حين تحلق الفراشات

49

ياقوت..

صار اسبوع متاركه عمتي ويايه بيبي وبابا متاركنا هم يروح ويرجع علينا اليوم انهارت عمتي وتعبت حيل الاخبار ابد مطمن وصار عاشر يوم المرتضى لا اتصال ولا اي خبر عنه
حمواتي هم خطيه يرحن ويرجعن كلنا مخبوصين وحالتنا حاله ومن يطلعن اناشيد الحرب احس كلبي ينخمش وي كل دكه بيهن تاخذ روحي خايفه من روحته هاي حيل
مرتضى اخ عزيز عندي لايوم كسر خاطري لاسمعني كلمة ولا رفضلي طلب مو بس اني جهالي خايفين ع عمهم حقهم مددلهم جانو حايرين بزمزم بنته بس صار يومين قررت زوجته تروح الأهلها وهذا الي خله عمتي تبجي وتخاف اكثر وساعة تلوم بي وبروحها وساعة تدعيله.

بعد فترة من البجي والتعب نامت بالقدرة.. سكتت الجهال وخليت رنا تاخذهم يمها
لزمت مصلاتي صليت ركعتين الوجه الله وظليت ادعي بدعاء المشلول

كملت لميت السجادة وبجيت

هاي طلعه منك مرتضى كلوبنا خلصانه تعوف بنتك ومرتك المن شحصلت اني شحصلو جهال اخوك بهالبلد الطايح رايح اخخخ توني مااعول ارتاح وكلبي يبرد ع جهاد وزمرد وجهالهم تجي تزودني انت
تعرف غلاك عندي اعزاز بمعزته الساكن كلبي خايفه عليك حيل ربي يحرسك ويحميك رضاوي ويعمي العدو عنك يارب

امسح بدموعي وايد تخلت ع كتفي
باوعت

.. ها ماما حبيبي كول

.. ماما لاتسوون هيج لاتخوفوني عمي روضي بطل يطلع منها والله

.. نعرفه بطل الله يحميه ادعي ماما بلكي نحصله ولو دقايق الخاطر بيبي تطمن عليه

.. ادعي والله كلساع ادعي

كعد يمي مديت رجلي وهو اتمدد عليها فدوه الحبيبي طولان وصاير يفهم ومهموم ع عمه

رن فوني فيروز تتصل سألت ع عمتي وهم شكت وضع مؤمن شلون ضايج ومخنوك عليه خاص هو التحق وهم ميحجون وبينهم خلاف صاير ع موضوع طلاق زمرد والمشكلة الصارت قبل فترة
كالت صاير نار ميتحمل الكلمة ومو مرتاح ابد لايكعد لاينام يلوب وما عمي هم كل شويه فاتح موضوع مطفره انوب كملت من عرف جاي شراي للبيت وعمي مصرفه من يمه وكايله بطل ميبيع كلب الدنيا من عرف
حتى عمتي ماكدرت تهديه دار عليهم وكبت عركة وي مرت ابوه لأن دافعت العمي وحتى خواته هالمره صارو ضده اجه صاير نار كلي لتحجين وياي شي الخاطري اطلعي وعوفيني وهاي اني عفته وكلت اتصل بيج وين اروح كلبي احترك

.. ياعمري فيروزه ميخالف انطي العذر خلي يهدأ ويرتاح ورجعي حاجي

.. مالي علاقة بس خل يهدأ لايحاجيني ولااحاجيه

.. ها هههه

ابتسمت حسيتها صايره نار ردت اهديها

.. والله انقهرت عليه وع نفسي اني شعليه ميتحمل يسمع كلمة مني يدري اخاف وانقهر عليه شبي عليه يعني اني اتلافه المغثه الي تغث من صدك ماافكر بيها وياه هو حتى اذا الموضوع مو يمي يغثني يموت ع مغثتي بحجة مقهور