حين تحلق الفراشات

5

يسعد صباحكم..

...

اليلوموني  اعله طيفك من اچلب بيه

گلهم لايلوموني ..!

انا العايش على الله وجية طيوفك
واگول بخير

لو رادو ينشدوني ؟..

..
بعد ماراح مؤمن بقى فتره هناك ظل ع اتصال هو وابويه ع طول شكينه اكو شي بينهم بس ماكو شي واضح النه.. فتره ورجع الدوامه وهم اجانه بيوم بيبي جانت تدور عن صورها مسويتهن قبل سنتين لما راحت عمره وكوه تكول الصور البقت انتي ضميتيها
بالبدايه دورت    ماردت اعاندها رغم متأكده اني مضامه شي لأن اصلا مستحيل اورط نفسي بغراضها

اجه هو وكعد  يم بيبي وبابا بغرفتها  احنه سلمنه عليه وياقوت كالت قطعي من الكيك السويتي وحضري وياه جاي
وزمرد مثل عادتها كاعده تلف بمقدمة شعرها وتقرأ
لو ما الضيف عزيز عليه اشلع عطوبها الي تلفهن واخليها تكوم مجبوره لأن بهذا اليوم هلكت اني هم سويت حملة تنظيف وهم الشطاره صعدت فول عندي وسويت كيك ومعجنات

قطعت الكيك وحضرت الاستكاين
سمعت بيبي صاحت

.. فييروز.. فيروز

ياالله انوب تلفظه وتفتح الفاء تخليني اكره اسمي ضيعت هيبة الاسم يم الغالي اوووف

صبيت الجاي واخذت الصينيه ورحت الهم

.. ها بيبي جيت

نهض من مكانه هو اخذ الصينيه من ايدي اخذتله حصة بيبي وديته يمها وهو وابويه خلاه ع الطبله مقابيلهم

بيبي خاطت الجاي وهي تحرك الخاشوگه غردت

.. كيكتج شيليها تسويلي جالي كتلتني كتل ذيج الليله

غمضت عيني بقلة صبر يارب دخيلك

.. اي بيبي مو انتي كثرتي منها ذاك اليوم اكلي قليل واذا متردين عادي مو زين عليج لتاكليها احسن متتأذين

مدت ايدها بيبي اكلت منها

.. اكلت بعد اشتهيتها العتب عليج انتي من جبتيها ليش تشهيني لو تخافين عليه صدك ماتخليلي من اولها

نصيت صوتي واحتدت نظرات عيوني تزهكني بيبي رغم شكد احاول اتغاضى بس الا تعصبني رغم هذا مااضوج منها بس اضوج من الموقف بساعته

..بيبي تره طلعت روحي لو مجايبتلج متكولين ليش مذكرتيني  صوجي اني اكوم احسن

..وين تكومين طلعي صورتي الضميتيها متعمده مدري تردين تبدليها مدري شتسوين كله حته تخبثين عليه لأن اعلمج الغلط والصح  ومااشجعج ع الغلط بنات اخر وكت طلعي صورتي واذا مبدلتها مخربتها كولي

.. عززه بيبي شبدل احد كلج انتي شاديا وتتبدل وتنباع صورتج

كمت بعد مابابا نقذني وكلي روحي الخواتج يردوج اني متأكده هو راد يخلصني يعرف افلامنا والنهايات اذا تبقى بدون تدخل تصير ملغومه