العروسة في الثوب الاسود

بارت ٣٩ و٤٠

٣٩_____٤٠
العروس في الثوب الاسود
البارت التاسع والثلاثون

كعدنه وكعدت الدنيا على واهسنه
‌‎وفتح جنحانه كلبي وطار
‌‎بسما عيون المها السبعه
‌‎سكتنه وكلها سمعتنه
‌‎وبده يهب النسيم
‌‎وينشرح صدري
‌‎حچت وبكل حرف حسيت
‌‎يرجع عاام من عمري
‌‎وبلآ صوت بس أفهم
‌‎سواليف الورد ماتنسمع تشتم
‌‎وبين ألخوف والوهواس
‌‎وامانينا وكلام الناس
‌‎واهلها الفارغين احساس
‌‎واللهفه !
‌‎احنه هناك مختلفين وين نروح
‌‎للزفه ؟
‌‎لزفچ عَ ألگمر هولج
‌‎وخلي الناس تنشد
‌‎ يآهو ألتزوج
‌‎لحآرب دنيا لعيونچ لصيرن بألعشك نازي
‌‎لو نام بسرير وياچ لو فوك أيد جنازي
‌‎ماحب العنف بس همه جبروني
‌‎من أعشك اخلي الموت بعيوني
______

التفتتت واشوف مروان عيونة براسة اعصاب صاير وعيونه احسها تريد تطلع من مكانها ...عاط عيطه هزت البيت هز...

مروان: لج كلبة بنص بيتي وتحجين علية انتي وبزر النستلة وتدورين حبجيات .

رسيل: اخ شعري هد ايدك اخخخ هاي شبيك صدك كذب..

مروان:  صار كم مرة تخابريه نذله...

رسيل: اول مرة ..

جاوبني بصياح..

مروان : منو يكول .....

رسيل: شوكت لحكت الزمه اذا انتو هنا كلكم ، وبعدين واذا حجيت وياه لا عيب ولا حرام وانت مالك دخل.

شد شعري حيل وصرت كدامة خزرني ..

مروان: حجاية مالك دخل جوزي منها لا اكسر راسج والتليفون  اريد مرة توصلة وحك علي اجنزج تجنز ، طلقة برجلج واكعدج على كرسي والحاجتين جواج.

ما انكر خفت بس تصنعت القوة ، ضاهري قوي وداخلي يرجف خوف ، ورعب لان اعرفه مايتشاقة جربته اكثر من مرة.

رسيل: مخايفه منك شتسوي سوي ايدك الك.

ضربني راشدي من قوته كمت ما اشوف واضح .
لزمت خدي ومتت قهر هاي ثاني مرة يضربني واني بعمري محد ماد ايدة عليه ، رفعت راسي وباوعتله بخزرة.

رسيل: ميضرب المرة اله المرة مثلها وانت لو مو مرة متضربني ياحقير.

بعدني الكلمة الاخيرة مناطقتها ،، وانهال الضرب عليه والسب واشكال الشتائم . الى ان سمعت صوت هوسه ما ميزت منو لان صياحه ماخذ الدنيا وصياحي من الوجع ، جروه مني اباوع الكاع بيها دم هذا منين دينزل مديت ايدي على وجهي كله دم ، اجتني نور عليه تركض ، شافتني شهكت وكامت تبجي...

نور: انكسرت ايدة ان شاءالله هاي شمسوي بيج .

أيهم: جيبيها غسليلها .

كومي حبيبه كومي كتلج لا تخابرين ، شكد حجيت وياج ما فاد ما تعرفين هنا الف اذان مفتوحه علينه ، امشي اغسلج ..