اسكربتات

اسكربت¹¹

= ممكن تبطل تمشي ورايا!
- لأ مش هبطل.
= اللي هو إزاي يعني؟
- وافقي إنك تتجوزيني وأنا هبطل أمشي وراكِ.
= أفندم؟ أتجوزك وإنت؟ عبيط إنت صح!
- لأ مش عبيط ولمّي الدور بقى ووافقي.
= مسيحي بيطلب من مسلمة تتجوزه... شيء فظيع بجد، أولًا كدا أنا وإنت من عاشر المستحيلات إننا نتجوز، ثانيًا أنا مش بحبك ولا عمري هحبك ومتمشيش ورايا تاني عشان ميحصلش مشاكل، إحنا جيران وبينا عيش وملح وبعملتك دي هتعمل مشاكل فلمّ نفسك ومتمشيش ورايا.
- أنا بحبك يا إســــراء وحبك مش بيقل خالص بالعكس دا بيزيد ومش عارف ليه حبيتك أصلًا وإزاي!
= كلامك مش هيفيد بحاجة وأحسنلك متحبنيش أساسًا ومتمشيش ورايا.
- مستحيل.
= أنا ماشية لإن الكلام معاك زي قلّته.
ــــــــــــــــــــــــــــــــــــــــــــــــــــــــــــــــــــــــــــــ
"عند إدورد"
- يامينا أنا بحبها وعايز أتجوزها بس إزاي بقى مش عارف بأمانة.
- يعني ملقتش غير مسلمة وتحبها؟ عندك مسيحيين كتير ومزز وجامدين.
- مش حكاية جمدان أو حلاوة الحكاية حكاية حب الروح.. أنا حبيت روحها مش شكلها بعيدًا أصلًا إن هي جميلة الشكل والروح.
- انساها لإن مستحيل يتم الجواز دا.
- عمري ما هنساها وهتجوزها وإنت مالك ياعم بقى ولا عايز تتخانق معايا؟
بعصبية- عايز تتخانق! شكلك كدا البت خليتك تخرّف وخلاص بقيت عبيط كليًا، إزاي هتتجوز مسلمة يعني يا أعبط واحد شوفته، جتك القرف في زوقك.
- امشي ياض إنت بدل ما أخلي يومك زي وشك كدا، وانسى إن ليك صاحب اسمه زفت.
" مشي ووعد نفسه إن هينساه لإنه عايز يتجوز مسلمة وبقى مش صاحبه زي زمان"
- ليه محدش فاهمني، بحبها يابشر... بحبها، أنا ليه كله فاكر إني بخرّف أو أعبّط بالكلام، مالها يعني المسلمة دي مش بشر زينا بردو ولا إيه، عندي أمل إنها تتجوزني لكن لازم أبقى مسلم عشان أتجوزها لكن أهلي........
ـــــــــــــــــــــــــــــــــــــــــــــــــــــــــــــــــــــــــــ
" عند إســــراء"
= بيقول إنه بيحبني وكمان عايز يتجوزني وحاجة في منتهى الهبل بجد.
- ما يمكن يتجوزك فعلا.
= يتجوز مين ياما إنتِ؟ إنتِ عبيطة يعني أتجوز مسيحي! أغضب ربنا عشان واحد مسيحي؟ بعيدًا إني بحترم دينهم بس مستحيل... ولا مستحيل أوافق و أهلي من تاسع المستحيلات يوافقوا ولا حد هيوافق خالص و استحالة أهله يوافقه أصلًا، فكك من الهبل دا وادخلي نامي.
- ماشي يا إســــراء بس إنتِ ممكن تحبيه.
= حبك برص وعشرة خرس يا قادر ياكريم.
- هههه، أنا داخلة أنام.
= هيجننوني بجد، هصلي العشاء وهدخل أنام لاحسن خلاص عقلي هيطير.
"في الصباح"
- خدي بالك من نفسك يا إســــراء دا إنتِ رايحة حتة مش كويسة ومعرفش ليه جبرك على كدا.
= هو المدير عايز يشوف الورق الخاص بالشغل قبل ما يروح الشركة فأنا مالي بقى ولا عيزاني أترفد يعني ههه.
- ربنا يحميكِ، يلا في رعاية الله.
" أثناء ما إسراء ماشية في طريقها لقيت أشخاص غريبين جدا وشكلهم قطاع سكك فخافت من جواها لكن ظهرت عكس كدا"
# مالك ياقمر ماشي لوحدك ليه؟
#² متقلعي الطرحة دي كدا ورينا شعرك.
