بنات سهر

ح ١٢

#فراقد حسن علي........

#ألحلقة الثانيه عشر........

#بنات سهر ...................
÷÷÷÷÷÷÷÷÷÷÷÷÷÷÷÷÷

نجلس والحزن يملأ قلوبنا،
يطفئ جمال الدنيا ومحاسنها،
فتجد آلامنا قد مَلئت حياتنا وكستها باللّون الأسود،
غير قادرين على النسيان أوتجاوز كلّ ما مررنا به، فالذكريات الحزينة منغرسة في قلوبنا تأبى النسيان، تؤلمنا لحدّ الموت،
تشعرنا بالوحدة
وتزيل كلّ شعاع نور الذي قد يغير حالنا....
===================

مسرة / اني سمعت جواب لمى
لو أحس سجينه ونامت بقلبي
أختنكت وأنعصرت روحي
أني الأعرفة منتصر مطلق زوجته
ام تبارك وحسين بيناتهم مشاكل وما متفاهمين

بس ساهرة هاي المراة الجبيره تكون زوجته
ابد ما توقعتها....

بحيث عفت لمى وحدها بالمطبخ
ورحت كعدت بره بالحديقة
وبقت روحي وعقلي يهتزن ويه هزة ألمرجوحة
أنوب لزمتني البجيه
اني بقيت متعجبه على روحي
شبيه ؟؟
وليش هيج غثني جواب لمى ؟؟
وحتى لو ساهرة زوجة منتصر
اني شبيه هيج أحتركت روحي
وأنعصر قلبي !!!

هنا وتجيني سوار تبجي
جريت نفس بقهر وحسره وسألتها / شبيج ؟؟

سوار / مااعرف شبيه جسمي فرد نوب تعبان
ومعدتي بس تكلب
ومااشتهي الاكل
وكمت أحب بس الحموضة

ليش ما بيوم بعد أربعين ماما
بليل أجوي جماعة منتصر يغيروله جو
هو صار زين بس مايكدر يطلع من البيت
الخطار هواية يجوهم
وبعد ما لمى ضيفتهم
كلهم الشباب كعدوا بالاستقبال

وأحنا كعدنا نتفرج مسلسل عربي
اني ولمى وساهرة وأمها وخالتي
وأتذكر جان اسم المسلسل (( بيت جدي ))
كلش حلوة قصتها اجتماعيه

خوات منتصر الباقيات راحن لبيوتهن
وفتكينه من هاي هدى الوكحة
فلشت روحي من وره حجيها اليغث
حتى ما تناديلي باأسمي
تناديني ام عيون العمي
لو العار
لو بت الدايحة
وبعد هوايه حجي وكلمات عيب وماصخة

وأساور دخلت تسبح
شكد ماما توبتها من سبح بليل بس مايفيد وياها
تكلها تتمرضين واعظامج تكوم توجعج
واخاف عليج من الشغلات الروحانية
بس هي ما يفيد وياها ، دوم تسبح بليل
وتلف راسها وتنام

سألت لمى على مسره كالت / ضايجة
وراحت كعدت بالمرجوحة
هسه اروح اشوف شبيها

أني رحت جبت نارنجيه وكعدت احفر بيها 
سويتها طاسه ورشيت عليها ملح
وبديت أكلها بروحي مو بحلكي
هلكد مااشتهي الحموضة

سألتني أم ساهرة/ يمه ياأم عيون الحلوة
شوكت أخير مره أجتج العاده ؟!

أني ماافتهمت شنو كلمه ألعاده
جاوبتها واني اكل بالنارنجية وأمطك من الحموضة
/ خاله شنو ألعادة مااعرفها ؟