نجمة

85

نجمة بسعادة: تنبغيك اعلي ..

بتاسم بحب و ضورها عندو طبع قبلة على راسها و قال : وانا تنحماق عليك الزين ديالي ...

حلات فيه عينيها وهزات ايديها تداعب خدو و قالت : مقلتيش ليا اتجي ..

علي: قلت نخليها ليك مفاجأة... كي جاتك الفيرمة ..؟

ضورات عينيها فالجنب و قالت: غزالة .. شكرا بزااف هادشي كتير عليا ..

قرب ببوسة فحنكها و رد: تستاهلي كتر احبيبة .. فين الواليدة؟

حطات راسها على صدرو عنقاتو و ردت: خليتها مع زينة مشات تشوف الجنانات و صفاء خليتها جنب البيسين ...

حرك صباعو على ذراعها بحنية معنقها و قال: شفتي الخيل ..

نجمة: شفتو و لكن مقدرتش نقرب ليه ..

نوضها عليه تيضحك و جبدها من ايديها جيهة الاسطبل ...دخلو ليه نيشان قبالة واحد الخيل كل مايتقال فحقو تبارك الله و سبحان لي خلقو ... لونو اسود قاتم و قوتو باينة من وقفتو و حجمو ..

مد ايديه داعب شعرو ببطئ تيتحسس ظهرو و قال موجه كلامو لنجمة لي بقات واقفة بعيد : اجي متخافيش ..

حركات راسها بالنفي تتشوف فجنابها و ردات: غا خليني هناا .. خفت ..

تمشا لجيهتها تيضحك و جبدها من ايديها حتا وقفها قدام الخيل... شد ايديها حطها على راس الخيل و قالها كي دير حتا ستحلاتها و زادت طلعات بإيديها لظهر الخيل و لشعرو تتلمسو ببطئ و حنان و شافت فعلي بضحكة و قالت: زوين بزااف .. واش خديتيهم مع الفيرمة...

جبدهامن ايديها لعندو عنقها و رد: كلشي مع الفيرمة احبيبة .. هادشي كامل ديالك ..

تعلات شوية باستو بحنكو تضحك و قالت: اممم و شكون مقابل هادشي.. بان ليا غير مختار و مرتو وهادشي بزاف عليهم بوحدهم ..

عنقها خارجين برا ووقف تيشوف جيهة واحد الجنان و قال: كاينين ربعة ديال الخماسا تيجيو يقضيو شغالهم و يمشيو و لي بغا يبات راه كاينة واحد الدار صغيرة فالدخلة الا بانت ليك تما تيباتو .. و مختار راه هو لي مقابل كلشي هو و مرتو ملي خديت الفيرمة كان خدام فيها و طلبني يبقا هنا يقابلها و خليتو فيها ..

هزات فيه عينيها بسعادة و قالت: اندوزو رمضان هنا صافي

داعب حنكها ببطئ و رد: بعيد عليك احبيبة تبقاي غادا جايا للصالون .. الا كنتي اتجلسي من الخدمة ندوزوه هنا ...

خرجات عينيها مصدومة و ناضت عليه : من نيتك.. منقدرش نخلي الصالون شهر كامل .. و اصلا غادي ندوز فيه غير الصباحات و فالعشية نرجع .. عفاك خلينا ندوزوه هنا غادي يدوز زوين ..

ضور وجهو تيضحك و قال: زيدي تحلوني زيدي ..

ضحكات بتقال و باستو فحنكو معنقة كتفو: اندوزوه هنا ابب .. ايدوز زوين والله .. شوف شكون بحالك تفطر على هاد الخضورية و تعمر عينيك بهاد الخير كامل ..

عنقها تيضحك و تمشاو تيضورو على الجنانات حتا وصلو للفيلا .. تصادفو مع الحاجة و ناضت نجمة من حضن علي تتقاد فزيفها بتوتر ... وقف علي سلم على الحاجة باس راسها و ايديها و عنقها : لباس الحاجة..

عنقاتو تضحك و قالت: لباس اوليدي.. على سلامتك ..

علي: الله يسلمك الحاجة.... كي جاك هادشي ..

تلفتات جيهة نجمة و رجعات شافت فيه : اوا الخير هادا .. تبارك الله و الصلاة على النبي شريتي و عرفتي اش تشري .. يجري فيها الخيل تبارك الله..  واخا درتي الفيرمة وانا اخر من يعلم ماشي مشكل

لاح ايدو على كتف نجمة بعفوية و رد: ماشريت والو و مادرت والو الحاجة ...  ديال نجمة هادشي ..

استغربات الحاجة و قبل تنطق هضرات نجمة بتوتر تتشوف فعلي بنص عين: حممم ..بغا يقول زعما ديالو هو ديالي و ديالنا كاملين .. ياك اعلي ..؟!

شافت فيه تترمش بالزربة تطلبو ميفرشهاش و مافيها لي يتحادا مع الحاجة... حرك راسو بمعنى ااه وهو مفاهم والو .. بتاسمات نجمة و مشات جنب الحاجة و قالت : الحاجة اش بان ليك ندوزو رمضان هنا مجموعين ..؟

مع كلامها دخلات صفاء تضحك و قالت: ندوزوه اختي ندوزوه ..