# تعالي معانا ليلة واحنا هنظبّطك.
- تعالوا إنتوا معايا ليلة وأنا هظبطكم جامد.
# هههه ألا مين اللي بيتكلم دا.
- أنا يا حيلتها.
" بدأ إدورد يلكمهم ويضربهم ضربًا عنيفًا حتى خافوا وجروا"
= مكنش لازم الضرب دا كله.
- أشوف المنظر دا وأشوفك واقفة مع البهايم دي وأسكت!
= سلام.
" قررت إني هتجاهله تمامًا لإن كدا مينفعش، روحت للمدير وعجبه الصفقة جدًا بعد ما درسها كويس وعرضها على العملاء المميزين عجبتهم فكرتي وفرحت جدًا وبقيت شخص مهم جدًا في الشركة، عملنا الصفقة ونجحت والشركة جالها ربح كتير جدًا وكمان بقيت أفضل شركة في السوق"
- شكرا جدًا جدًا لحضرتك، الفضل كله يرجعلك والله.
= متشكرنيش حضرتك، دا وجبي.
- مرتبك زاد أربع أضعاف وهتبقي شخص معتمد عليه في الشركة.
بفرحة= شكرًا لحضرتك.
" روّحت وأنا مبسوطة جدًا وقولت لماما على الخبر فرحت جامد وقررت تفرّق حاجة بالمناسبة دي"
= بيبسي؟
- آه هنفرق على الجيران كلهم.
= اشطا، هاتِ البيبسي يا سما وتعالي معايا.
" فرّقنا أنا وأختي سما على كل الجيران ولسة باقي بيت أُم إدورد"
- مين بيخبّط.
= أنا إســــراء ياطنط.
- اتفضلي يا إسراء.
"في الوقت دا لقيت إدورد حزين وواقف ورا أمه وباصص ليا ف اتجاهلته"
= اتفضلي يا طنط البيبسي دي بمناسبة إني اترقيت في الشركة.
- بأمانة فرحتلك من كل قلبي، مبروك يا حبيبتي ومن نجاح لنجاح.
= تسلميلي، عايزة حاجة!
- سلامتك يابنتي.
"خلصت تفريق وروحت وصليت وقعدت أدعي ربنا إن إدورد يكرهني لإن كدا غلط وفضلت أدعي لحد ما نمت"
ــــــــــــــــــــــــــــــــــــــــــــــــــــــــــــــــــــــــــــــ
"في المسجد، أثناء خروج المصليين"
- استنى يا شيخ لو سمحت.
- نعم يابني.
- ممكن نقعد نتكلم لإني محتاجك جدًا.
- تمام تعالى بيتي قريب من هنا ونقعد نتساهر وأسمعك.
" في البيت"
- أنا حبيت واحدة مسلمة وكل يوم أحبها أكتر من اليوم اللي قبله وأنا مسيحي بس أصلًا مش حابب إني أبقى مسيحي، أهلي مستحيل يوافقوا، وأهلها وهي ذات نفسها، نفسي في حل يريح قلبي يا شيخ لو سمحت.
- طب اتفضل الشاي طيب.
- حاضر.
- مينعش واحدة مسلمة تتجوز مسيحي إلا في حاجة واحدة.
- إيه هي وأنا هنفذها من غير تردد.
- إنك تأسلم يابني لكن أهلك ممكن يتبروا منك أو...
- أهلي! أهلي ممكن يعترضوا شوية لكن ممكن بردوا أجبلهم داعية يكلمهم ويأسلموا بردو وميحصلش مشاكل.
- تمام يابني اعمل اللي إنت شايفه صح.
- شكرا يا شيخ، عايزك تكلمني بقى عن الإسلام وكدا لو طبعًا مش هاخد من وقتك.
- ولا هتاخد من وقتي ولا حاجة، الإسلام دين الحق ودين التسامح والعفو، لا إله إلا الله... مفيش إله إلا ربنا سبحانه وتعالى... محمد رسول الله، سيدنا محمد اتحمل كتير واتحمل أذى كتير عشان ينشر الإسلام ويكمل رسالته صلى الله عليه وسلم، الإسلام أعظم دين على وجه الأرض هتلاقي كل حاجة مذكورة في القرآن عندنا،..............
" وبدأ الشيخ يحكيله عن الإسلام وحب الإسلام جدًا وقرر يجيب داعية إسلامية لأهله وبالفعل رفضوا لكن بعد إلحاح إدورد وافقوا، الداعية دعاهم للإسلام وكلمهم لحد ما إدورد زاد حبه للإسلام في قلبه كلام الداعية كان جميل جدًا ويدخل القلب، عيلة إدورد كلها أسلمت ودخلوا الإسلام إلا إدورد! "
- يلا نصلّي زي ما الشيخ علمنا.... بجد قلبي مرتاح جدًا وفرحان إني دخلت الإسلام.
