بنات سهر

ح ١٩

#فراقد-حسن-علي

#ألحلقة-التاسعة-عشر ...(الحلقة برعاية مسرة 🤗)

#بنات-سهر
÷÷÷÷÷÷÷÷÷÷÷÷÷÷÷÷÷

مساء اليوم المنتظر 🌷🌹
اليوم ستعلن الدنيا طربا لموعد زفافهم 💑
فتكون الرجولة فيه أخلاق قبل أن تكون ألقاب👑
والأنوثة حياء قبل أن تكون أزياء 💎
🌹🌹🌹🌹🌹🌹🌹🌹🌹🌹🌹🌹🌹

مسرة/ بعدنا ما خلصنا عشانه
وسوار كامت تسويلها كاستر
وأحنا بقينا كاعدات ناكل ونسولف
اني هوايه احب هاي اللمه
شايفين بنهايه الوجبة من نخلص الاكل
والواحد مابي حيل بعد يكوم يلم المواعين
وتبقى نعمة قليله بالمواعين
والمجموعين على الصينيه يبدون ينكشون بيها
حتى تخلص
وهنا تطلع السوالف من جوة الكاع ونطول بكعدتنا
بحجة كاعد نتغدة لو نتعشا وتاخذنا السوالف
يمكن هاي سالفة بكل بيت عراقي تصير

والولد رجعوا يلعبون ورق
وكلساع واحد بيهم كال /وين جاي ؟؟
شنو تاكلن سمج خفن ايدجن نريد جاي

خالتي كالتلهم / شبيكم طار الجاي خو ما طار
واحدكم تعشا وتبن كرشه وخبصنه
انطونه عطوة نتهنا بالنعمة

سهى رادت تكوم تحضرلهم الجاي
بس خالتي كالتلها / اكعدي اني رايحه للمطبخ
اشوف البنيه لا تنخلس طويرق لحكها

همام صاح وراها / يوم عوفيهم براحتهم
شكو ركضتي وراهم

خالتي من تمشي تدعبل تميل هيج وهيج بمشيتها 
جاوبته وهي طالعه / ((طبووني 😜)) يحب الحلا
أخاف ياكل البنيه

منتصر كال / يلا بويه فضنها وكومن
لا تستغلن الحجيه شوفنها بالكوة تتحرك

عاد نهى كامت اول وحدة وأحنا كمنا وراها
ورتبنا كلشي بمكانه
والولد شربوا الجاي وبعدهم يلعبون
وسهى وزعتلنا كاستر

اني رحت وكعدت شويه بالمرجوحة
صح الجو بارد بس احب اكعد واهتز بيها
وبالاخص بليل أحس السماء تصير صافيه
واتخيلها تنفتح بيها ابواب جبيره
وتسمعنا شنو نحجي وشنو نتمنى ،
يعني تخيلات مال افلام الكارتون
بس حلو الواحد من يعيشها

أجتني سهى وكالت / اكلج خيه اذا ماعندج شي
نصعد فوك نعدل ونرتب الملابس بغرفتج
وغرفه اختج ، وانتي بعد سفطي ورتبي غراضج
على ايدج
واني والبنات نساعدج

كمت وياها وبلشنا اول شي ترتيب بغرفه طارق
شايفين بعد هوسه الترتيب وتسفيط الغراض
شكد تاخذ وكت ،
وبالاخص غرف الاخشاب جديدة
و يرادلها مسح وتلميع ،
وغراض وملابس طارق جانن بغرفة همام مخليهن
صار علينا تعب تعبين لان رتبنه غرفه طارق وهمام
و البنات سهى ونهى ولمى وساهرة شاطرات
ويانه أساور بعد،، بقت بس سوار جوة يم خالتي

بعدها رحنا الغرفتي وهم تعديل وترتيب
والبنات سهى ونهى نصبن عليه ،
وهاي ترفع وهذيج تكبس
يالله من حجيهن اني خجلت ومتت من المستحه
حتى ولا اجاوبهن ، بس ابتسم واحرك براسي اي