نجمة

9

9

ساعة وهي تتسنا .. تهز التيلي و ترجع تحطو و وهما كل شوية يجيبو ليها ورقة تفليها عاد تسينيها و الاجراءات تعطلو و هي صابرة حتا طلع ليها الدم و ناضت تتحيح تاني و صوتها رقيق تيتسمع مجعوق و عندها العربية مفشكلة و تتعكل فيها ..

فوق منها بالظبط و فمكتب كبير جالس شاب فبداية الثلاتينات فكوستار اسود و شوميز بيضة كتافو عراض مخدومين باينين واخدين مساحة تحت من الشوميز .. لحية خفيفة و حجبان عراض و عينين كحلين مشفرين مع شعر رطب محسن حسانة مقادة مع جبهتو وجات مع شخصيتو

تيشوف فالشاشة لي قدامو عاقد حجبانو حتا وقف وقفة وحدة تيقاد فلافيسط و نيشان حل باب المكتب و خرج منو بخطوات ثابتين ...

نجمة واقفة تتجعوق و الموظف تيحاول يسايس معاها و السيكريتي واقف تيحاول يهدي الامور حتا وقف عليها خيال غطاها من اللور و بصوت حرش قاصح تسمع فوذنيها زعزعها

- اش واقع هنايا ..

ضارت مخنزرة طلعات عينيها حتا استقرو فوجهو و رجعات اللور تتقاد فشالها و تسوط: ساعتين و انا تنتسنا بحالا ايخرجو ليا مليار .. اش هاد الخدمة ديال المعاكيز و غا سمحوليا نقولكم السريفيس عندكم زيرو

تقدم الموظف و قال وهو تيشوف فالراجل بقليل من الخوف: موسيو علي المبلغ لي طالبة شويا طالع و محتاج للوقت و لاجراءات وهادشي لي مفهماتش المدام ..

خنزر فيه بنص عين و تلفت جيهة نجمة لي حاضياهم مخرجة عينيها وقال بابتسامة : تفضلي معايا ..

ساطت بنفخة و تمشات قدامو .. دار ليها الطريق لدريجات لي تيطلعو للفوق و طلعات سابقاه حتا جا قدامها وحل ليها باب المكتب: تفضلي ..

دخلات تتدور فعينيها و جلسات فوق كرسي قدام المكتب من بعد ماجلس هو فبلاصتو تيقاد فكمام لافيسط .. طلع فيها عينيه شاف فيها نص شوفة و هز التيلي من حداه و نطق بابتسامة: اش تشربي ؟

نجمة: مكاين لاش .. شكراا ..

دوز الاتصال بلا مايديها فيها و نطق: شي جي دو غونج دابا ..

شافت فيه نجمة ببطئ مطلعة عينيها تتحقق فيه وهو محني على بيسيه تيخربق فيه حتا هز فيها عينيه فجأة لقاها تتشوف فيه .. حنحن و رجع اللور متكي على كرسيه و قال وعينيه تتنقل مابينها و بين البيسي

- مدموزيل نجمة المالكي .. ديزولي بوغ لو غوتاغ مي لو مونتون لي طلبتي شويا طالع و ماواجدش دابا .. الا كان ممكن تصبري معانا واحد الساعة

تأفأفات وهي الوقت ماعندهاش .. ربعات ايديها و ردات : ماعندي ماندير انصبر ..

ببتاسم ليها و رجع تحنا على بيسيه حتا دقات المساعدة و دخلات ببلاطو فيه كاس العصير و كاس القهوة ..

ماشي بزاف باش كانت نجمة شادا فكاسها تتشرب و عينيها تيهربو ليه .. اول مرة يتيرها شي شخص بحال هاكا.. تتحقق فيه وتتحس براسها بحال ديجا تتعرفو و شيفاه فشي بلاصة .. تتهبط عينيها و ترجع تهزهم فيه بلا ماتحس و تبقا ساهية فيه حتا تيحصلها و ترجع تهبطهم تترعد ..

ساعة وهي جالسة حتا بدا الحال تيضلام و الموظفين خرجو و بقا المدير خدام معاها شخصيا و كل مرة يتيري ليها ورقة و يمدها ليها تسيني ...

بقاو على حالهم حتا تسمع الدقان فالباب و دخلات المساعدة : موسيو علي داكشي لي طلبتي وصل ..

جمع الوقفة تيقاد فلافيسط و دار لنجمة بايديه تفضل .. حتا هي عيات بالجلاس و ناضت قدامو تتقاد فزيفها و تنهد مفقوصة على هاد التجرجيرة ..

نزلو للتحت و لقاو جوج رجال واقفين مع باليزة صغيرة قدامهم .. تقدم علي حلها و حسبها قدام عينين نجمة... شكرهم و مشاو بحالهم من بعد ماخداو وراقيهم عاد ضار عندها ماد ليها الباليزة و نطق

علي: ها فلوسك امدموزيل نجمة .

شدات من عندو الباليزة حلاتها و بدات تتهز فالفلوس و تحسب و تخشي فساكها حتا كملاتهم و نطقات : ميغسي بوكو سي علي .. بسلامة ..

تلفتات شادا فساكها باغا تمشي و هو يجبدها من مرفقها بالزربة مرجعها للور هاز حاجبو : بلاااتي .. فين غادا ..؟

شدات فقلبها مخلوعة و هزات فيه حاجبها : كيفاش فين غادا .. ؟

طلق منها و رجع اللور: من نيتك اتخرجي بالملاين فساكك مخيفاش ..

نجمة: و شكون عارفني هازا شي حاجة ؟

علي: راكي خارجة من بنك واقيلة اش اتكوني تديري فيه مثلا ..

ضربات على راسها تكلخات فهادي و رجعات نطقات بجرئة : عادي قادة براسي .. شكرا مرة خراا ..

عاد اتلفت تزيد و هو يجرها تاني حتا جات قدامو و زير على مرفقها و هز عينيه فالمساعدة لي واقفة تتشوف فيهم: جيبي تيليفوني من المكتب..

مشات المساعدة تتجري تجيب ليه تيليفونو فحين هو بقا شادها كارز عليها تيشوف لبعيد حتا نزلات ليه تيليفونو عاد شاف فيها و نطق بصرامة: يلاااه ..

استغربات نجمة لهاد الشخص و لكن ماتنكرش عجبها تصرفو و بان مرجل معاها ... شدات فساكها قلبها تيضرب من غير سبب و زادت قدامو سابقاه حتا رجع شد فيها جابها حداه ...