اسكربتات

اسكربت²⁵

= ممكن أقعد جمب الشباك لو سمحت؟
- نعم؟؟
= معلش، أنا بتخنق لو مقعدتش جمب الشباك.
- طب وأنا مالي، أنا اللي جيت الأول وقعدت.
= أنا بكلمك بأدب، ممكن لو سمحت!
-إنتِ شكلك هتعيطي، اتفضلي اقعدي.
"قعدت جمب الشباك وأنا مش عارفة ايه اللي بيجرى في حياتي وليه لسة واقفة على رجلي لحد دلوقت رغم كل اللي حصلي، أنا تعبت خلاص وعايزة أعيش في هدوء بعيد عن المشاكل، فضلت أعيط وأنا عمالة أفكر كدا والشاب اللي جمبي عمال يبصلي باستغراب وأنا مش عارفة أوقف عياط وكإني منبع وفاض من العياط، قررت إني أنزل أقعد قدام البحر شوية يمكن أهدى"
= على جمب لو سمحت.
- الأجرة يا آنسة.
= آسفة نسيت، اتفضل.
- أديلي ساعة عمال أقول في فرد مدفعش للدرجادي مبتسمعيش! بنات آخر زمن.
- جرا ايه يا برنس ما قالتلك إنها نسيت لازمته ايه الكلام.
- وإنت بتتكلم ليه وبصفتك ايه.
- وإنت مال أمك، حط نفسك مكانها أو حط بنتك مكانها ونِسْيت تدفع ترضى حد يهزئها كدا؟
- احم...م..
- بلا احم بلا دستور، يلا نزلها هنا ولا استنى نزلنا هنا عشان أنا مش هقعد في عربية واحد معندوش ذرة نخوة ولا حاجة كدا اسمها رجولة لو تسمع عنها.
- لم دورك يا أستاذ ولا إنت عايز تتخانق ولا ايه.
= بس لو سمحتوا، افتحي الباب يا آنسة.
"نزلت وفضلت أعيط تاني على اللي حصل والراجل فكرني نصابة، قعدت قدام البحر أعيط وحرفيًا عياط هستيري ولقيت الشاب قاعد جمبي!!!"
= جيت ورايا ليه؟
- معلش أنا كمان محتاج البحر زيك.
= شكرا لإنك دافعت عني وإنك قعدتني جمب الشباك.
- العفو، ممكن أعرف كنتِ بتعيطي ليه طول الطريق دا لو معندكيش مانع!
= وأحكيلك ليه وبتاع ايه! أخويا ولا أبويا ولا جوزي؟
-اعتبري ربنا بعتني ليكِ عشان أخفف عنك حزنك والهم اللي إنتِ شايلاه دا.
= لو سمحت، إنت ولا تعرفني ولا أعرفك وحرام إني أكلمك أصلا، فابعد عني وسيبني في حالي.
- طب اسمك ثنائي ايه وهمشي.
= هقول وهتمشي!
-اه والله همشي حالا.
= اسمي إســــراء بدوي.
" مشي بجد ههه، بعد ما مشي فضلت باصة للبحر وبصراحة بهدى إما ببصله، مش عارفة هروح إزاي وأقول لأمي إزاي إن محمد خطيبي طلع شمام وهفسخ الخطوبة وإنه طردني من شركة أبوه العبيطة دي، ياربي ساعدني وخلي الحمل خفيف على قلبي وابعتلي اللي يشبهني ويفهمني وعوضني خير يارب، المغرب أذن قررت إني أروح وأقول لماما والأمر لله"
= ماما... أنا.
-مال عينيكِ وارمة كدا، حصل حاجة ولا ايه.
= بصراحة كدا أنا هفسخ خطوبتي.
- اييه!
