العروسة في الثوب الاسود

بارت٧٧و٨٧

٧٧___٧٨
العروس في الثوب الاسود

البارت السابع والسبعون

مروان يكول

كل شي انتهى وصار التريده يصير

وخل الناس تضحك من يشوفونك

انه لونك جنت

لو رحت انت تموت

شتكل للناس لو كالولك شلونك؟

مو زاد وملح

انه دم ولحم منطيك

كل هذا وبعد ما شافته عيونك ؟؟

انه افهمك جنت من ترمش اكولن صار

شكد يمهم تسولف وما يفهمونك

ضل دك يكلبي شبيك مو هسه موتك 💔

بلجي يجيك الجان يغفى على صوتك..

......

رسيل تكول

لو صابر انت علي ...

صدكني اعوضك عمر..

بس انتَ هيج رحت.

مافكرت تنتظر💔

كتلك حياتي ألك

وشيصير مابدلك

والجرح بيه بقه لو بيك ماعفته ....

جايز أكون السبب جايز تكون أنتَ...

بس هيه رحلة عمر وكلشي انتهى بوكته ..

صفحة وطواها الزمن ...💔

رحلة وانتهت .. بس بثمن

وبين جبير الفرق

وين انه و وين أنتَ ...

💔💔🖤🖤

مرت الايام وخلصت العده مالتي ، وسند كبر صار عمرة سنه ونص ، بده يفتهم شويه كام يختنك من الشقه ويريد ينزل ، صح يجون عمامه ياخذوه من الباب بدون ما اطلعلهم ، بس ساعه ويرجعوه باقي الوقت يمي ..

لان جوة ملتهين بشيماء ونور مقسومه اقسام بين الخطار وبين البيت وبين جهالها ورجلها وبين شيماء ، وايهم واني .....خطيه رغم كل التعب تجيني بليل دمعتها ويه دمعتي ، تكعد تواسيني وتصبرني ....

سند بدة يكول امه وابه .. يابه يشكه لكلبي من يحجيها

اني وياك ثنينه نفس المصير ونفس الحظ اني تيتمت من وكت وماما عافتني وانت ابوك عافك .

بس ادعي من ربي حظك يكون احسن من حضي ويسعدك وترتاح ...

اني احجي وابجي وهو يباوعلي ويضحك ، عباله كاعد العبه ....

ابد مقصرت ويه ابني ، رغم حزينه، وكلبي محترك ، بس اوكله وكت بوكته ، اسبحه وابدله كل ميوسخ نفسه ...

شفته نعس ، خليته بحضني وكمت ألوليله ، اله مدري لروحي ...

نام و خليته بفراشه وكمت توضيت وصليت المغرب وجبت القران حتى اكمل الختمة واهديها على روح مروان ، من توفه لليوم اني بالشهر مرتين اختمله القران واهديه لروحه... انضم مروان لختماتي ويه بابا وماما ...