#فراقد حسن علي
#ألحلقة الثانية.........
#بنات سهر..................
÷÷÷÷÷÷÷÷÷÷÷÷÷÷÷÷÷÷
علـــى لحــــن الدمــع نــــامت عيــــوني الليـــل
و علــــى صــــوت القهـــر فـــز الصبــح گلبــي
==============================
وراحت الحجية فاطمة ومنتصر وهمام
لبيت سهر،،
والطريق كله همام يتأفف
ما راضي على فزعة اخوة منتصر والحجية فاطمة
للمرحومة سهر ،،
لان هاي فزعتهم
وراها مشاكل وطلايب بكد رحمة الله
وصلوا بعد مشوار الطريق لبيت المرحومة سهر
منتصر جاب الطريق كله بس يستغفر ربه
وتارك همام يسولف براحته
والحجية فاطمة بس تنعي وتبجي
وهي الحجية التقدمت ودكت باب بيت المرحومة
وشكد دكت على الباب بس محد يجاوب !!
وحتى منتصر دك الباب بقوة وهم ماكو جواب
همام كاللهم /خلي نرجع العلينه سويناه
اجينه ومحد طلع علينه
الحجية ردت علية /وهي تبجي
- لا يمة خطية البنيات محد الهن ،،
-اكلك يمة منتصر خاف العنوان غلط ؟؟
جاوبها منتصر/ وهو يتلفت بالشارع
و بدت الدنيا تظلم
-لا يوم اني متأكد هذا العنوان الصحيح
شو أنطيني تلفونج اتصل على رقم البنيه
الاتصلتي عليها قبل شوية ،،
وصدك أبو حسين اخذ الجهاز من الحجية
واتصل على الرقم ،ردت علية بنية تبجي
-السلام عليكم خوية
وياج منتصر ابو حسين ابن الحجية فاطمة
خالة المرحومة امج ،،
احنه باب بيتكم محد يطلع علينه
انتن وين بالبيت لو بغير مكان ؟؟
جاوبته مسرة وهي تشهك وتبجي
- أي أحنة بالبيت وكاعد نقرة قران على نعش ماما
وسمعنه دك الباب بس نخاف نطلع
ماما ما تقبل نفتح الباب لاي شخص تخاف علينه !!!!!
اذا وياك خالة فاطمة هسة افتح الباب الكم
جاوبها منتصر وهو مستغرب
هاي شبيها البنيه ؟!
شنو شاخطة من صدمة وفاة أمها ؟!
لو عقلها مو تمام ؟!
-أبوية أنتي وياية خالتج فاطمة وأخوية همام
لاتخافين أجينه نعزيكم
ونوكف وياكم
ونقوم بالواجب
أفتحي الباب ترى وكع علينه الليل
وبعد مااندل دربي
غلق الخط منتصر ،وبقوا واكفين بالباب
شوية وسمعوا صوت السرقي ينفتح من الداخل
وطلعت عليهم بنيه شابة
اليشوف شكلها ولبسها يتوقعها وحدة
من بنات جنوب لبنان
بيضة،، الوجهه مدور،، والحواجب ثخينه
والعيون وارمة من كثر البجي
ولابسة العباية
والربطة السودة نازلة لحد الحواجب ومحنكة بيها ،
بس كالت /تفضلوا
دخلت الحجية فاطمة وشبكت البنيه
وكامت تبجي بصوت عالي ،،
منتصر لاحظ بنيه ثانية ،،
مبينه اصغر عمر من هاي البنيه
واكفة بالباب الدخل على البيت هم تبجي
وكأنها واكفه تراقب اختها وخايفة عليها
YOU ARE READING
بنات سهر
ChickLitألبنات نعمةٌ من نعم الجنَّة ،، ورداءُ رحمة للحياة ،، ونسمة رقيقة تلامس الرُّوح ،، فَـ هنيئًا لمن رُزق بالبنات ،،
