| يا تعبي العشگته | ' باللهجة العراقية '

| البارت الثامن و العشرون |

#يا تعبي العشگته
#بقلم الراوية
#البارت الثامن و العشرون

بسم الله الرحمن الرحيم

| صلوا على النبي ⁦♥️⁩ |

.

لين..

من سمعـت صوت امي
ما ادري شلـون ركضت للصالة و گـدامي سلطان
من فـتنا لگيت امي حاظنه عماد
و هو يريد يوخرها

احس گلبي وگع و ركضت عليه..خشمـو طـاگ دم
و يصيح بيها
ما بيـه شي

انـاملي رجـفت و اني اروح باتجاهو
طيبة گعدت تمسح بانفو و گامت جابتلو مي

سلطـان گال ضغطو صعد
و صـحيح من جابت طيبة جهاز الضغط و شيكو سلطان طلع ضغطو صاعـد..

والله حقو من القهـر..هيچ يشوف حلالـو و تعب سنينو يصير مجرد رماد

راحـو بيت خالتـي
و هو طب للغرفة...بس ظليت شايله هـمو
امي خطية كل شوية تروح تـشوفو خوما بي شي
و اني همين..بالـ2 و نص گعدت اريد ادخل للحمـام

من طلعت من الغرفـة جفلت من شفتو بالصالة گاعد
فتت و اني امسح بوجهي
ادحگ للنفاضه مليانه گطـوف جگاير

- ما نمـت

هز راسو بـلا و اني رحت گـعدت يمو

- توكل على الله عماد..الحمدلله انت ما چنت موجود بوكت الحريق

- الحمدلله

حچاها بـصوت ناصي
و اني حطيت ايدي على كتفو و اردفت بحنية

- المـهم انت بخير و يمنا
المحل و كلشي يتـعوض بس انت لا

صد عـلية و ابتسم ابـتسامة مذبوحه
و بغصة گال و هو يخـلي الجگاره بين شفايفو

- المـصايب من تگع على راسي
تجيني بالجملة

- رب العالمين هيچ كـاتب
الحمدلله المحل الك ملك..لو ايجار همين تعال ادفع تعويضات و خسائر..

- هـم صح..

نطق هالكـلمتين و صد عليه و اردف

- روحـي نامي الوكت متأخر

- و انت؟

- عود اصلي و انام..لا تشـيلين همي

- عماد ترا همـك هو همي

حچيتها بخنگـه و اني احاول ما ادحگ عليه
اخـاف ابچي
و اقهرو بالزايد
گمت و مسيت عليه و رجعت لـغرفتي
و همين صـاحبني الارق
ادحگ لـطيبة اگول نيالها گدرت تغفى..

مرت اربعة ايـام و عماد بدا يشتغـل بالمحل
ما اجر عمـال تا ينضفونو گال همين تعال ادفعـلهم و اني يلا بالفلـس
اخذ ويا يوسف..رغم گـلتلو هالولد مو مال هيچ شغـل
بس گال اعلمـو..

اول يـوم للقريب المغرب جا هو و يوسف عبارة عن رماد و مـصخمين
الحريق چـان بسبب عطب بالكهرباء ما منتـبه الو و على اثرو طگت جوزة المحل و انكل الاخضر و اليـابس