نجمة

21

وصلات لدارها على غير العادة هاد المرة ... حطات ساشية فالكوزينة و دخلات لبيتها تضحك بالفرحة ... مشات نيشان قدام المرايا تتشوف فراسها و تضحك وتحرك عاجبها راسها .. حيدات الفولار و طاح السالف على ظهرها رطب مسبسب ... سرحاتو بإيديها تضحك مع راسها...

صونا التيليفون قفزها من بلاصتها .. جيدات الساك لعندها و جبدات التيلي تشوف شكون حتا لقات سميتو مجبدة تيعيط ليها ...

حطاتو متعمدة تخليه يصوني شويا ... وقفات تتحيد فحوايجها و عينيها على التيلي حتا قطع .. لبسات بيجامة و جلسات مربعة شاداه بين ايديها تتسناه يعيط تاني ...

دازت ساعة وهي باقا عاسة على التيلي تتسناه يصوني و معطاتهاش نفسها تصوني ليه هي ... عيات صابرة فاللخر بركات على رقمو و دوزات الاتصال متوترة...

صونا مرة و جوح و ثلاتة حتا كانت اتقطع عاد جوبها بصوت باح باينا كان ناعس : الو ..

حمحمات نجمة وردات بصوت خفيف: ديزولي مشفتش لابيل كنت تندوش ..

علي: ماشي مشكل . بصحة .

نجمة: الله يعطيك الصحة ..

سكتات معرفات متقول مزال وهي لي معيطة .. حتا كانت اتمسي عليه وتقطع وهو يقاطعها: كنت بغيت نسول فيك كي وصلتي ..

نجمة: هاا .. ااه وصلت بخير .. شكرا..

علي: امم مزيان .. الي ا دومان و ملي نصوني جوبي ..

نجمة: حمم .. واخا بونوي ..

علي : بونوي ..

قطعات عليه تضور فعينيها .. تخبطات فبلاصتها تتفكر و تخيط و تفصل حتا تهدات و طاحت نعسات ...

صباح جديد

جالسة فكرسي دايرا رجل على رجل عاطية ايديها لوحدة من البنات تتصبغ ليها ... تيليفونها حداها مرة مرة تطل عليه ... متوترة و فنفس الوقت متحمسة لهاد اللقاء ...

صبغات ضفيراتها بلون باج خفيف مع يدياتها البويض جا تيحمق .. جلسات ليحاهم ينشفو و فنفس الوقت لايحة عينيها حاضية الشغل ...

تتبغي تعلق و لكن الشغل كلو مقاد و البنات متيخليو ليها فين تهضر .. كلشي مقاد و مرتب و الزبائن تيستقبلوهم احسن استقبال و تيعطيوهم الخاطر ...

صونا ليها التيلي قفزها ... طلات لقاتو هو عاد بدات الترعيدة عندها ديال بصح ... هزاتو بشوية و جوبات بصوت خفيف : الووو ...

علي: انا براا ..

و قطع .. ستغربات مقال لا سلام لا لباس... رمات التيلي و قالت لوحدة من البنات: جيبي ليا ساكي و الفورير لي فوق المكتب ..

مشات البنت تتجري جابت ليها .. لبسات الفورير فوق كسيوة كحلة ودارت ليه سمطة ... وقفات قدام المرايا تتقاد زيفها و البنات تيشوفو فيها بإعجاب ...

قادات راسها و دارت نظارات فعينيها عاد تلفتات عند المكلفة بالمحل فغيبتها : ردي البال و اي حاجة عيطيلي .. شي ساعة و نرجع ..

خرجات بخطوات تابتة خلاتهم تيتغامزو عليها..

- ياختي على مزيناتها .. تبارك الله ماعينتها ..

- اوا لي عندو الفلوس علاش ميكونش زوين .. كيتنا حنا ..

- وباقا صغيرة من الفوق

- انا اختي تيحمقني غا لباسها تتعرف تنسق اللوان .. والحق يتقال ضريفة عمرنا شفنا منها العيب ..

الكلام كتير و السكات حسن .. بقاو مني منك حتا كل وحدة تلاحت لشغلها ... اما نجمة راه واقفة قدام المحل تتقلب بعينيها عليه .. عاد اتجبد التيلي تصوني ليه حتا وقف قدامها برونج كحلة تتشعل ...

حل الزاج لي من جيهتها و نطق: طلعي ..

حلات الباب بكل رقي و طلعات مشافتش فيه ...حطات ساكها جنبها و قدات السمطة عاد هزات فيه راسها لقاتو تيحقق فيها بانسجام .

نجمة: بونجوغ ..

حرك راسو يمين و شمال كأنه قليل الحيلة فهاد اللحظة .. شاف قدامو تيغزز سنانو و نطق: بونجوغ ..

الحاصول و مافيه نجمة ضرباتو على الشعة ... الزين و البيوضا و الثباتة و الاناقة و الرقي ... اي حاجة تيتمنا اي راجل شافها فنجمة من ناحية المظهر ...

مطالش الطريق بزاف حتا وقفو قدام مطعم ... طفا الموسيقى و شاف فيها عاد نزل ...
تعمدات نجمة تعطل فالنزال باش تشوفو اش ادير ساعة حطم توقعها و حل ليها الباب ... و بابتسامة نطق

علي: تفضلي ا لالة ..

بتاسمات ليه و هزات ساكها و هبطات .. وقفات جنبو تتسناه حتا سد الطوموبيل عاد تمشاو جنب بعض ساكتين ...

جلسو فوق فوتوي فأخر المطعم جلسات و جلس جنبها و بعفوية رما يدو ورا ظهرها ...

نجمة بجلسة انثوية دارت رجل على رجل دافعة صدرها ... تلفت جيهتها و بابتسامة قال: اش تاكلي الزين