حين تحلق الفراشات

11

صباح الخير حبايب البارت تعويض عن بارتين
.....

علِّمني
إذا مر ليلي من دونك
شسوي و ما تجي ببالي ؟ ..
ٰ.....

ضجت حيل من سمعته حاجه امه هيج رحت بغرفتي
اراجع نفسي اني شعليه بيهم هم عائله بس مشكلتي مااكدر اسكت ع الخطأ كوه سكتت وماعقبت يعني صراخ مرت ابوو مبين الموضوع مو سهل وحته خواته يصيحون
شنو مشكلتهم ذوله حتى لو يضوج منها خل يعتبرها غريبه او جاره ع الاقل شلون غيرته تسمحله
سمعت صوت الجرس طلع هو اسمع خواته يحاجنه فاتن وهو كلهن تعالن اتعشن ويانه وظل يستسفر منهن كالن اله مشكله بينهم مثل كل مره خلافات
مااطرقن للتفاصيل وهو مالح عليهن
طلعت سلمت عليهن لان عيب وسويت جاي الهم بعد العشه عمتي اخذته تصب وهو بقى يحجي وي ميناس اخته الجبيره وحنين وبراء يضحكن ع سوالفهم لأن هي غيرت الموضوع وظلت تشاقي اخوها الظاهر متحب تنطي بأمها
مهتملي هو ابد
حسيت روحي غريبه وكاعده بالمكان الغلط
رجعت الغرفتي خابرت زمرد ماردت
اتصلت بياقوت حاجتني ويمها هوسة جهالها وجهال مؤيد تحجي عليهم وتسكتهم وتكمل كلامها ويايه ضحكتني ع سوالف ماس وعمها شلون تشاكس عليهم
بعدها نهيت الاتصال واخذت ملابسي ورحت اسبح
طلعت نشفت شعري وكعدت ارتب نفسي واتمكيج فات هو اخذ باكيت الجكاير َجداحته وطلع
عمتي صاحتني يمهم استحيت ابقى رحت
بس مخنوكه حيل لكيته طالع عدلت المطبخ ورجعت يمهن
ويم عمه مالي واهس كلشي
بس ميناس ظلت تحجي وي عمه ويضحكن ويسولفن وشاركوني الحديث حجت عن الزفه مالتنه واجوائها لكبت نفسي مشاركتهه اغلب المواضيع
شويه واندكت الباب صوت امهن تصيحهن سلمن وطلعن وهو بعده مراجع
عمتي عدها دوام كالت راح انام
بقيت وحدي بغرفتي ضايجه وافكر بتصرفاته
انفتحت الباب البره شويه واسمع خطواته تتنقل بالبيت فات للغرفه سويت نفسي مو مهتمه لا زعلانه ولا راضيه
هو عيونه عليه متحركت من مكاني
فتح التلفزيون واجه اتمدد يمي

.. تعاي هنا

حجاها وسحبني عليه جاوبته ابرود وبعدته بخفه

.. مرتاحه هيج

.. انوب انتي زعلانه فيروزه حبيبه خلينه نتفق علاقتي بأبوي وعائلته لاتدخلين بيها لأن ماتعرفين شي وشغله ثانيه هالاسلوب لايلوكلج ولايلوكلي انتي تعلميني ع الصح مثلا تعلميني شلون اتصرف فرضا غلطان وتحبين توجهيني مو بهاي الطريقه ولا كدام احد حتى لو امي وهسه تعاي ابوسج وبعد لاتعيدينها

.. اني مو قصدي ولا قصة اعلمك الموضوع مو مثل ماانت فاهم واسفه بعد مااتدخل بشي فعلا اني غلطانه

.. لاتضوجين تفهمين كلشي بعدين

.. ماضايجه عادي

..تعاي بحضني ونشوف ضايجه بعدج لا لا

سحبني عليه واندار عليه ثبت رجليني برجلينه ارتكه ع ايده وبالثانيه عدل شعري

.. وشبيج عاكفه النونه اضحكي حتى اصدك