مرت الأيام و الشهور و انا تعلقي بـ وليد بقى ماشي في زياده ، بقيت مهوسه بيهو عديل ، لمن يمشي الشغل بكون منتظراهو جنب الباب و اول ما يجي بمسك يدو و بمشي معاهو غرفتو ، مرات بجري اجيب ليهو مويه و عصير ، بحاول أخلق مواضيع من ماف عشان اقعد معاهو ، مرات بعصر ليهو رجلينو و مرات لمن يقول مصدع بعمل ليهو مساج بزيت السمسم ، تعامل أهلو معاي ما إتغير و كل يوم انا عامله ليهم شغب و كل يوم أمو و أخواتو بجوطوا فيني و يلبعوني ساي زي الدلوكه ، مع ذلك ما قاعده أبكي بضحك بس و بعمل الفي راسي كيتاً ليهم ، كنت شافعه فرفوشه و جني ضحك و عنيده و ما بسمع الكلام ، يدقوني بيجاي يلقوني بهبش في حاجه تانيه بيجاي أمو دي لمن بقت تقول ليهو بلييييز شوف لينا حل للورطه دي ، البت دي ما بتنقدر ، غلبتني عديل ، ما بقدر عليها انا تعبتني و هلكتني ، لو قعدت معانا أكتر من كدا أنا يا جاني ضغط يا مُت بـ سكته قلبيه ، أهلو كلهم كانوا بشكوا مني ، أبوهو الوحيد الما حصل بيني و بينو موقف لأنو معظم وقتو برا البيت أو مسافر ، ليهو حق يطفش من البيت لأنو مرتو ناديه دي لا تطاق ، مره نقناعه و صوتها زي الرعد ، لمن يكون قاعد بتعدمو الراحه و بتقعد تنق ليهو في راسو كدا و تشاكلو لحد ما يطلع ليها من البيت ، وليد كان بحذرني قبل ما يمشي الشغل ، بقول لي ما عايز زول يشكي لي منك ، انتِ صغيره بس ما لدرجة إنك تتصرفي تصرفات زي دي و تزعجي ناس البيت كلهم و تخليهم يشكوا منك ، كنت بقول ليهو حاضر ، كويس ، بس أول ما يطلع روح الشغب و العناد بتسيطر علي ، بقلب ليهم البيت فوقاني تحتاني و بخليهم كلهم يكونوا جايطين و جاريين وراي و أنا بضحك ساي ، و لمن يجي وليد و يشكوني ليهو بنكر حطب و بكتل ليهو حيلي 😂 يوم صحيت لقيتهم ليك كلهم جايطين و شغالين يرتبوا في البيت ، سمعت ناديه قالت لـ بتها لين هسي حبوبتكم الفقر دي جايه لشنو؟
لين قالت ليها وطي صوتك يا ماما ، بابا لو سمعك حيزعل منك ، قالت ليها ماهو 24 ساعه قالب خلقتو دي و عامل نفسو زعلان مني فخليهو يزعل ساي و يتم المقصر ....