- وأنا ارتحت أوي وعايزة أحج بيت ربنا وأزور النبيﷺ، الداعية قال إن ربنا بيحبنا عشان كدا دخلنا الإسلام، شكرا ليك يا محمد إنك عملت كل دا وخليتنا ندخل الإسلام وغيرنا أسامينا ومرتاحين نفسيًا بجد الحمدلله.
- متشكرونيش أنا يا ماما، اشكري ربنا سبحانه وتعالى ويلا بقى صلّوا هنا وأنا هنزل أصلّي الجامع.
" إدورد غير اسمه وبقى محمد لكن لسة في الحكومة متغيرش، إدورد مش راح الجامع لإنه لسة مش أسلم لكن راح عند مامت إســــراء"
- يا خالة عايزك في كلمتين.
- اتفضل يابني، ما توقفش على الباب كدا.
- أنا كنت جاي أقولك إني..... ممكن يا سما تعمليلنا قهوة مظبوطة!
- أه ممكن.
- كمل يابني كنت جاي ليه، مبروك دخولكم الإسلام يابني.
- الله يبارك فيكِ يا خالة، أنا جاي أقولك.... يعني... أصل... أه... أنا بحب إســــراء بنت حضرتك وعايزها في الحلال.
- إســــراء بنتي! إنت بتحبها من زمان شكلك.
- أه من زمان يا خالة من قبل ما أحب الاسلام، بحبها ياخالتي جدًا وبحلم بيها كل يوم وكمان عايزك تخليها تحبني بالله عليكِ يا خالة، أنا هدخل الإسلام لسببين السبب الأول والرئيسي إن أنا حابب الإسلام جدًا وكان نفسي أدخله فهدخله لكن دخّلت أهلي كلهم قبلي الأول بفضل الله، تاني سبب بقى هو إســــراء....بحبها و عايز أتجوزها وتبقى حلالي ونعيش في طاعة مع ربنا فأرجوكِ يا خالة خليها تحبني وكلميها عني وكدا.
- ثواني يابني هو إنت لسة مأسلمتش؟
- لأ لسة لإني عايز إســــراء تدخلني الإسلام وأبقى مسلم على إيدها.
- بتحبها جدا إزاي معرفش! هههه، اللي فيه الخير يقدمه ربنا يابني وهكلمها عليك لكن عايزين نعمل حاجة كدا بردو.
- اشطا ههههه.
" حطوا خطة جهنمية يخلوا بيها إســــراء تحب محمد وانتظروا إما إســــراء جت وبدأوا"
*في المساء وتحديدا بيت إســــراء"*
- خالة، أنا هتعشى عندكم النهاردة وبعزم نفسي بنفسي وعايز آكل من إيدك الحلوة دي.
- تنور يابني.
= ماما أنا داخلة أوضتي لإني جالي هرشة نفس.
- ولا هرشة نفس ولا بتاع تعالي يابت ساعديني في الأكل واعملي الكوسة اللي محمد بيحبها.
*في المطبخ*
=محمد مين!
- اللي كان اسمه إدورد.
بصدمة= هو أسلم!
بكذب - أه و أهلوا كمان دخلوا الإسلام والحارة كلها عارفة إلا إنتِ.
بفرحة= بجد يعني بقى مسلم... الله على الأخبار اللي تفرح.
- احم احم، خالة أنا جاي أشرب من المطبخ لو معندكيش مانع.
- تعالى يابني المياة هناك أهي.
- تسلميلي يا خالة، عايزك تعمليلي مكرونة بشاميل جمب الأكل.
- هههه حاضر ياحبيبي.
" خرج ودخل تاني"
- خالتي هو اللي بيدخل في الإسلام بيبقى أخبار حلوة وتفرح وكدا ولا إيه ههههه.
- محمد اطلع برا على ما نعمل الأكل هههههه.
= ماما هو ماله كدا عمال يطلب ولا كإنه بيته إيه دا.
- بس يابت دا زي ابني ودخل الإسلام وبيحب واحدة شؤم أوي الصراحة بس هو بقى راجل بجد، فاكرة ساعة ماختك سما رجليها اتكسرت بالليل هو راح جاب الدكتور من بيته ودخله ومشي من غير من شوف وشه ولا نعرف مين اللي جاب الدكتور ولا حتى الدكتور عرف إزاي إن رجل أختك اتكسرت.