= اقعدي واهدي، أنا عارفة إنك عاقلة ياماما ومش هتزعقي، بصي أنا دخلت على مكتب محمد فجأة لقيته هو وبنت وبيشموا حاجة بيضة على المكتب وإما شافني قاللي "ايه اللي جابك افسخي الخطوبة وريحيني إنتِ وأمك الزنانة دي أنا أصلا مغصوب عليكم عشان فلوس أبوكِ غير كدا فطظ بيكِ جاتلي اللي معاها فلوس أكتر منكم" وبصراحة يا ماما أحسن إنها جت منه عشان أنا مكنتش بطيقه أصلا وحاول قبل كدا يمسك ايدي السافل.
- بقى كدا!!
= فكك ياماما أبوس ايدك، أنا عيطت ونفسيتي تعبت بما فيه الكفاية وعايزة آخد هدنة أرتاح نفسيا.
- ياما قولتلك الواد دا متشتغليش في شركة أبوه التعبانة دي، أبوكِ معيشنا وباسطنا تقولي لأ أنا مش بحب قاعدة البيت أديه أهو باعك برخص التراب.
= ياني، ياماما بقولك ايه، أنا داخلة الأوضة محدش بقى يقعد يهري في الموضوع خلاص صفحة واتقفلت ماشي!
- ماشي ياختي.
"دخلت الأوضة وارتحت إن ماما مصوتتش هههه لإن أي حاجة تحصل فجأة بتصوت ههههه، ارتحت إنه خرج من حياتي وهبص لحياتي بقى يانااس"
ـــــــــــــــــــــــــــــــــــــــــــــــ
- يابني مش عارف أنا توهت فيها وفي عيونها وأخلاقها وكل حاجة.. هههه مشوفتهاش وهي بتطلب مني إنها تقعد جمب الشباك كانت عاملة زي الطفلة وعيونها مرغرغة وخدودها حمرة ياااابا ولا ساعت ما السواق كان بيحرجها كانت خدودها أحمر، عارف أنا معرفتش السواق بنفسي ليه! لإني كنت هوديه ورا الشمس بس سيبته عشان ولاده بس، المهم هي.
- أخيرًا واحدة وقعيتك ياعم دا إنت كاريزما وتقيل ومش أي بنت تعجبك.
- المهم، أنا عايز أتقدم النهاردة قبل بكرا، بس عايزها تاخد راحتها لإن شكلها طالعة من علاقة فاشلة.
- طب إنت عرفت منين.
- يابني أنا ظابط مخابرات يعني عارف اللي قدامي دا بيفكر في ايه قبل ما تجيله الفكرة، عارف! أحلى حاجة إني اتصابت في رجلي، قول ليه.
- ليه.
- أولا شوفتها ثانيا هيكون عندي أجازة تلات أشهر أتجوزها فيهم يا ذكي ههههه.
- بركاتك يا شيح أحمد هههه، طب اسمها ايه ولا متعرفش إلا شكلها.
- إنت مالك بقى ياعم باسمها.
- بدأنا نغير أهو والعلاقة لسة مبدأتش أصلا.
- هههههه أنا كدا دمي حامي شويتين وإنت عارف.
- طيب يا سيدي، هتروح تخطبها امتى.
- النهاردة التلات! هروحلها الجمعة بس عايز أشوف أبوها، أنا مشيت وراها بس كنت بعيد وعرفت بيتها وهعرف أدخله ازاي!
________________________

= أيوا كدا يا ماما دلعيني بالبشاميل الجامدة دي.
- كلي ورُمي عضمك بدل ما إنتِ مقلحفة وعدمانة كدا.
= ياني، طب أطفح اللقمة طيب.
- عايزين ناكل في هدوء يا سمية.
" كَلنا وشربنا الشاي وسمعت كرتون روبانزل وعملت فشار وسمعت مسلسلي المفضل وقرأت رواية وقاعدة آخر رواقة تقوم الدنيا تضحكلي! أبدًا دا تزعلني وتضحك على زعلي، بابا جاي يقولي متقدملي عريس طب يابابا أنا لسة بموڤ أون من علاقة معفنة تقوم تقولي خطوبتك الجمعة الجاية!!! "
= يابابا، خد برأيي طيب، أنا لسة طالعة من علاقة فاشلة، عايزة آخد استراحة وبعدين أنا لسة صغيرة.
