العروسة في الثوب الاسود

البارت السابع والثامن

٧________٨
العروس في الثوب الاسود

البارت السابع

لا تنعتني بالجنون....
حينما تجدني أنبش في سراديب الأمس

عن عنوان حبيبة مضى على فراقها
عامان
ربما هو ضرب من الوفاء!
________

البيبي : يمة صادق أنت ليش ما تتزوج عاجبتك حياتك هاي..

بابا باوع على بيبي بصدمة صفن عليها وكال...

صادق: حجية كاعد تحجين صدك لو تتشاقين علمود أعرف شنو اجاوبج .

البيبي : ليش يمة هو هذا الموضوع مال واحد يتشاقة بيه.
صادق: شجابة على بالج وليش تفتحين هيج مواضيع وياي...

البيبي: يمة انت وبنياتك وابنك يرادلكم مرة حوك تقوم بيكم وبلبيت تشوف طلباتك اكلتك لبسك مايصير يايمه تضل هيج...

صادق: حجية شاكيلج ، سمعتيني فد يوم تذمرت من وضعيتي عايش ومرتاح مامحتاج لمرة تجي وتخدمني...

البيبي: انت هم قدر وضعنه شوف زهرة شصار بيها واني وسهاد يرادلنه مداراه ومحمد  تعب بلكت البنيه تطلع بنت حلال وتساعد اخيتك زهرة .

صادق: حجية اذا احنه ثقلنه عليكم اني مستعد اخذ اطفالي واكعد بيتي حتى لو اعرف ابطل من الدوام واكابلهم واكعد واذا على مساعده زهرة اني اجيب بنيه تساعدها،، كومة بنات اصول وشريفات يكيفن يشتغلن براتب واني ادفعه واتكفل بكلشي .

البيبي : يمه اسمعني ..

قاطعها بابا وكام ...

صادق: سمعيني حجية تشيلين هذا الموضوع من بالج تمامآ وما أريد اسمعه بعد والمفروض اني اجي عليج واكلج اريد اتزوج وانتي ماترضين لان بنتج ما صارلها هواي من ماتت الله يرحمها واني ما ابدل سوسن بمليون مرة اله اذا تخبلت ،، في امان الله .

عافنه وطلع...

خطيه بيبي كامت تبجي...

البيبي: هو ما جاي يفهمني اني كلت يراد النه مداراه مو بس هو وجهاله لازم تجينه بنيه تساعدنه ،،عبالكم سهله عليه من هيج حجيت لاوحق بيت الله حسيت خناجر طبت بكلبي..

زهرة: والله ياعمه شمدريج اللي يتزوجها  شنو ماشنو اطباعها تصرفاتها يجوز نحسة ما ترضى تساعد تكلج اني تزوجته اله شعليه بيهم...

البيبي : لا اكو بنات اصول هوواي واحنه من نخطبها لازم نكللها عن وضعنه تقبل اهلا وسهلا ما تقبل نشوف غيرها شو كومه بنات...

محمد: والله حجية ماعرف شكلج حيرة حجيج صحيح بس هو صعبه عليه خصوصا جرحه بعده جديد  ماطاب .

البيبي : الله يعين كلبه ويصبره ويصبرنه ...

انسد هذا الموضوع ومحد حجة بعد وبابا اسبوع مايقبل ييجي لبيت بيبي زعلان عليها  وحتى ملابسه هو يغسلها ميخلي عمة زهرة تغسلهن ولا يقبل تنظف البيت .تالي عمه راحتلة...