بعد الضهر كدا سمعت صوت سلام جاي من تحت ، طوالي فتحت باب غرفتي و نزلت عشان أشوف الجا منو ، لمحت مره كبيره كدا عندها شلوخ و شايله ليها عصايه بتسلم على أبو وليد ، بعدها سلمت على أسامه ، لمن وقفت جنب لين و علا ، لين مدت ليها يدها ، زحتها ليها و قالت ليها اتعلمتوا الجفا دا من أمكم مش ، ضمتهم عليها و فكتهم ، ناديه قالت ليها هسي أنا مالي يا عمتي؟
قالت ليها عارفه نفسك مالك و مدت يدها و سلمت عليها ، بعدها قعدوا و ضيفوها ، ناديه شكلها بتكره المره دي عشان كدا كانت بتلوي في خشمها و انا بضحك على حركاتها دي ، لمن لمحتني بضحك عليها حمرت لي و عاينت لي بغيظ و أشرت لي عشان أمشي من هنا ، بس ما اشتغلت بيها و لسه كنت بضحك عليها ، فجأه جاني صوت بقول البنيه ديك منو؟
لمن عاينت لمصدر الصوت لقيتها دي حبوبتهم ، كلهم سكتوا و ما عرفوا يقولوا ليها شنو ، قالت لي تعالي ، لمن مشيت ليها سلمت علي و بقت تعاين لـ لبسي و الطريقه المسرحه بيها شعري بإستغراب ، قالت لي إنتِ شغاله هنا؟ قلت ليها لا لا ، قالت لي سمح إنتِ منو؟
قلت ليها آني دهبايه بت جنيد و أمي سعديه ، قالت لي جيتي من وين؟
قلت ليها من بارا ، عاينت لـ أبو وليد بإستغراب و تاني رجعت عاينت لي و قالت لي أهلك وينهم ما شايفاهم؟ قلت ليها مافيشين ، قالت لي جيتي براك؟ قلت ليها لا لا جيت مع وليد و أيمن ....تاني عاينت لأبو وليد ، قال ليها يا أمي دي قصه طويله بحكيها ليك بعدين ، أم وليد قالت لي واقفه منتظره شنو! أمشي من هنا!
اتحركت من جنبهم و لمن وصلت السلم مديت ليها لساني و عملت ليها حركه بـ معنى "بيييس عليك " وقفت على حيلها و كانت جايه علي ، طوالي جريت بس سامعاها جاطت و قالت لي أصبري لي يا قليلة الأدب يا أميه يا جاهله يا متخلفه يا عفنه يا بتاعة الغنم و الإبل ، وصلت غرفتي و أنا بضحك ساي ، بعدها بقيت ألفلف في شعري و لمن ما عرفت أسرحو خليتو زي ما هو ، قلت البيت دا مليان ملل ، الواحد يحس نفسو مسجون عديل ، قعدت براي مسافه بعدها نزلت من السرير و نمت على الأرض ، صحيت على صوت بقول لي يا بنيه قومي نومي فوق ، لمن فتحت عيوني لقيتها حبوبتهم ، قمت على حيلي و قعدت على السرير و بقيت أعاين ليها لأنها بتشبه حبوبتي ، قلت ليها إنتِ بتشبهي حبوبتي مستوره ، قالت لي والله؟
قلت ليها ايي ، قالت لي أنا ذاتي إسمي مستوره ، جات قعدت جنبي و ختت يدها على راسي و قالت لي يعني إنتِ مرة وليد! والله صغيره لكن نقول شنو ، قعدت ونستني مسافه و سألتني عن أهلي و حياتي و كدا و طلعت ، المسا لمن وليد جا راجع انبسط شديد لمن شاف حبوبتو ، من جا ما إتحرك من جنبها و بقى يتونس معاها ساي و انا من قبيل منتظراهو يجي ، مشيت قعدت معاهم ، وليد لمن شافني قال لي كيفك تمام؟
قلت ليهو كويسه ، تاني رجع يتكلم مع حبوبتو ، قالت ليهو والله يا وليد البت دي صغيره و لسه جاهله ، قال ليها اها اعمل شنو يا حبوبه! ما كان قدامي حل تاني لو ما عملت كدا كانت هسي في عداد الموتى!
حبوبتو عاينت لي و قالت لي يا حليلك والله ، بعد مسافه وليد قال ليها عن إذنك ماشي أصلي المغرب و جاي ، قالت ليهو ايي امشي يا ولدي ما تفوت صلاتك و انا ذاتي قايمه أصلي ، بعد ما وليد طلع و حبوبه مستوره مشت تصلي انا ذاتي قمت من مكاني و مشيت غرفتي.....
