Unicode
" မင်းကိုငါ လွှတ်လို့ပြောနေတယ်နော် ! "
" အဲ့တာဆို ငါ့ကိုအဖြေပြန်ပေးလေ "
Jiminစိတ်ထဲကနေ အကျယ်ကြီး ကျိန်ဆဲလိုက်သည်။ ငြင်းနေတာ အခေါက်ခေါက်အခါခါ။ အဲ့တာကို အမှတ်မရှိဘဲ အဖြေလိုက်တောင်းသေးတာ သူ အံ့သြလို့မဆုံး။ အိပဲ့အိပဲ့ပြောပြီး ငြင်းထားတာလည်း မဟုတ်။ ကျောင်းအခန်းရှေ့မှာတင် ပီပီသသပြောပြီး ပီပီသသ ငြင်းထားတာ။ အခုချိန်ထိ သူ့ကိုနှောင့်ယှက်နေတာတော့ အဆင်မပြေ။ သူ့ဘက်က သဘောကျလို့ဆိုပေမယ့် ကာယကံရှင်က သဘောမကျလျှင် ဒါက နှောင့်ယှက်သည့် အပြုအမူဖြစ်ရုံသက်သက်ပဲ။ ရင်ခုန်စရာ တစက်မှမရှိ !
ဖြစ်ချင်တော့ Jungkookက သင်္ချာစွမ်းရည်ပြိုင်ပွဲ ဝင်ပြိုင်ထားတာကြောင့် ဆရာမနှင့် အလုပ်ရှုပ်နေသည်။ ပြန်မှပဲ တူတူပြန်ရမှာဖြစ်သည်။ သူ ရှိနေလည်း ဘာမှထူးမှာမှ,မဟုတ်တာ။ သူက ဘေးကနေ ကြောင်တောင်တောင် မျက်နှာဘေးလုပ်ပြီး ကြည့်နေရုံပဲ တတ်တာလေ။
" နောက်ဆုံးပြောမယ်။ ငါ့ကိုလွှတ်ပေး "
" မလွှတ်ပေးနိုင်ဘူး။ ချစ်တယ်ပြောမှ လွှတ်ပေးမယ်။ "
Jimin၏ သည်းခံနိုင်မှုအတိုင်းအတာသည် ကျော်လွန်သွားပြီ ဖြစ်သည်။ ကိုင်ထားခံရသည့် လက်က ဘယ်ဘက်မလို့ အားနေသည့် ညာဘက်လက်ဖြင့် သူ့ကိုထိုးလိုက်သည်။ သူတို့နှစ်ယောက်ကို စိုက်ကြည့်နေသည့် ကျောင်းသားတွေကလည်း ဟာခနဲပဲ။ Jiminကတော့ ဂရုမစိုက်နိုင်ပါ။ သူ စကားဖြင့် အခါခါ သတိပေးခဲ့တာပဲ။
" မင်း ! "
မထင်မှတ်ထားသလို ဖြစ်သွားသည်မို့ ထိုကောင်လေးက အံ့သြသလိုကြည့်သည်။ မကျေနပ်စွာဖြင့် ဒေါသထွက်နေသည့် အကြည့်တွေနှင့်အတူ။ Jiminကတော့ သူ့ဘယ်ဘက်လက် လွတ်သွားသည်မို့ အခန်းထဲ ခပ်တည်တည် ပြန်ဝင်လာလိုက်သည်။ ထိုကောင်လေးကတော့ လွယ်အိတ်တောင် မယူနိုင်ဘဲ တခြားတစ်နေရာသို့ ထွက်သွားသည်။ ကျောင်းသားတွေကတော့ ကြည့်လို့ကောင်းနေကြသည်ထင်ပါ့။
" ပျင်းလိုက်တာနော် ~ "
Jungkookနှင့်တူတူ အိမ်မပြန်ဖြစ်ပါ။ သင်္ချာစွမ်းရည်က နောက်တစ်ပတ်ထဲ အချိန်ပြောင်းလိုက်သည်မို့ သူ့မှာ အလုပ်ရှုပ်နေသည်။ ဆရာမကလည်း သူ့တပည့်ကို အကောင်းဆုံးဖြစ်စေချင်တာကြောင့် တစ်နာရီအချိန်ပိုယူကာ တွက်နည်းတွေကို စိတ်ရှည်ရှည်ဖြင့် ရှင်းပြနေ၏။ တစ်နာရီက အကြာကြီးမို့ ထိုင်တော့ မစောင့်ချင်တာကြောင့် တစ်ယောက်တည်း ပြန်လာခဲ့လိုက်သည်။ စက်ဘီးကိုတော့ ထားခဲ့ပေးသည်။ Jungkook ပြန်လာမည့်အချိန်ဆို နည်းနည်းနောက်ကျလောက်မှာမို့ပင်။
