نجمة

26

صباح جديد حلات فيه عينيها ... الجسد ناعس و ساكن و العقل حاير .. دغيا ناضت ساست العكز وهزات شالها دارتو فوق راسها... عاد اتخرج بان ليها تيليفونها محطوط فوق الكوافوز وهو و سوارت دارها ... هزاتهم بالزربة و خرجات من البيت .. الصقيل و كلشي ناعس . ضربات على الساعة لقاتها 7 الصبااح ..

تمشات على طراف صباعها حتا للباب و خرجات سداتو وراها و موقفات حتا لباب العمارة .. شدات طاكسي بالزربة نيشان لدارها.. خلات مول الطاكسي تيتسنا حتا هبطات ليه الفلوس عاد رجعات طلعات سدات عليها دارها...

قصدات نيشان الدوش طرفات حالتها و بدلات حوايجها لي عافتهم عاد خرجات شربات واحد دوليبران وتخشات فبلاصتها تتفكر ... عاد بدات عندها السهرة وعاد بدا التفكير ديال بصح ... علاش كذب ... علاش عطاني وجه و صدق عندو وجه اخر... وكيل الملك شي حاجة ماشي ساهلة و مهنة صعيبة كيف كان الحال راها قارية القانون و عارفة اش كاين ...

عيات بالتفكير و نسات تيليفونها لي تفركع بليزابيل .. عاد رضات البال و هزاتو تفكك حريرتها مع خوالها ... مكدباتش وقالت ليهم بأنها مريضة و كانت فالمشفى ...تخلعو و سولو اسئلتهم المعتادة حتا تهدات نجمة و قطعات معاهم ..دارت ليه سيلونص و تلاحت نعسات ...

* خرج من البيت تيتكسل... قصد الكوزينة نيشان لقا مي نعيمة واقفة تتفيض الحليب ... تكسل حتا خفف عضامو و حنحن عاد قال: صباح الخير مي نعيمة

تلفتات وجوباتو بابتسامة: صباح النور ولدي.. نحط ليك الفطور

علي: واخاا.. نجمة باقا ناعسة؟

نعيمة: مشيت نطل عليها ملقيتهاش .. واقيلة مشات

عقد حجبانو مستغرب و قال وهو غادي للبيت فين كانت ناعسة: كيفاش مشات..

دخل للبيت تيقلب عليها و فعلا ملقهاش ..رجع لبيتو هز تيليفونو تيصوني ليها و والو... صونا مرة و جوج و ثلاتة حتا دخلو الشك و خرج للكوزينة

علي: مي نعيمة.. مقالت ليك نجمة والو ؟

نعيمة: اش اتقوليا اولدي.. مشفتها كاع فاش مشات.

علي: زعما البارح مدويتو فوالو... مقلتي ليها والو

نعيمة: دوينا اولدي و نقات معايا العدس و جمعات معايا.. الله يعمرها دار اولدي غزالة ديك البنت ..

علي: اييه واخا واخا .. و شنو اخر

نعيمة: سولتني على شي بنكة ما بنكة مافهمت والو

عقد حجبانو عاد بدات توضاح ليه الصورة: اييه و اش قلتي ليها..

نعيمة: سولتني على خدمتك قلت ليها ..

ضور راسو تيسوط : اااف امي نعيمة .. مقدرتيش تصبري زعما حتا نسبقها ليها اناا ياك .. ولكن الغلط ديالي لي ماوصيتكش ... مهم لبسي جلابتك نديك للفيلا ..

مشا رجع للبيت خلاها حايرة تتشوف فيه مافاهمة والو ... خلات داكشي كيف هو و خشات لي خاصو يتخشا فالثلاجة .. لبسات جلابتها و تسناتو حتا جا و خرجو فاتجااه الفيلاا...

توسط النهار و فاقت نجمة تتكسل... رجع عليها العيا و ضرها راسها و حتا دواها مجابتو ... كرشها تتبكي بالجوع و الكانة مكيناش ..

ناضت تتعكز للحمام غسلات وجهها و قدات حاجتها و تفقسات ملي لقات دم الحيض جاتها و ممعولاش عليها ... دارت فوطة صحية و بدلات حوايجها عاد خرجات للكوزينة وجدات متاكل و جلسات عليه حتا كملاتو عاد رجعات فيها الروح...

شربات دوليبران اخر و رجعات تخشات فبلاصتها عيانة.. اكتئاب خطير جاها و حزن و غمة و عيا طاحو عليها من السما باغا غا تنعس و تبكي ...

داكشي لي دارت .. اول حاجة عيطات للمحل تأكدات ان كلشي مزيان عاد هزات بيسي دارت فيه فيلم تركي شبعات عليه بكا من دون سبب ... وهاكا دوزات نهارها غا الافلام و البكا حتا شدها الوجع و بركات تقلا فبلاصتها و تصبر راسها حتا تهدات و نعسات ..