المهم عدت الأيام بنفس الروتين و مروا شهرين فيهم علاقتي بـ وليد ما نقصت بالعكس أنا كل يوم بتعلق بيهو زياده لدرجة اني بقيت أحس انو وليد ساكن جواي ، طبعاً حبوبه مستوره كانت بتقيف معاي لمن ناديه و بناتها يشاكلوني ، يوم لين جاطت معاها و قالت ليها بتفضلي الغريبه دي علينا نحنا؟
قالت ليهن إنتن ذاتكن كما متخلفات و جاهلات ساي ، تختن راسكن بـ راس الطفله دي و كلكن تقلبن عليها حتى أمكن ؟ هسي ما بتخجلن كبار كدا تعادن ليكن شافعه؟
لين قالت ليها شافعه تحترم نفسها و تترزع هناك في غرفتها ، نحنا ما مجبورين عليها و ما مضطرين نتحمل شغبها و قلة أدبها دي ، حبوبه قالت ليها إنتِ وقت متضايقه للدرجه دي ليه ما تمشي بيت راجلك و ترتاحي منها؟ لسانك الطويل دا و لئامتك هم الخلوا راجلك يشاكلك ، ناديه قالت ليها يا عمتي دي بتي و دا بيت أبوها و بالتالي بيتها! تقعد فيهو زي ما عايزا ، هي لا رخيصه لا هينه عشان نرجعها ليهو بعد ما أهانها و شاكلها ، قايلها ما عندها أهل ولا شنو! دي بتي و دا بيتها إن شاء الله تقعد 100 سنه ماف زول يفتح خشمو معاها ، حبوبه قالت ليها ايي واضح انها حتقعد 100 سنه بجنس طريقتها دي ، المهم في اليوم داك حصلت جوطه شديده و انا كل ما لين أو علا يعاينوا لي بكاويهم و هم بتغاظوا مني ....
يوم و انا قاعده في الغرفه جاتني حبوبه ، قالت لي تعالي اسرح ليك شعرك السمح دا ، قلت ليها بتعرفي تمشطيهو لي زي ما هو معمول؟
قالت لي ايي بعرف ، زحت توبها عن راسها و قالت لي عايني المساير دي ، زمان كنا بنسرح زيكم كدا و لـ هسي بنسرح كدا لكن ناس البندر ديل تسريحهم بختلف عننا ، المهم قعدت معاي و سرحت لي شعري و ركبت لي فيهو الودع ، بعد ما إنتهت لي منو و مشت ، فجأه كدا وليد جا داخل ، لمن شفتو ما صدقت لأنو قاعد يجي متأخر ، وقفت فوق في السرير و قلت ليهو ولييييد ، قال لي يا هلا يا هلا بالأموره و جا وقف جنب السرير ، نزلت من السرير و قلت ليهو الليله جيت بدري ، قال لي ايوه ، كان شايل ليهو كيس أسود و كبييير ختاهو في السرير و قعد ، قال لي شوفي جبت ليك شنو ، سرعه سرعه ركبت في السرير و شلت الكيس و فتحتو ، لقيتهم فساتين ، كلهم كانو ساده ، سكته ساي و ما قلت ليهو حاجه ، قال لي ما عجبوك ولا شنو؟
قلت ليهو ليه ما فيهم شجر و ورود و الحاجات زي المرسومه في فستاني دا ، قال لي نوعية فساتينك دي ما متوفره هنا و بعدين الفساتين الجبتها ليك دي حلوه شديد و راقيه ، رجعت ليهو الكيس و قلت ليهو ما عايزاهم ، قال لي حـ ازعل منك ، معقوله ترجعي لي حاجه انا جبتها ليك؟
سكت و هو عمل نفسو زعلان مني ، شلت منو الكيس و قلت ليهو خلاص حـ أشيلهم ، إبتسم و قال لي بالجد إنتِ شافعه ، ختيت الكيس في الدولاب و جيتو راجعه لقيتو سرحان و مبتسم ساي ، طقطقت ليهو أصابعي و قلت ليهو سرحان وين؟
إبتسم و قال لي لا ما تشغلي بالك ، قلت ليهو من جيتني داخل بتتبسم ساي زي الراعي لمن يضيع غنمو و بعدين يلقاهم ، ضحك بصوت عالي و قال لي إنتِ ما عندك حاجه غير الغنم و الإبل؟ 😂😂
