نجمة

8

صبح صباح جديد ناضت فيه نجمة عازمة على المحل .. من بعد ماتشاورات مع خوالها و عطاوها من الطاقة لي تحتاج .. شدات طاكسي تاني نيشان للشارع فين كاين المحل ديالها .. وقفات فالشارع من الجيهة لاخراا و بقات مسمرة حاضية المحل .. ماضربات 10 الصباح حتا حلو مولاه و جلس فيه تيتسنا يجي الشاري و يبيع خلاص ...

ساعة وهي واقفة مخبية ورا واحد الطوموبيل و لي داز يشوف فيها وهي مدياها غا فراسها متتشوف فحد ...

تقادات فالوقفة و شدات فساكها بايد و تتقاد فولارها بايد ... تكاحزات شويا تتشوف فالناس و تعبر فيهم حتا بانت ليهم مرا ماكبيراش بزاف تكون فديك الثلاتينات مقادة الحالة و مشيكة على راسها .. قصداتها نيشان حتا وقفات عليها خلعاتها ..

نجمة: السلام و عليكم

شافتها المرا ورجعات اللور خلعاتها : عليكم السلام ..

نجمة : اححم .. عفاك محتاجة مساعدة صغيرة منك الا كان ممكن ..

طلعاتها المرا و هبطاتها باينا فيها بنت الخير من لباسها عاد لكنتها باينة فيها زماكرية .. تشجعات المرا و عطاتها وذنيها تتسمع ليها ..

بلباس نقي و الشعر مطلوق و صندالة عالية وقفات عليه مرى و هو وسط محلو جالس تيتسناا الهمزة فين تبان

غا شاف الغاشي داخل عندو وقف تينطق السلام و يرحب: مرحبا ا الالة اش حب الخاطر ..

تلفتات السيدة تتطلع فالمحل و تهبط و تفلي الحيوطا و العلو و المساحة و مول الشي تيشوف فيها حتا تلفتات : شحال طالب فهاد الخير ..

- مرحبا الالة مرحبا .. غا شوفي و يكون خير

- انا تنشوف غا هي قولي شحال طالب فيه

- 50 مليون الالة و راه المكان ممتاز و هاد الشارع عليه اقبال كبير و تيتمشاو فيه الحوانت ..

شافت فيه بنص عين هازا حاجب: شنااوا 50 مليون .. هادا راه مايجيب ليك حتا 40 مكادا .. شوف حالتو .. و عاد لي ايشريه اش ايدير فيه غا هو راه خاصو زبالة الفلوس باش غا يتقاد ..

- الله ا لالة الله .. المحل مخير و راني طالب 50 غا حيت العقار طايح و ما باغي نتحادا مع سماسرية ..

- اوا اش أقولك اسيدي المحل ماهواش و انا كنت معولة نضرب الحديد ماحدو سخون ولكن مكتابش .. خليتك على خير .. نمشي نشوف بلاصة خراا

خرجات تتمختر خلاتو داخلو الشك و بدا تيشوف فمحلو و يحقق فالعيوب لي فيه ..

بدا تيدخل واحد ورا لاخر لداك المحل و كلهم نفس الهضرة تيقولو المحل ماهواش و مايجيب والو حتا مول الشي دخلو الشك و جلس شاد راسو تيشوف فالولد لي كان عندو غادي خارج ..

فبلاصة مابعيداش و بالظبط فالدورة تاع الشارع كانت واقفة نجمة بنظارات شمسية تتسنا حتا وقف عليها ولد .. تقادات و جبدات من ساكها 200 درهم مداتها ليه و قالت بابتسامة: امضرااا ..

- ههه كوني هانيا زويتو بالهضرة حتا ماباقي قد ..

نجمة: شكرا بزاف و سمحلي ضيعت ليك وقتك ..

- الله اودي غا 4 بحالك و نطلع نهاري بخير ..