- 23 سنة وصغيرة!
= اه لسة صغيرة ومش هتجوز يابابا دلوقت.
- لمي بنتك يا سمية وعقليها.
" دخلت الأوضة فضلت أعيط وأدعي ربنا يعملي الصالح لإن أبويا دماغه ناشفة وبيعمل اللي في دماغه، طب أعرف اسمه طيب ولا أعرف أي حاجة"
- كنتِ عايزاني يا ست إســــراء.
= ماما بصي أنا قعدت أفكر ووصلت إني هتخطبله كدا كدا عشان دماغ بابا ناشفة، فحبيت أعرف منك أي حاجة عنه مش عايزة أتفاجئ.
- طب بصي، هو ظابط مخابرات وعنده 26 سنة ومحترم وابن ناس وهيصونك واتقدم لأبوكِ بعد صلاة الفجر، بصي دا ابن ناس ومش من الشوارع زي اللي ما يتسمى، فروقي كدا وانزلي اشتريلك فستان، ماشي يا ضنايا!.
= ماشي يا ضناكِ هههه.
" فرحت إنه ابن ناس ومحترم وبيصلي، وكمان ظابط دا حاجة سكر ياولاد، مرتحاله والواد دا شكله هيخليني أحبه من غير ما أشوفه، نزلت يوم الخميس اشتريت فستان بسيط وعليه الخمار والشوز وجيت تعبانة ونمت، تاني يوم بعد العصر تحديدًا ماما خلصت الأكل المشكل الكتير اللي بتعمله من الصبح، خلصته طبعا معاها ودخلت ألبس الفستان، لبست وخلصت ومحطتش أي ميكب لإني مش بحبه خالص وبصراحة بقى ملامحي مرسومة لوحدها مش محتاجة اللي يرسمها، العريس وأهله برا ولازم اطلع أقدملهم الشربات، قدمته وانا في غاية الاحراج وباصة للأرض، قالولي اقعد جمبه وهم قاموا ياكلوا وسابونا لوحدنا"
- مترفعي راسك ياورد.
= ها...
" رفعت راسي وبرقت إما شوفته، دا طلع الواد بتاع المواصلات، يابا وينهار رجولة وشهامة وحلاوة"
بفرحة مستخبية= إنت؟!
- ههه أيوا أنا، ايه رأيك فيا.
"سكر يابني والله سكر ههه"
= رأيي فيك! مش عارفة بس مرتحالك.
- يابركة دعاكِ ياما ههه.
= بس إنت ظابط ازاي؟
-أنا ظابط وواخد هدنة عشان متصاب في آخر عملية في رجلي وسلمت البدلة وكدا، فاحنا هنتجوز خلال تلات شهور عشان الهدنة هتخلص.
= ط. ط. طب إنت جيت تخطبني ليه؟؟ شفقان عليا مثلا عشان كنت بعيط؟
- عشان حبيتك وإنتِ البنت الوحيدة اللي دخلتها حياتي، أنا عارف الماضي كويس والواد دا قبضت عليه امبارح، يعني ريحي بالك.
= وإنت كمان الراجل الوحيد اللي دخل قلبي.
- ايه؟ قولتي ايه؟
= أنا بتكسف، فاسمع وإنت ساكت.
- طب وأنا مش بتكسف وبقولك بصوت عالي أهو... انا بحبك يا ورد.
= اسكت يخربيت جرائتك، وبعدين عرفت إن اسمي ورد ازاي.
- دا حكاية كدا، المهم أنا بحبك.. ها.
= وأنا كمان يا أحمد يا باشا قلبي ههه.

" تمسّـك بقلـبي فإنـه يُحبك"
بقلم/ إســــراء بدوي|وَرد.