قلت ليهو قول لي بتتبسم مالك؟ قال لي ماف شي ، قلت ليهو حلفتك بالله كان تقول لي بتتبسم مالك ، آخد نفس عميق و هو لسه مبسوط قال لي و أخيراً حلينا المشاكل البيناتنا و قدرنا نتفاهم ، أخيراً حنكمل مع بعض و بإذن الله حـ ناخد خطوه جاده
قلت ليهو ما فهمت كلامك ، قال لي ما مشكله ما تشغلي بالك ، وقف على حيلو و مشى ، أول ما وصل الباب وقف و إتلفت علي ، قال لي نسييت حبوبه دي من قبيل كانت بتنادي عليك ، أمشي ليها ، قلت ليهو "تمام "، إبتسم و قال لي سرقتي كلمتي ، قلت ليهو ما وحيدك البتقول "تمام "، قال لي لكن إنتِ ما كنتِ بتقوليها ، قلت ليهو منو القال ليك اني ما بقولها؟ آني من ولدوني بقولها لكن إنت ما حصل سمعتها مني إلا هسي ، ضحك و طلع ، طلعت وراهو طوالي و مشيت لحبوبه تحت ، كانت بتحضر قالت لي تعالي سرحي لي شعري دا ، قلت ليها سمح ، شلت "الخُلال" و بقيت أسرح ليها و هي تونس فيني ساي ، شويه كدا مدت لي الريموت و انا الوقت داك ما كنت عارفه اسمو شنو ، قالت لي امسكي النصيب دا و غيري لي القناه دي ، أجهزتهم دي أنا ما بعرف ليها ، قلت ليها آني ذاتي ما بعرف ، جات ناديه و قالت لي بليييز بليييز ما تقولي كلمة "آني " دي تاني ، قولي أنا ، أنا ، لكن ما تقولي الكلمه البترفع الضغط دي! كلامك كلو بشع و مستفز ، قاعده معانا ليك شهور و لسه ما بتعرفي تتكلمي كويس؟
حبوبه مستوره قالت ليها تتكلم ليك كويس كيف يعني؟ عايزاها تقعد تتراطن زيك الزمن كلو! هسي إنتِ بليييز ولا إبليس و هاي و أوماجيت و لا شنو ما بعرف البتقوليهم ديل في زول حاسبك عليهم ولا قال ليك بتقولي في شنو؟
قالت ليها دا إسمو إنجليزي يا عمتي ما كلام خارم بارم ساي ولا لغة ناس باديه و بعدين ماف زول حيقول لي انتِ بتقولي في شنو لأنهم فاهمين انا بقول في شنو ، البتكلمها دي لغة العصور الحديثه و ما بفهموها إلا الناس القاريه و مكمله تعليمها 😌😎
حبوبه مستوره قالت ليها التعليم البخليك تتراطني كدا و تلولوي في خشمك الزمن كلو أخير عدمو 😏
ناديه عاينت لينا بشماته كدا و مشت ، حبوبه مستوره قالت لي ما تشتغلي بكلامها ، قلت ليها ذاتي ما قاعده اشتغل بيها و ما بسمع كلامها ، قالت لي هي ذاتا لئيمه و ما تستاهل يسمعو كلامها.....
المهم يوم بالصدفه سمعت ناديه بتقطع في حبوبه مستوره مع بناتها لين و علا ، سمعت كلامهم كلو للنهايه و مشيت نقلتو لحبوبه بالشوله ، كنت شماره و بتاعة قوالات 😂🤣 بقيت كل مره انقل الكلام لحبوبه و هي تزعل قدرتها لحد ما يوم اتشاكلت مع ناديه و قالت ليها الكلام البتقوليهو عني كلو واصلني ، ناديه قالت ليها كلام شنو أنا متين اتكلمت عنك؟ حبوبه مستوره قالت ليها مش قلت عني كدا و كدا و كدا؟
ناديه سكتت مسافه و تاني قالت ليها No No انا ما قلت كدا و.....حبوبه قاطعتها و قالت لـ ولدها يلي هو أبو وليد يشهد الله مرتك قالت الكلام دا عني ، وليد قال ليها إنتِ القال ليك الكلام دا منو يا حبوبه ولا سمعتي أمي؟
حبوبه عاينت لي بس قالت ليهو سمعتها كم مره بتتكلم عني ، المهم بعد الجوطه الحصلت دي كلها كل واحد رجع غرفتو و انا أول ما دخلت وليد جا لاحقني ، دخل و قفل الباب ، قال لي إنتِ النقلتي كلام أمي لحبوبه صح؟
قلت ليهو بري!