ماش خلاها تضحك عاجبها الحال و خطتها لحد الساعة غادا مزيان .. شدات فساكها و علات كتافها حتا خرج صدرها و بكل ثقة تمشات فالطريق حتا وصلات قدام محلها ..

عين هنا و عين هنا و بكل ثبات دارت راسها اتنزل تحل قفل محلها حتا وقف عليها السيد مول المحل : سلام عليكم ..

علات فيه راسها ببطئ راسمة ابتسامة انتصار : عليكم السلام

- مابقيتي جاوبتيني ابنتي

نجمة: احم .. صراحة تشاورت مع راسي و لقيت المحل مامسلكنيش و حتا الثمن طالع ..

- لاتقولي هاكا ابنتي المحل مخير و راني على وجهك نطيح ليك الثمن يالاه ..

ضحكات ليه نجمة و حسات براسها خطتها نجحات و من هضرتو عرفاتو بغا يبيع باشما كان و يتفك .. دخلات معاه تاني للمحل تشوف و تخيبو ليه حتا نطقات: انا 35 مليون مانزيدش عليها .. المحل ناقصو شحال و زيد الشارع عامر مشارع مانلقا اش ندير فيه ..

دخلات ليه الوسواس و لعبات ليه بدماغو و حتا هو بايع غا بوحدو ماباغي يدخل معاه سماسرية حتا طاح فنجمة سمسار راسها و طيحات ليه الثمن حتا الارض .. خاف يتصيد و يوحل فيه المحل و مايلقا لمن يبيع و هو محتاج

توكل على الله و عطا الكلمة لنجمة .. فرحات و ماقداتها فرحة حتا بغات تبكي الدموع : هي دابا نيت اسيدي نضربو الحديد ماحدو سخون..

خرجو بجوج تيسدو فالمحل و شدو طاكسي لاقرب موثق من بعد ما مول المحل هز معاه الوراق ديالو لي كانو عندو ..

دخلو عند الموثق و فضاو شغلهم و قادو وريقاتهم و سيناو على كلشي

- ها الوراق عند النوطير تحطي ليا فلوسي كاش جي خودي وريقاتك والله يربح

داكشي نيت لي دارت .. خلات كلشي عند النوطير و خرجات شادا طاكسي تاني مضاربة مع زيفها و الصهد قتلها و التيليفون فوذنيها شادا الخط مع خالها

-هههه داكشي لي قلتي لي لي درت .. والله اخالي الا طيحت ليه الثمن الله يسمح ليا .. اجي ياكما تنتسما نصبت عليه .. اوا صافي دابا انمشي لابونك نخرج الفلوس .. ياك صيفطتي ليا بعدا ..امم صافي .. ايي و لاهيلا نسيت الطوموبيل كاع .. عرفتي شنو ندوز ليها هي لولا نيت بلا مانبقا نتكرفس فالطاكسيات ..

قصدات لاجونس هي اللولة لقات كلشي واجد و الحساب تخلص من خالها .. خرجو ليها الميني كوبر تتشعل .. طلعات فيها تضحك و خرجات من لاجونس حتا هي صايكة طوموبيلتها ..

دشناتها و ضارت بيها حتا عيات حتا تفكرات الفلوس و البنكة و قربو يسدو .. شدات الفران و ضارت لاقرب بنكة .. بقات تتقلب فين تسطاسيوني حتا عيات و خلاتها فالشارع حابسة الطريق و خرجات حاطة ايديها على جنابها تتغوت و الكرديان جاي تيجري جيهتها دارت حالة فالطريق ..

رمات ليه الساروت يسطاسيونيها هو و شدات فساكها قاطعة الشانطي و زربات تدخل لبنكة قبل مايسدو ..

وقفات عند اول كيسيي تما و عطات وراقها و حسابها لي كان محلول من زمان بسميتها و يلاه تحطو فيه الفلوس لي صيفط ليها خالها ..

طلبو منها تسنا حيت المبلغ لي بغات كبير ووجلسات فوق الفوتوي دايرا رجل على رجل تتسنا ..