واقفة جنب زينة تتمسح فكيسان و تحطهم جنبها فالبلاطو و الحاجة واقفة بعيد تتقاد فالحلوة مع البنات لي جاو مع التريتور.. تتهضر مع زينة بشوية و تضحك حتا وقف عليهم علي هاز جوج كراطن عامرين فواكه مشكلة . حطهم جنب نجمة لي قالت مستغربة : علاش جبتي هادشي .. راه كلشي جابو تريتور .. زايديون الفيرمة كلها خيررد تيسوس ايديه و يضحك: وراه هادشي من الفيرمة .. هاد الصنادق تيخرجو هاكا للمارشي شفتهم و جبت منهم هاد الجوج لاتحتاجوهم ..
دوزات ايديها على كرطونة و ردت: احسن مادرتي .. ااه قبل مانسا كن غير جبتي مي نعيمة اتبغي مسكينة تحضر لصفاء ..
قبل ماتسمع جوابو سمعات صوت الحاجة كي السم دخل لقلبها
الحاجة: نعيمة عندها ولادها و حبابها تدوز معاهم العيد مغاديش تجي تقابلك نتي
هبطات نجمة راسها باسى على المعاملة لي طلعات ليها فراسها .. هزات عينيها فعلي لقاتو تيخنز فمو تيعض فشفايفو مفقوص و ماعندو مايدير.. يعاير مو قدام مرتو يطلع مسخوط . يسكت على الاساءة لمرتو يطلع مادايرش ليها الحساب... الحاصول علي جا بين نارين و حصل حصلة ديال القلب معرف مايدير .. عتقاتو نجمة من تفكيرو فاخر لحظة بلمسة ايديها على كتفو و قالت بابتسامة: سير لبس حوايجك راه وجدتهم ليك انا انمشي نشوف صفاء فين وصلات راه مبقا والو و يوصلو ..
شدات فيه تتشوف قدامها و خرجو قدام عينين الحاجة لي تتخنزر من التحت للتحت و الغيرة من تعامل علي مع مرتو مطيحة ليها الكتاف و منوضة ليها القلب مخلية سمها تيقطر على نجمة كل ما جات قدام عينيها ..
دقات فالباب دقة خفيفة و دخلات لقاتها جالسة قدام المرايا و بابيليز فإيديها تتشوف و تهندس .. ضحكات نجمة و قالت واقفة وراها: لالة العروسة .. فين وصلتي ؟!
ساطت صفاء و ردت: معرفتش واش نبوكلي شعري و لا نخليه مسرح ..
نجمة: امم الصراحة تيجيك مسرح زوين ولكن بوكلي ليه غير شوية من الجناب و حليهم بايديك
صفاء: كي ندير ليه ؟
نجمة: اري نوريك ..
شدات من عندها البابيليز و بدات تتبوكلي ليها بعض الخصلات و تسرحهم بصباع ايديها حتا سالات و قالت تتحيد البريز من الضو: شوفي دابا.. جاك غزاال ..
وقفات صفاء تتشوف فشعرها من اللور فالمرايا: جا زوين عجبني ..
نجمة: وا مسحي شويا داك العكر نتي درتي بحالا غادا للموسم ..
صفاء: وايلي جا خيب ..
نجمة: جاك زوين غا نقصيه خليه خفيف و مسحي داك الكحل خلي شوية السر يبان فيك ... غا مسكارا و شوية الفغاجو قادين الغراض
جلسات صفاء معوداتش معاها الهضرة .. مسحات ديك الخريطة لي كانت دايرة فوجها و خلات غا شفارها طالعين بماسكارا مع عكر خفيف بانت طبيعية ..
ČTEŠ
نجمة
Romance[ ] قصتي هاد المرة من قاع الخابية حكاية من قلب الواقع فيها معاناة كتيرة بقدر حب استااطع الزمان يتلاعب بيه و يخليه عرضة للناس يتحكمو فيه .. .. من كل فن طرب و لعشاق الحكايات الواقعية هنا اتلقاو راسكم و اتسافرو معايا فبحر الدراما المحبوكة بطريقة شعبية...