جاني قريب و هو صاري وشو ، مد لي أصبعو و قال لي انا ما بحب الكذب ، إياك تكذبي علي ، قال لي بنبره حاده إنتِ النقلتي الكلام ولا لا؟
نزلت راسي و هزيتو ليهو بالإيجاب ، قال لي أنا مش نبهتك؟ قلت ليك بطلي أمورك دي ولا ما قلت ليك؟
قلت ليهو قلت لي ، طبعاً كنت خايفه شديد عشان كدا هو اتنهد و إتكلم معاي بهدوء و قال لي تاني ما تعملي كدا و خليك زوله واعيه و بطلي حركاتكِ الطفوليه دي! قلت ليهو طيب.....
المهم الأيام عدت زي بعضها و انا حركاتي ما خليتها بس المره دي كنت حريفه شويه و ما كنت بعمل حاجه غلط قدام وليد 😂
يوم صحيت من النوم و جسمي كلو مكسر ، ما عارفه نفسي مالي ، بعد ما فطرت كدا مشيت الحمام و اتفاجأت بـ دم ، قلبي بقى شغال دق دق و ما عرفت أتصرف كيف ، أيوه انا عارفه دا شنو ، زمان حبوباتنا و أمهاتنا كلمونا عنو بس انا من شدة الصدمه مخي قفل و اتملكني الخوف ، قفلت الغرفه علي و اليوم كلو ما طلعت برا الغرفه كنت برجف و ببكي ، حبوبه جات دقت لي الباب مسافه و بقت تنادي علي لمن ما فتحت ليها مشت نادت وليد و بقوا يضربوا لي في الباب ، شويه كدا وليد نادى الشغاله و قال ليها جيبي لي المفتاح مشت جابتو ليهو و طوالي فتح الباب و دخل علي هو و حبوبه ، لقوني قاعده على الأرض و لوني مخطوف ، وليد جاني و قال ليك مالك في شنو؟
سكته ما رديت عليهو ، حبوبه برضها جات قعدت معاي على الأرض و قالت لي مالك يا بتي الحاصل عليك شنو؟
بعد مسافه قلت ليهم ماف حاجه مصدعه بس ، وليد قال لي طيب قاعده على الأرض مالك؟ قلت ليهو انا دايماً بقعد على الأرض ، حبوبه مسكتني من يدي و قالت لي خلاص قومي من الأرض ، قلت ليها لاااا لا ما عايزا اقوم ، طبعاً قلت الجمله دي بصوت عالي لمن حبوبه و وليد إستغربوا ، قالت لي بسم الله مالك يا بتي؟
قلت ليها عايزا أقعد هنا ، قالت لي ما عايزا تتغدي معانا؟ قلت ليها امشوا هسي بلحقكم ، حبوبه قالت لي سمح بكلم الشغاله تجيب ليك بندول ، طلعوا مني و هم مستغربين و ما عارفين أنا مالي! !، بعد ما قفلوا الباب ، قمت من مكاني طلعت لي ملابس نضيفه و دخلت الحمام استحميت و غسلت ملابسي ديك و شلت لي حبة مويه نضفت بيها المكان الكنت قاعده فيهو و نشفت السراميك ، بعدها طلعت من الغرفه ، لمن وصلت السلم بقيت ماشه براحه براحه و رجليني ديل بضربوا في بعض لمن وصلتهم كانوا قاعدين في سفرتهم بتغدوا ، حبوبه قالت لي تعالي اقعدي هنا ، لمن مشيت ليها قلت ليها ما عايزا اقعد كدا مرتاحه ، وليد بقى يعاين لي بإستغراب! !قال لي يعني حتاكلي واقفه؟
قلت ليهو ايي ، حبوبه قالت لي تقيفي ليه اقعدي يا بنيه! ناديه قالت ليهم المشكله وين يا جماعه خلوا البت على راحتها ، تاكلو واقفه أو قاعده أو راقده على كيفها No Problem !!
