الملعونة

الجزء الرابع

اني الوحيدة الي تسمع هاي الأصوات .. امكن لأن جنت مركزة بحالة امي هوااي و ادقق بتفاصيل .. امكن لان اني الوحيدة الي دائما موجودة لمن امي تمر بحالتهة الغريبة ..

مكدرت احجي لأي واحد عن الأصوات الي اسمعهة خاف يكولوي انتي مثل امج او يكولون علية مخبلة ..

استسلمت اسمعهة كل يوم خطواتهة و هي تمشي بالبيت .. أسمع صوت الباب من ينفتح علكيف و يطلع صوت الصرير .. اسمع صوت اركب رجليهة من تطكطك .. بس كل الي اسوي انو ارجع انام

مرت فترة حمل امي بسرعة و جابت بنية مثل الگمر بيضة و عيونهة خضر كلش حلووة و لا يكول اني اختهة .. و ورة شهرين حبلت امي مرة ثانية لأنها جانت مصرة على أن تجيب ولد ..

ابوي ما تفرق ويا سواء جابت بنية او ولد كل شي عند عادي ... ورة حمل امي الثاني جابت بنية هماتين و صرنة خمس بنات .. وهي بعدهة تريد ولد و كل ما حاجاهة ابوي : " يمعودة كل الي يجي من الله هلة بي "  هي ترد علية : " اريد ولد يفيدني من اكبر " ..

اني ادري هي تريد ولد حتى تسكت بيبيتي و عماتي الي وين ما كامن و كعدن يكولن ام البنات ..

اني صرت بصف الرابع ابتدائي هسة امي حبلت مرة ثالثة و مرت فترة حملهة عادية و على خير وهي حاسة هلمرة هتجيب ولد ..

جابت امي و طلع ولد و اخيرا و الدنيا ما واسعتهة من الفرح .. اني هم فرحانة اخوي هذا يشبهني طلع حنطاوي بس هو عيونة عسلي بيهن خطوط خضر  ..

طبعا نسيت اكلكم بيبيتي كلش فرحانة لأن شرف ولي العهد .. امي ما مصدكة صار عدهة ولد متعرف شتسويلة و شتجيبلة ..

اذا بچة امير نشبع بسط اني و خواتي و طبعاً بسبب الضغط الي صار عليه رسبت بالرابع .. صح اني صغيرة بس جانت امي محملتني مسؤولية جبيرة ..

فهي وحدهة بين البيت و بينة احنة بلعطلة امي حبلت مرة رابعة و مرت فترة حبلهة فترة كلش عادية ..

جابت امي ولد ثاني و فرحنة بي بس مو مثل اول فرحة  بامير و سمينا سجاد .. سجاد ابيض و عيونة خضر .. اخواني و اخواتي كلهم عيونهم ملونة على ابوي بس اني عيوني عسليات ..

عدت الرابع و نجحت و الحمد لله و بيوم الي راجعة من الدوام و فرحانة لان نجحت .. جنت بيومهة جوعانة بدلت هدوم المدرسة و طبيت للمطبخ ..

لكيت امي حاطة گدر تشريب على الطباخ و جاي يفور .. فتحت باب الكاونتر اريد اطلع اماعين حتى اصب غدة لان امي جاي تخبز برة ..

اجت اختي الصغيرة تلعب يم الطباخ و حاطة الحافظة الي بيهة الخبز صعدت عليهة و كامت تطفر ..

باوعتلهة : " شهد حبيبتي وخري عن الطباخ لتنجوين .. وج وخري ... " و ما كدرت الحك عليهة جلبت فانيلتهة بالطباخ و وكع گدر التشريب عليهة ..