شمه وطارق

بارت13

#شمه وطارق
#بارت 13
#Zahra'a Al-mayali

ام طارق: شكو سالم شصار احجججي

ابو طارق : اتصلو بيه يكولون طارق متصوب وناقلي للمستشفى
شمه : من سمعت طارق تصوب احس الدنيا وكفت والدموع كامت تنزل عشره عشره .. وعمتي والبنات هم كامن يبجن
- عزززه بعيني ... شوكت اتصاوب وشلوزه هسه
- مااعرف رايح للمستشفى وفهم منهم هناك
- اروح وياك سالم
- يله لعد بسرعه البسي خلي نروح
ربى : بابا آني هم اريد اروح وياكم .. تحجي وهي تبجي
شمه : اي عمي وآنه هم
- لا بابا وين تروحن ... المستشفى هسه مكلوبه ناس ...وين اخليجن هتاك .. محد يروح بس آني وامه

- صعدو بدلو ونزلو .. رادو يروحون وربى لحكتهم

- بابا فدوه طمنه على طارق اول ماتوصل
- اي بابا اي .. يحجي  وهو يصعد بالسياره ... شغلو السياره وراحو .. وآنه وربى اتكابلنه بالطرمه وكمنه نبجي ثنيناتنه ... ورغده تبجي ويانه وتحاول تهدينه ... تالي كومتنه وطببتنه

مرن ساعتين وعمي مااتصل ... واحنه كلوبنه خلصت من الغهر .. وربى تدك عليه بس مايشيله ... شويه وجان يرد عليهه هي بسرعه سألته

- بابا شونه طارق ... فدوه كول ....
♡♡♡♡♡♡♡♡♡♡♡♡♡♡♡♡♡♡♡♡♡♡

رأفت : مرن 3 اشهر ورغده موجوده بالبيت ونوعا ما احس نفسي اتعودت على وجودهه بحياتي ... واهتمامهه بيه وبلبسي .. واكتشفت انهه عكس شمه .. صح هي هم خجوله بس ا تسولف وتشاقى .. وعدهه اهم شيئ كرشهه تشبعه

بس مع ذلك اني بعدني مستمر بعلاقتي وي لبنى ... بس هي صارلهه اسبوع احسهه مو على بعضهه وجاي تتهرب مني .. وكل ماتصل بيهه تحجي وياي شويه .. وراهه تكلي تريد اروح نعسانه او ماما صاحتني ... وتغلق النت وتروح .. بس وره فد ربع ساعه الكاهه ترجع نشطه .. ادزلهه رسائل يوصلن بس متقراهن .. ومن اسألهه ثاني يوم تكول التليفون مو عندي جان عد اختي .. وآني جنت نايمه وتسويلهه مشكله وتكوم تصيح انت تشك بيه وآني القبلت ابقى وياك مع انك خنتني واتزوجت .. فاضطر اصالحهه .. اروح اجيبلهه هديه .. اواخذهه الشي مكاز راقي لان اعرفهه تحب هالسوالف

اليوم جنت بالشغل .. ودك عليه ابويه..  رديت كالي طارق متصوب .. وناقلي للمستشفى ... ذبيت البيدي بسرعه ورحت للمدير اخذت الاذن منه وطلعت بسرعه وتوجهت للمستشفى واني ادعي الطارق مايصيرله شيئ ... لان هو مو بس اخوي لاهو ابوي هم .. شكد من جنه  جان يضرب الجهال اذا واحد أذاني .. ويجي ابوي يضربه لان يضربهم .. وهو يكوم يصيح هم يضربون رأفت .. واليمس رأفت آني اكطعه

وصلت للمستشفى نزلت بسرعه سألت دلوني على الغرفه ... وصلت وجانت هوسه بباب غرفته ... كومه ظباط جايين .. شفت ماما كاعده عالكرسي مكطعه نفسهه من البجي .. وابويه كاعد بصفهه ومخلي راسه بين ادي ... تقربت عليهم .. وكلت

- ها يابه ... شلون صار طارق
- بعده بابا بغرفه العمليات مطلعو
- امي تقربت عليه وحضنتني .. وتصيح
- رأغت اخوك حيروح من ايدي ... تحجي وتبجي
- اهدي ماما اهدي .. ان شاء الله مراح يصيرله شيئ .. ويطلع بالسلامه