عايشات طفولتهن ونسة .. واني ما شايفة بس الضيم و طيحان الحظ ..

يجي العصر الجهال كلهة تطلع تلعب بالشارع .. حتى صديقاتي اكبر مني اشوفهن بالشارع يلعبن .. و اني اضل كاعدة ورة باب البيت و اباوع للجهال .. اخاف اطلع و يبسطني ابوي ...

الحمد لله .. الهي ارحمني بس أنت الي تعرف اني بشنو احس و شكد اعاني ..

احس بنفسي كبرت عشر سنوات .. الامتحانات بدت ابوي شافني اقرة : " لارا .. اسمعي اذا رسبتي هاي السنة ما تعيدين ابطلج و تكعدين يم اخوانج "  ..

ما اريد ارسب المدرسة هي الشي الوحيد الي يخلصني من البيت و الشغل و المسؤوليات الي فوك راسي ..

المكان الوحيد الي اكدر ارتاح من الشغل بي .. و اني احب صديقاتي و احب الدراسة و اشوف الي واهس بيهة .. ما اريد انحرم منهة انحرمت من هواي اشياء بس ما اريد انحرم من المدرسة ..