Iztiraar

Chapter 15

Haweli me aaj shaam ke khaane ki taiyari zoron se chal rahi thi. Aaj Ghazal ko dekhne woh log aa rahe the jinki baat Bare Shah ne kuch din kabal ki thi. Amyra ne un taiyarion me zara bhi hissa nahi liya tha yeh kehte hue ke woh agar zulam ko rouk nahi sakti thi to woh uski hisse daar nahi banna chahti. Ghazal humesha ki tarah apni maa ko khamosh paa ke khud bhi himmat haar chuki thi. Woh jaanti thi uske liye sirf ek hi insaan boli thi aur use chup karwa diya gaya tha aur woh khud apne liye bolne ki himmat nahi rakhti thi.

Woh apni sochon me gum bibi ke kamre me bethi hui apne shaam ke jore ko dekh rahi thi jab darwaze per dastakh hui aur darwaza khula. Kaali shalwar kameez me malboos woh humesha ki tarah seena chora kiye wahn khara tha.

"Maajee hain?"

Usne pucha to Ghazal ne sar ko nafi me hilaya.

"Bua ne bulaya tha to unke saath chali gayi neechey."

Usne sar jhukae kaha aur wapis apne jore ko teh karne lagi. Use umeed thi ke Samir uski baat sunne ke baad wapis chala jaye ga magar uski umeed ke baraks woh andar chalta aya. Uske samne hi bed per woh jab betha to Ghazal ne sar utha ke herat aur uljhe hue tassuraat ke saath use dekha.

"Shadi nahi karna chahti tum abhi?"

Samir ne use dekhte hue sanjeedgi se pucha.

"Meri khuwaish se kya farak parta hai bhai"

Woh boli aur sar jhuka liya. Samir use dekhta raha phir khamoshi se uth ke bahir nikal gaya. Ghazal ne apni ankh ke kone ko ragra aur us jore ko uthaya. Use apni us umeed per hasi ayi thi jo ek lamhe ko uske andar jaagi thi ke shayad uske bhai ko uska ehsaas hua tha.

_________

Shaam ko mehmaan aa chuke the aur mard bahir bethe the aur aurten andar bethi hui thi magar bethak is tareeke ki thi ke aurten agar thora khamosh hoti to saaf bahir ki awaazen sun sakti thi. Aurton ki taraf sirf larke ki maa aur behen thi aur mardon ki taraf woh larka uske walid aur behnoyi bethe hue the aur unie samne Bare takht pe Bare Shah aur saath wali single kursi per taang pe taang rakh ke peechey ho ke sakoon se betha samir nazar aa raha tha jo takreebn uski umar ya usse ek do saal bare larke ko bagaour dekh raha tha. Ya phir yeh kehna behtar tha ke use parakh raha tha.

"Shah sahab tuwaddi poti saddi tee ban ke rawe gi tusi mutmaeen rawo"

Larke ka baap bola to Bare Shah ne sar ko halka sa hilaya.

"Mennu koi shak nayi e tere te Shams"

Unho ne pur ehtemaad tareeke se kaha.

"Parhe kitna hue ho?"

Yak dam uthne wali us gehri awaaz pe sab ne us awaaz ke malik ki taraf dekha.

"J.jee?"

Woh larka parhai ki baat pe jese ghabra gaya phir bola.

"Parhai nayi wekhi di mundeya di Samir puttar onna nu kaar te kaar wali nu kabu wich rakhna aana chayida e bas."

Shams sahab apne bete ki jagah bole aur Bare Shah ne ittefaaq karne wale andaaz me Samir ko ghoora aur apne baap ke jawaab de dene per us larke ne jese sakoon ka saans liya. Samir ne shukar kiya tha ke Amyra apne me hi thi aaj warna woh jis tarah is jahilana baat pe in sab ka sar phaarti woh sochna bhi nahi chahta tha phir kya hota. Magar phir sawaal yeh tha ke uska chup rehna theek tha? Uski behen ko in jahilo ke beech jhonka jaa raha tha sirf uski khamoshi ki wajah se agar uska mara hua zameer kisi din puri tarah jaag gaya to woh akhir kaise samna kar paye ga apne aap ka?