Iztiraar

Chapter 23

Don't forget to vote and comment♥️

__________

Nikah hone ke baad khana bhi diya jaa chuka tha aur sab khana khaa ke mehmaan jaana shuru bhi ho gaye the. Dulhe ke yak dam tabdeel hone pe logon ne kaafi baate ki thi magar sab ko khaas farak nahi para tha siwae ek shaks ke. Woh tha Zuhaib. Woh kuch na bol paya tha aur uski behen ki shadi Samir ke noker ke saath karwa di gayi thi. Ek mulazim ke saath. Magar dusri taraf woh jaanta bhi nahi tha uski behen us bari haweli ke kisi choudry se shadi karne ka bajae us ek mamooli mulazim se shadi kar ke kitna khush thi. Muskaan ke liye Asad ka bhaagna aur aur yak dam yeh sab bohat bara dhajka tha magar dil ke kisi kone me usne shukar bhi adaa kiya tha aur jab use maloom hua ke uska nikah Bare Shah kisi mulazim se kar rahe hain woh ghabra gayi thi magar phir Nikah khwaa ke Razi ke naam lene pe herani aur sakte ke aalam me bhi usne foran sar ko haan me hila diya tha.

"Chalo Muskaan taiyar ho jao apne shohar se milne ke liye jo ke koi mulazim he"

Sanekha uske kamre me aake boli to Muskaan ne use ankhe utha ke ghoora.

"Sanekha aapi Razi bhai sirf koi mulazim nahi hain woh bohat achey insaan hain."

Ghazal boli ghi jo Muskaan ko bed pe bitha ke uska dupatta sahi kar rahi thi.

"Acha ho ya na ho hai to mulazim hi na? Woh bhi Samir ka, magar fikar na karo jab ek dafa sab sahi ho gaya to main kahun gi Samir ko ke tumhare shohar ko achi jagah pe kaam pe lagwae!."

Woh is tarah boli jese bohat hi raaz ki baat ho jo bas wohi kar ke dikha sakti thi tabhi darwaze se Amyra dakhil hui jisne uski aadhi se ziyada bakwas sun li thi magar uspe kaan na dhare. Balke woh heran thi ke shaam ki Samir se hone wali us izzat afzai ke baad bhi woh ek hi khuwab liye bethi thi.

"Ghazal bibi keh rahi hain ke ab bahir aa jao Razi aa raha he. Sab mard bhi uth gaye hain."

Usne andar aa ke Ghazal ko kaha aur Muskaan ko halki muskurahat se dekha.

"Tum theek ho..?"

Muskaan ne halki Muskurahat se sar ko haan me hilaya to Amyra bhi muri aur Sanekha ko ek nazar ghoora jese use ankho se hi goli maar rahi ho. Phir Ghazal ko liye bahir nikal gayi. Sanekha bhi mu banae bahir nikal gayi.

Kuch der baad dubara darwaza khula magar Muskaan sar jhukae bethi rahi. Darwaza band hua aur yak dam kisi cheez se takra ke girne ki awaaz ayi to Muskaan ankhe uthane pe majboor ho gayi. Razi is kadar nervous tha ke usse saath para vase gir ke toot gaya tha. Woh foran uthane laga to Muskaan uth ke aage ayi.

"Choren main kar deti hun."

Woh jhuki aur toote hue tukre ko thaamne kagi to Razi ne apna haath uske haath pe rakha aur use us vase ki kirchi ko thaamne se rouka.

"Aap ke haath me chout aa jaye gi.."

"Lekin yeh aap ke karne ka kaam nahi..."

Usne kaha to woh uski nazro me dekh ke naram muskurahat ke saath bola.

"Yeh mere hi karne wala kaam hai..aap ko takleef aur dard se door rakhna."

Usne kaha to Muskaan saans thaame use dekhti reh gayi. Phir muskura di aur sar ko jhuka liya to saath hi siski nikli jispe Razi pehle se ziyada ghabraya.