بقيت واقفه و باكل و ذاتو ما باكل زي الناس ، كنت متوتره شديد و يديني برجفوا عديل ، و وليد كل شويه يعاين لي بإستغراب ، قلت لـ حبوبه آني شبعت ، قالت لي متين أكلتي لمن تشبعي؟ يا بت هووووي إنتِ الليله ما طبيعيه ميروده ولا شنو؟ قلت ليها لا كويسه مي ميروده و طوالي جريت من جنبهم ، كانوا كلهم بعاينوا لي ! لمن وصلت السلم بقيت أمشي مع الحيطه ، يعني مديه ضهري لـ حيطة السلم و مدياهم وشي من قدام لحد ما وصلت فوق و إختفيت من قدامهم ، دخلت غرفتي و قفلتها علي ، رقدت في السرير و قعدت أبكي ، شويه كدا وليد جا داخل ، قعد جنبي في السرير و قال لي ما عايزا تحكي لي المضايقك شنو؟
كنت لسه راقده و مغطيه وشي و ببكي ، جراني و قعدني على السرير و قال لي يا زوله كدي قولي بسم الله و احكي لي مالك؟
برضو ما رديت ختيت راسي على كتفو و مسكتو قوي من قميصو و بكيت كويس ، شويه كدا حبوبه جات داخله قالت لـ وليد البنيه مالا؟
قال ليها والله ما عارفها يا حبوبه ، شوفة عينك بتبكي ساي ، قالت ليهو سمح كدي أطلع و خليني معاها ، فعلاً هو طلع و هي جات قعدت جنبي ، بقت تسمح على شعري و تقول لي خلاص كفايه يا بتي ، سكتت مسافه بعدها قالت لي دي حاجه طبيعيه بتحصل مع أي بت في عمرك دا ، في البدايه استغربت هي عرفت كيف! قلت ليها دا معناهو اني بقيت مره خلاص ؟
قالت لي دا المخوفك و المبكيك؟ البلوغ حاجه عاديه والله بس هسي إنت ما حـ تحسيهو كدا ، شي طبيعي تخافي و تتوتري من التغير الحصل ليك فجأه و من التغيرات الحتحصل ليك لـ قدام ، بس أول ما تكبري شويه و تبقي واعيه حـ تتقبلي التغيرات دي و تشوفيها حاجه عاديه ، هسي أهم شي تهتمي بصحتك و تاكلي و تشربي كويس و خليك مطمنه ماف حاجه بتخوف ، ضمتني مسافه عليها بعدها قالت لي ماشه لـ علا هسي بجيك راجعه ، فعلاً جاتني بعد شويه ، زحت توبها و طلعت لي حاجه كدا لونها أبيض ، قلت ليها دا شنو؟ قالت لي بري ذاتي ما عارفه بستخدموه كيف ، كلمت علا و هي أدتني ليهو عشان أجيبو ليك ، لكن قلت ليها تعالينا هسي بتجي ، فجأه علا جات داخله و هي بتعاين لي بغيظ كدا ، قالت لي ان شاء الله بعد دا نخلي عمايلك الطايشه و طفولتك المتأخره الكنتِ بتزعجينا بيها ، شالت البتاع من حبوبه و قالت لي تعالي معاي جوه الحمام عشان أوريك بستخدموه كيف ، في البدايه إترددت بس حبوبه قالت لي أمشي معاها ، فعلاً مشيت معاها و ورتني طريقة إستخدامو و طلعت بس قبل ما تمشي قالت لينا تاني ما تجوا تشحدوني حاجه ، المهم بعد ما علا مشت حبوبه قعدت إتكلمت معاي مسافه و طلعت ، عدت الأيام و أنا شبه بقيت إنطوائيه و خليت الشغب بتاعي ، عشان دخلت مرحله جديده انا رافضاها رفض قاطع بالإضافه لإنو ناديه أم وليد بقت كل ما أعمل حاجه غلط بتقول لي احسن تخلي حركات الطفوله دي و تعيشي الواقع البقى فيك ، بعد دا إنتِ ما شافعه 😏 ، كلامها كان بضايقني و بيوجعني شديد ، بقيت معظم وقتي بقضيهو في غرفتي ، مرات بزهج و ببكي من دون سبب ، حبوبه هي الوحيده الوقفت معاي ، لمن تلقاني ببكي بتسكتني و تقعد تحكي لي قصص قديمه ، هي الوحيده الجربت معاي الشعور و فهمت أنا ماره بشنو ، بقت تجيب لي إحتياجاتي شهرياً ، و مهتمه بي شديد ، طبعاً وليد ما كان فاهم شي و كل يوم بجي يسألني انا مالي و ليه فجأه كدا اتغيرت ، كنت بقول ليهو ماف حاجه و بس....
