ثلاث دمعات

بارت 27

#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت - 27 -

لسان حال طفوف...
عيوني من شافت عيونك
تعلمت معنى الحنين
وبسمة شفافك يروحيّ
فرحّت گلبي الحزين...!!

لسان حال ناصر
‏شغنيلك يلاگيلك غنوة السبعين،
وادري بغنوة السبعين مو جيلك 💔

لسان حال امنية
عيش اعلـهَ كد الخـلـكٰ
نام اعلـهٰ كد ليلَكَ
صدكني ماكوَ بشر من توكع يشيــلكٰ.،

دارين همست :- ناصر ابتعد عني
فاقد وميسمعني بلحظة طيش وبغباء خارق
گلت كلمة راح ابقى كل عمري متندمة عليها
دارين :- مو رجال اعتبرك ناصر اذا ما ابتعدت..!!
بس حچيت هالكلمة أبتعد عني لبس تشيرتة
وطلع ورگع الباب جفلت ... گمت اعدل بملابسي
وأحس الحرارة صعدت براسي...

أدري كسرت خاطرة وأدري مو هين كلامي
گعدت واتنفس بقوة... شوية ودخل فزيت
من مكاني تجاهلني وحتى مباوع بوجهي
علامات الضيق متدفقة بيه وملامح القهر
ماخذة مأخذ منة... گعد وطلع باكيتة ويدخن
من يسحب نفس من الجگارة ويذبة يتنهد
بتعب ويه كل ذبة نفس يشمرلة تنهيدة...!!

ردت اتدارك الموقف او احجي اي شي المهم
منبقى هيج.... تقربت منة
بهدوء گلت :- ناصر عندي حساسية بصدري
الدخان ديخنگني
النفاضة گدامة سحبها وطفة الجكارة بقوة

بيها وهذا كل وموجهلي نظرة بقيت واگفة
ع راسة رفع راسة عليه باوعلي بقهر بعتب
بتعب وعيونة الناعسة ذبلت أكثر تفاحة آدم
تصعد وتنزل تبلع عبرتة عيونة حمرة يباوعلي
وينصي ويرجع يرفع ويشتت نظراتة مني....

دارين :- هذا الجنيتة من أيدك لتزعل ولا تضوج
ناصر :- بالله العظيم اسألج سؤال وجاوبيني بصراحة
دارين :- اسأل
ناصر :- ركز عيونة بعيوني وهمس بقهر
.. دارين تحبين أحد اكو احد بكلبج شخص أبالچ
تفاجأت من سؤالة وندهشت بنتر گلت :- لا طبعا
شهالسؤال؟ وشمعنى هيج سؤال؟
ناصر :- هز راسه ويهز برجلة تارة وتارة يفرك وجهه
ويتنهد
دارين :- احجي وياك ناصر
ناصر :- عوفيني وحدي

دارين :- مااا مااطلع تريد تطلع انت اطلع
ناصر :- رفع ايده بتحذير لج اشش كااافي
دارين :- لتعيط عليه!
گام من مكانة وگف وياي طول بطول
سحبني من ايدي ارتطمت بصدرة
رفعت راسي اباوعله دنگ وبحدية
ممزوجة بتعب :- شنو الرايدتة بضبط دارين

ببرود گلت :- طلگني
ناصر :- لچ احنا تزوجنا حتى نتطلگ
دارين :- وخر مني ونسولف
ناصر :- امشي حضريلي الملابس راح ارجع لشغلي
دارين :- ليش
ناصر :- وتسألين ليش اجيج مناك ملهوف ومشتعل
عليج وتطفيني ببرودج واهمالج وتسأليني ليش
روحي دارين روحي اذا زاد الحجي مراح نوصل
لنقطة مرضية...

دارين :- ابد مو من حقك تعتب انت الاختاريتني
وتحمل نتيجة اختياراتك
ناصر :- بهمس وهو يقرب وجهه مني وحرارة
نفسة تكفخ يم اذني.. ها والاني بي هسه شيسمونة
ليش ما متحمل انة لو ما مطول خلگ لج انة
اجاهد وانتي ابرد من الثلج
دارين :- تندمت مو؟
ناصر :- أبتعد عني و ابتسم بتهكم..