La Cota [WATTYS 2021 WINNER]

Chapter 3

CHAPTER 3

Mayor Billones

* * * * *

Care Billones

Marahan kong iminulat ang aking mata. Malabo pa ang aking paningin kaya hinintay ko munang luminaw iyon. Una ko namang nadama ang isang malambot na bagay sa aking likuran. Parang nakahiga yata ako sa isang kama.

Nang luminaw na ang aking paningin, iginala ko na ito at pinagmasdan ang paligid. Nasa school clinic siguro ako dahil may mga posters dito tungkol sa LCU, gamit pang-ospital at isa pang kama sa tabi ng aking hinihigaang kama. Nangingibabaw rin ang amoy ng gamot dito sa loob. Saglit ko ring napagtanto na, dinala pala ako dito ni Nur kanina. Nakaidlip siguro ako.

"Ma'am Care," bati ni Yaya Buning, naka-suot siya ng light blue na damit at naroon siya sa bandang pintuan. May katandaan na si Yaya dahil matagal na siyang naninilbihan kay Papa-hindi pa ako ipinapanganak. May dala rin siyang tray na may mangkok. Sabaw yata iyon dahil may steam pa akong naaaninag.

"Yaya, kanina pa po kayo nandito?" Inayos ko naman ang upo ko kaso biglang kumirot ang paa ko kaya napangiwi ako. Dumako ang paningin ko roon at nakitang naka-bandage na iyon.

"Oh, 'wag ka munang gumalaw Ma'am Care." Nakapasok na siya rito at inilapag ang tray sa side table.

"Paano po ako makakalakad nito?"

"Magwi-wheel chair ka raw muna Ma'am."

Inalalayan naman ako ni Yaya Buning para makasandal. Umupo naman siya sa gilid ng kama at ipinatong niya ang tray sa binti ko. Nadama ko ang tumatawid na init mula sa mangkok na nakapatong sa tray rito sa aking binti.

"Ma'am, nakatulog ka kanina dahil siguro sa pagod. Kaya habang tulog ka, nilagyan na nila 'yong paa mo ng bandage," paliwanag ni Yaya at saglit na tumingin sa paa ko. "At saka, inayos ko na rin 'yong laman ng bag mo. Nasira pala ang cellphone mong bata ka."

Sumimangot ako at tumango.

"Huwag kang mag-alala. Inayos ko na." Napatango naman ako sa sinabi niya.

"Uhm, Yaya. May lalaki po ba sa labas? Naka-itim na damit." Iniba ko ang usapan naming dalawa.

"Lalaki? Wala akong nakita. May lalaking nurse do'n pero hindi siya naka-suot ng itim na damit. Bakit?"

"Ah. Wala po," aniko at itinuon ko ang pansin sa sabaw na nasa tapat ko.

"May humahabol ba sa 'yo kaya nagkaganyan 'yang paa mo?" Naging seryoso ang mukha ni Yaya.

"Wala po Yaya. 'Yong tinutukoy ko po ay 'yong lalaking nagdala sa 'kin dito," mabagal kong sagot. Inangat ko na ang kutsara para matikman ang sabaw.

"Baka, manliligaw 'yan, a," kantiyaw ni Yaya habang hinihigop ko ang sabaw kaya muntik na akong masamid. Napaubo ako at tila malalagutan na ng hininga kaya tarantang tumayo si Yaya at naghanap ng tubig.