نجمة

1

واقفة قدام المطار بملابس انيقة و شال ملوي على وجهها الدائري عاطي جمالية و جاذبية لحروفها الشهبة و حجبانها الرقاق .. ضارت بالجنب تتنهد كاع الطاكسيات لي لمحاتهم عينيها عمرو بالناس ..

رجعات ضارت للجيهة لاخراا حتا لمحات طاكسي اخر .. جرات كل باليزة فايد و ساك صغير فوق ذراعها مضاربة معاه كل مرة يطيح ليها على ايديها حتا تيعصبها و ترجع تهزو بنرفزة .. وقفات قدام الطاكسي لي غير شافها مولاه جا تيجري خدا من عندها الباليزات و حتا هي طلقاتهم معصبة غا مع راسها ..

حلات الباب و ركبات تترخف الشال على وجهها بكترة الصهد .. تتصوط معصبة و الشمس حارقة ليها حنيكاتها الحميمرين ..

ركب مول الطاكسي و ضار عندها بابتسامة تيحقق فيها و تييضحك تتبان ففمو سنة وحدة تتلعب و قال بصوت حرش : فين ان شاء الله

عطاتو العنوان بلا ماتهز راسها فيه.. تتبقشش فتيليفونها تتحاول تركب نمرة جديدة عاد شراتها من المطار ....

ضار مول الطاكسي و توكل على الله و كسيرا نيشان للعنوان لي عطاتو ..

وهي جالسة تتبقشش و تصوط قتلها الصهد .. حلات الكونيكسيون و من بعد بداو تيجيوها الميساجات واحد ورا لاخر و هي غارقة ضرها فراسها الصداع ديال التيلي ..

دارت ليه صيلونص و خلاتهم تا سلاو على راحتهم عاد فتحات اول ميساج و كيف اتجااوب و هو يصوني ليها فايديها ..

بتاسمات وسط تعبها و فتحات الخط و قالت بصوت رقيق غالب عليه التعب : ا حبيبوو ..

جاوبها صوت حرش ناضح و نطق: طيارتك هبطات هادي ساعة .. تشطنت عليك ..

حطات ايديها على جبهتها تتفركها ببطئ و عينيها باقين تيشوفو التحت: عطلوني فالاجراءات و كلشي معطل فهاد البلاد ا خالي .. عيت و الصهد قتلني

جاوبها الخال لي باسم رضوان وقال بقليل من القلق: ياك ا نجمة قلت ليك جلسي حتا نمشيو جميع هانتي بدا يطلع ليك الدم باقي حتا ماكملتي نهار..

نجمة: ا خالي راه بغيت نقدي شلا شغال و نتا باقي معطل غا سمحلي احبيبو

رضوان: صافي ماوقع والو فينك دابا .. ؟

نجمة: فطاكسي ..

بقات مجمعة معاه و ايديها تتفرك فجبهتها عاطياها الصداع .. قطعات مع خالها .. يلاه حطات التيليفون و هو يصوني تاني .. ضحكات فنفسها و جوبات تاني بابتسامة: باقا حية مامتش ...

جوبها صوت قوي تيتشابه مع صوت رضوان : يموت عدوك انجمة . اش هاد الهضرة ..

نجمة: ههه غا تنضحك ا خالي مالك ..

كريم: فينك دابا و اش درتي وووو

غمضات عينيها بابتسامة تتسمع للاسئلة لي مولفة بيهم ديما تابعينها فينما مشات ...

بقات تدوي معاه مدة طويلة حتا وقفات بيها الطاكسي .. هزات راسها فمول الطاكسي و قطعات التيلي و خشاتو فالصاك ..

جبدات الفلوس خلصات لي عليها و بالزايد و هبطات مكمشة عينيها من الشمس الحارقة .. هبط ليها الراجل باليزاتها . شكراتو بادب و جابتهم قدامها و هي واقفة مطلعة عينيها فعمارة طويلة و كبيرة فحي راقي و انيق ...

تنهدات و ضاربات مع باليزاتها حتا طلعاتهم مع دريجات صغيورين قدام العمارة و هي توقف ملي لمحات راجل في متوسط العمر بطابلية زرقة و طربوش فوق راسو جاي تيجري جيهتها و تيقولها بايديه تسنااه ..

وقف عليها تينهج و يضحك و ملامحو المكمشة تدل على تعبو فالدنيا : نجمة بنت سي علي ياك ابنتي ..

حركات راسها بايجاب و دغيا تقلبو ملامحها للقلق و قالت بصوت ضعيف: الله يرحمو ..

- الله يرحمو ابنتي .. عيطو ليا خوالك و اكدو عليا نوجد ليك الدار و راه كلشي واجد .. زيدي ابنتي مرحبا بيك فبلادك زيدي زيدي .. كبرتي تبارك الله

تبسمات ليه و زادت قدامو شادة فسمطة ساكها و دمعة فطرف عينيها دغيا مسحاتها و طلعات فدريجات صغار فاتجاه المصعد ..