= هو.... يعني هو شهم ونبيل ولا إيه!
- دا عنده نخوة مش في حد خالص، ولا في مرة كنت شايلة حاجات كتير فراح واخدها مني كلها، في مرة بردو نضف ليا الشقة ساعة مكنتِ تعبانة وفي المستشفى، دا راجل وشهم وجدع، ربنا يحفظه يارب.
- يارب يا خالتي ههههه.
- خضتني يولا، كنت بتسمعنا ولا إيه!
- ههههه سمعتك لما كمان نضفت الشقة وههههههه.
" هي ضحكته حلوة كدا ليه"
- طب يلا برا هههه، ثواني والأكل يجهز.
- اشطات أنا على نار هههههه.
- مالك سرحتِ يابت.
= ها.... لأ مسرحتش، هاتِ الأكل أحطه على السفرة.
- خدِ طلّعي الكوسة وكل حاجة وطلعي الأطباق والمياة.
"حطيت الأكل على السفرة وبدأنا نآكل كلنا "
= تسلم إيدك يا خالتي، الأكل طعمه لذيذ جدًا.
- بالهنا والشفا يابني، اشكر إســــراء عشان هي اللي عاملة معظم الأكل.
- تسلم إيدك يا إسراء الأكل جميل جدًا.
" اكتفيت بابتسامة"
- علّقي على الشاي يا إسراء.
- وإنتِ اعملي لايك على الكوباية ههههههه.
- هههه بس يابني خلاص مش قادرة، دمك خفيف وعسل.
- طالع لجيراني ههه.
= اتفضلوا الشاي.
- ماله عامل كدا!
=ماله فيه إيه؟
- ريحته تجنن... ناوليني كوباية شاي أبت.
= بت تبتك ومش هناول حاجة.
- عيب ناوليه.
بحزن مصطنع- خلاص يا خالتي، أنا همشي بقى مش مهم شاي، عايزة حاجة يا خالتي!
- الشاي يابني.
- مش مهم.
= استنى، لازم تشرب الشاي وبعدين يبقى امشي.
- لأ مش هشرب لإنك مش طايقاني ولا عايزاني أقعد مع خالتي شوية، سلام.
" مشي وأنا حسيت بالذنب وحسيت إنه زعل وحسيت كمان بشعور غريب تجاهه"
- مشّيتي محمد زعلان!
= آسفة.
- تعمل إيه كلمة آسفة؟ الشاب محترم وكان جاي يقعد معايا شوية وفرحان إن أهله دخلوا الإسلام وإنتِ نكدتِ عليه.
= مكنش أصدي يا ماما.
- اعملي حسابك بكرا جايلك عريس.
= طظ في العريس مش عايزة عرسان أنا.
- إما نشوف.
*الصبح*
- بابا هنروح عندهم النهاردة بالليل عشان نطلب إيدها.
- اللي يريحك يابني.
- وإنتِ يا ماما إيه رأيك فيها؟
- يازين ماخترت يا ضنايا.
- على بركة الله.
" إســــراء خلاص استسلمت للأمر الواقع ووافقت تقابل العريس، لبست وجهزت نفسها ولبست حجابها وطلعت في الصالة عشان تقابله"
- ماترفعي راسك كدا.
= محمد!
- آه يا روحي محمد اللي زعلتيه امبارح واللي كمان بيحبك وبيعافر عشانك وإنتِ ولا بتقدري.
= آسفة جدا والله.
- مسامحك المهم بقى أنا العريس وكدا ههه.
= إنت عنيد ليه.
- لإني بحبك.
- قبل ما أقولك وافقي عايز أقولك دخّليني الإسلام لإني عايزك أكون مسلم على إيدك إنتِ.
= مش إنت أسلمت؟ ماما قالتلي كدا.
- كانت بتضحك عليكِ أنا آه أهلي أسلموا لكن أنا لسة لإني عايز أبقى مسلم هلى إيد حبيبتي.
عيني دمعت من الفرحة= ط ط طب قول ورايا «لا إلهٰ إلا اللّه، محمدٌ رسولُ اللّه»
- لا إلهٰ إلا اللّه محمد رسول الله.
= فرحانة جدًا، أنا موافقة يا محمد.
- يابركة دعاكِ ياما هه.
= حبيتك وهفضل أحبك.

♡الواحدة مننا عايزة إيه غير واحد يتغير 180 درجة و بيعافر ويحارب العالم كله عشانها♡

" تمسّك بقلبي فإنه يُحبك"♥️
بقلم/ إســــراء بدوي"وَرد"