| يا تعبي العشگته | ' باللهجة العراقية '

| البارت الثاني عشر |

#يا تعبي العشگته
#بقلم الراوية
#البارت الثاني عشر

بسم الله الرحمن الرحيم

| صلوا على النبي ⁦♥️⁩ |

.

عماد..

ظـلت لين ادحگلي باستغراب.. بعدها ما وعت شنو گلت
اشرت على نفسـها و گال

- أني ؟

- لا امچ..تدرين بيها اربعينيه صاگه
عجل منو غير انتي

رمشت بعيونها و تقدمت عليه و گالت

- و بله أني وجه وحده مال زواج

كتفت ايديه و گلت بهدوء

- ترا ما گاعد اگلچ وافقي..هو صح الولد ماكو منو و اخلاقو تشهدلو بس يظل الرأي رايچ

گعدت بصفي و دحگتلي و هي تضيق عيونها گبل لا تگول

- عجل مو موافقة

- فكري على الأقل..ايوب انسان ما يتعوض

زفرت و هي تجاوبني و حواجبها تعگدهن

- ما اريد افكر..اريد اكمل دراستي و ادخل جامعة
توي فتت الـ20 شفت من الدنيا

و بسخرية گلت و أني اضربها على راسها من ورا

- ام كفشه تـفكر بمستقبلها
بله اخر مرة كمشتي كتاب شـوكت ؟ فوگاها تريد تفوت جامعة

- ترا والله لو اريد احط بالي وب الدراسة
الا اجيب طب

- الله اكبر..طب مره وحده ؟
ترا طيبة الچانت تاكل الكتاب اكل ما جابت طـب..تا انتي من اكسل الطالبات بالمدرسة تجيبنو

گلبت عيونها و گالت بملل

- هسا چنا نحچي بموضوع الزواج..عوف الدراسة وحدها
اني مو موافقة

- ابد ابد ؟

ابتسمتلي و هي تگول

- ابد ابد

تنهدت و ظلين ادحگلها و گلت بهدوء

- خوش مثل ما تريدين

گامت و هي تريد تكمل تعزيل المطبخ
أني گمت و فتت للصالة..و گعدت هناك افكر بطلب ايوب.. بصراحة فاجئني.. و ما حبيت اردو
رغم اعرف جواب لين مسبقاً..

من تذكرت لين جريت حسرة على وضعها..شگد تحاول تكون قوية بس ما تگدر
اعرف انو سلطان متخلل بيها و ساكن گلبها من زمـان
اريد امنعها او حتى احچي و اعترض بس ما اگدر..

اعرف هالشي مو بيـدها..لأن لا گلبنا و لا مشاعرنا عمرها صارت النا

دحگت للتـلفون و جيت اتصل بـ ابن عمو
أسال عليه..بس شلت هالفكرة من رأسي
تنهدت من تذكرت شصار البارحه صح شوه وجهي
بس على الأقل خليتو يصحى شوية على نفسـو
بس شيصحى و هو مسحور و حتى ما يفرق بين الخطأ و الصواب..