| يا تعبي العشگته | ' باللهجة العراقية '

| البارت الرابع عشر |

#يا تعبي العشگته
#بقلم الراوية
#البارت الرابع عشر

بسم الله الرحمن الرحيم

| صلوا على النبي ⁦♥️⁩ |

.

لين..

طلعنا اني و روان من الفرع رايحـين للمدرسة
و لغوة روان موتتني خايفة لا ما تجـاوب بالامتحان
امـا اني ولا شايله هـم.. لان اذا قريت أو لا راح ارسب بهالامتحان ما طول ست شـفاء علينا

والله هاي داء مرض خبيث مو شفـاء
انـدارينا على صوت سيارة قربت منـا..چـانت سيارة سلطان النزل الجـام و گـال

- اصعـدن تا اوصلچـن

ترددت اصعد بـس گلت مالي واهـس اروح مشي
حرك السيـارة و اني چنت صـاعدة ورا عدل
صـافنه على كتـفو لابس قميص ابيض

چانت ازدحامات و طولنا يلا وصلنا..كل هذا و محـد حچه حرف واحـد..
من طبگ السيارة گـدام المدرسة شلت جـطنتي و حدرت سديت الباب و وگفـت يم الـجام و گـلت و أني اشر على كتـفو

- اكـو طگعه زرگه يمكن حبر على چتفك
الأيمن

رفع تك حاجب و اندار نزل عيونو و تنهد
و گـال موجه كلامو لـ روان الحدرت همين

- الـبارحه انتي كـويتي القميص موو

- ها..اي

حچتها و گالت و هي تجـر بيدي

- يلا لين تاخرنا

ضحكت و گـلت و أني اميل عليها

- تخـافين من الرزلة ؟
شـمسويه يولي

- چنت اكوي بالـقميص و ما منـتبه لقوطية الحبر على الميز و شوية انطش بس ما حسبالي مبين

- لأنـچ ثـوله

حچيتـها و فتنا للمدرسة
الحمدلله ما امتحنا لان ست شفـاء ما موجوده
طلعنا للسـاحه و گمت لأول مرة اراجع بالكتـب..و الشمس تضرب بيـنا
و هوسة البـنات و ضحكهن و شقاهن..ما احب تجمعات البـنات إطلاقاً و خصوصاً بالمدرسة

شفت هديـل من بعيد واگفة و هي مرتچيه على الحايط و يمـها امـاني..رافعه رجليها و سانـدتها على الحايط و تنورتها گـصيرة و گـصيفه

ذبيت الكتاب بالجنطه و تأففت
و روان گالت

- شبيچ تتأففين ؟

- ليش ما اتأفف و الحموضه گدامي صارلها ساعة واگفـة

گامـت تضحك روان من عرفت قصدي دحـگتلها و گلت باستهزاء

- اتذكر من چان اخوچ مربـوط وي اختها ما تستجريـن تضحكين عليها..لا هسا امنتي ما تصل الاخبار

برطمت و گـالت بعتب

- ترا ما اخاف منها ؟

- اني گلت أنتي تخافين منها