بنات سهر

ح ١٥

#فراقد-حسن-علي...........

#ألحلقة-الخامسة-عشر....( صباح البركة بذكر الصلاة على محمد وعلى أله وصحبه وسلم 🌹🌹🌹)

#بنات-سهر ....................
÷÷÷÷÷÷÷÷÷÷÷÷÷÷÷÷÷÷

يا تـرفه ، يا اخـت الشـذر
يـا ماي ، يا تــرچيه
تفضح لمعتـچ و السلف
خطـابه اجوكم عـ اللمع
عـرفوچ خـوش بنـية
===================

و كملت ساهرة قصة بنت علي ألجبيرة
بدموع مطاره ، وغصة حزن
وكالت / و البنيه الجبيره المسكينه
مرت بظروف صحيه كلش صعبه
وبسبب الفعل الشنيع صار عدها أستغفر الله
بذره حرام ،وبسبب هذا  الحمل أدمرت حياتها ....

ولا هي ولا أهلها جانوا يعرفون هي حامل
اصلا محد مخلي على باله هي حامل
لان أطمئنوا من سووا تحليل وماكو حمل
وجان تنزل عليها العادة بس قليله
فاابد محد حسب حساب الهذا الموضوع

بس هي المسكينه جانت دوم تشكي
من قوة الألم والمغص
ومن راجعوا بيها للدكتورة النسائيه
طلع عدها التهابات كلش قويه ،،
صارت بسبب العمليه التجميلية
السوتها الها الدكتوره بسبب فعل الاغتصاب
وأمتدت الالتهابات من الخياط الخارجي ،،
لعنق الرحم ،،للرحم والمبايض ،
وبتالي الالتهاب صاب كل الحوض

وأنوب كالتلها الدكتوره الذكية/ اكو اكياس دموية صغيره متواجده بداخل الرحم
اكيد صارت بسبب الالتهابات
وماتخوف على العلاج تختفي وتروح

فبقت تقريبا من شهرين الى ثلاث اشهر
تعاني من المغص والألم
فحسبالها هي وأهلها من الالتهابات
وتشرب بهل العلاج وماكو كل فايده
لحد مابيوم صار عدها نزف كلش قوي
وألم فضيع سببلها فقدان الوعي

ومن وعت على زمانها الظالم
لكت مسويلها عمليه وشايلين رحمها ومبايضها
وهي بعدها بعز شبابها

طلع عدها الله يكفيجن الشر حمل مو زين
يسمونه الحمل العنقودي
وياه هذني الأكياس الدمويه
وبسبب التشخيص والعلاج الغلط
أنفجرن أبطنها الأكياس سولها تلوث بالرحم

هنا أضطر الجراح يشيل رحمها ومبايضها
لان شايف اكو بدايه أنسجة سرطانية
متواجده على جدران الرحم
فنقذ حياتها وصحتها من انتشار السرطان باقي جسمها
وخلصها من العلاج بالأدوية الكيمياوية لباقي عمرها
صح جانت الخطوة قاسيه او الصحيحه
بس الحمدلله نجحت عمليتها ومصار عدها مضاعفات

وبقت بعد العملية المره تتعالج
من الالتهابات يعني المرض جسدي
وتتعالج من المرض النفسي 
يعني أدمرت صحتها ونفسيتها

فد يوم وجان تصفن ويه روحها وتكول /
ليش أنا جبانه وما كتلت روحي مثل أختي
ليش هي أشجع مني وخلصت نفسها من الم الدنيا الحقيره ؟؟!!