بنات سهر

تكمله ح ١٨

#فراقد-حسن-علي

#ألحلقة-الثامنه-عشر...(تكملة). (صباح الخيرات )

#بنات-سهر
÷÷÷÷÷÷÷÷÷÷÷÷÷÷÷÷÷

يا لجبروج .. يالقنعوج
وما كملتي عشرينج ...
غصب زفوج.....
كرهت الشيخ من كلج
ولج ترضين
وقبلتي !!!
جا كتيلة اريد ويه الولف زفتي
ما شايل حقد ل أبليس
بس شايل حقد عالناس
ذولة الركصو بعرسج
=================

بقى طارق يسب ويغلط على بنيه اسمها علياء
ووكف السياره على صفحة وطفى الاغنيه
رجع تلفونه دك هو أبد ما جاوب

هنا وكفت باقي السيارات يم سيارتنه
هو بسرعة كام يمسح بوجه وضم دموعه
كالي / غطي وجهج زين اجوي ربعي
و بسرعة فتح باب السيارة ونزل
واجوي ولد عمه يمه ونزلوا الولد الباقين بالشارع
وكاموا يركصون

شويه وصعد وكملنا الطريق
كالي / حبابه لا تكولين لواحد عن الصار
تعذريني خوفتج
بس الواحد مرات من يمر بموقف معين
كلمه تخلي يتسودن ويفقد اعصابه

وراها لا حاجاني ولا حاجيته
لحد ما وصلنا للتصوير
منتصر ومسره نزلوا قبلنا صوروا
هو ما قبل ننزل
حتى من أجوي البنات خواته
وباقي الشباب ولد عمه ما قبل انزل
كاللهم / عوفوها بردانه لا تتمرض
من يطلعون الجماعه ننزل
وصدك بقينا بالسيارة كاعدين لحد ما خلصوا تصوير
منتصر ومسره وطلعت سياره زفتهم قبلنا

نزلتني بيداء مرت عمنا حاتم وسهى
وهو خبصهن غطنها وسترنها
لا ترفعن البدله لا تشلح
بيداء كالتله / يمعود افتهمنا
اكلت روسنا شبيك مسودن ، وسودنت البت وياك

دخلنا للتصوير وانوب اليصور طلع رجال
وهو تخبل ماقبل
-
وهمام وماجد
يكلوله / يمعود البنيه لابسه حجاب
شبيك صور وخلصنا
-
وهو يكلهم /الكو.... مو كاتب التصوير كادر نسائي
-
الولد كالوله / البنيه المصوره ماجايه
-
وماجد كاله / صوجك انت ومنتصر
من البارحة كنالكم خل نروح نحجز ،
كلتوا عليمن الشارع متروس قاعات تصوير
يالله العناد تارس روسكم .
-
وبالشافعات يلا صورنا
والصراحه جانت لحظات مخبوطة خوف وخجل وفرح

رجعنا للبيت وهو صدك تخبل
خلا الولد يفرغون الشارع من الكراسي
ودخل السياره الباب الاستقبال

ومن نزلت رجال ذبح ديج جوة رجليه
ولمى خلت نجانه مي كالت /اكلبيها
اني هم دفرتها
وهو دخلني بس كعدني وطلع
من صدك الاستقبال صاير هوووسه

كعدت مقابيل مسره
ملتمات عليها البنات مااعرفت شبيها ....!!

خالتي كامت تصلي على النبي وال البيت بصوت عالي
وسهى جابت المبخرة واجت بخرتني
وام ساهره تصيح / صلن على محمد شبيجن
انطن مجال للبنات يتنفسن

اجتني أساور طالعه كشخه تخبل
لابسه فستان لونه جوزي فاتح ولابسه شال
ومخليه مكياج خفيف
خطيه جابتلي عصير وكيكه
كالت اكلي / ظل بالي عليج
مازن خاف عليج من وكفتوا بنص الشارع
كال / بس لا تخربطت
ودك على طارق بس ما جاوبه