يوم بليل أثناء ما أنا نايمه حسيت بزول ممشي يدو في وشي و انفاسو قريبه مني ، لمن فتحت عيوني شفت زول بس وشو ما كان واضح، كان لافيهو بـ شال و قريب مني شديد ، قمت مخلوعه و بقيت أصرخ بأعلى حس عندي و هو طوالي فتح الباب و طلع ، أول ما هو طلع بيجاي ناس البيت كلهم جوا داخلين بيجاي ، أولهم وليد ، قال لي في شنو؟
كنت لسه بصرخ و برجف ، جريت على حبوبه و بقيت اقول ليها هسي كان هنا هسي كان هنا ، قالت لي منو هو؟
قلت ليها ما عارفه منو بس في زول كان هنا و هسي طلع ، وليد طوالي طلع و قال لي حـ أشوف لو في زول ، عده مسافه و جا راجع تاني و قال لي ماف زول و الحراسه مشدده يعني ماف طريقه عشان يدخل بيها زول أو يطلع بيها من البيت من دون ما الحرس يشوفوه!! أسامه قال ليهو يمكن كانت بتحلم ساي ، جايز تكون شافت ليها كابوس ، قلت ليهو لا ما كان كابوس أنا شفتو بعيوني ، قال لي طيب شكلو كان كيف؟
قلت ليهو ما عارفه ، عشان الضلام ما قدرت اشوف كويس و هو كان مغطي وشو ، عاينوا لبعض و سكتوا ، ناديه قالت ليهم عليكم الله خلونا نمشي ننوم بعد دا ، البت شافت ليها كابوس و قطعت بيهو نومتنا و هسي بما انو ماف شي خلونا نرجع نكمل نومنا ، بعد ما هم مشوا قعدوا معاي حبوبه و وليد ، حبوبه مستوره قالت لي لو بتخافي ارح نومي معاي ، وليد قال لي ايي أمشي نومي مع حبوبه ، فعلاً مشيت نمت معاها و بقيت أنوم معاها على طول ، الغرفه ديك خليتها ، يوم كنت في المطبخ لقيت عصير منقه كبيت لي و لـ حبوبه ، شلتهم و مشيت ليها في غرفتها و بقينا نشرب في العصير ، شويه كدا وليد جا داخل و قال حبوبه عندي قميص أسود ما شفتيهو؟
قالت ليهو اسأل علا لأنو أمبارح شفتها لملمت كمية من الملابس و ودتهم للشغاله عشان تغسلهم ، قال ليها تمام ، طلع كدا و تاني جا راجع و قال لـ حبوبه في عصير منقه؟ قالت ليهو ما عارفه جابتو لي دهبايه دي ، قلت ليهو ايي في ، حبوبه قالت ليهو خلاص انت أمشي شوف قميصك وين و هي بتجيبو ليك ، لملمت الكبابي و مشيت غسلتهم و كبيت عصير لـ وليد و مشيت ختيتو ليهو في غرفتو ، لمن جيت طالعه هو جا دخل ، مسكني من يدي ، قفل الباب و دخلني معاهو جوه ، قال لي للمره المليون في شنو يا زوله؟ مالك متغيره في الفتره دي؟
قلت ليهو الإتغير فيني شنو؟ قال لي ما كنتِ كدا! وين شغبك و أمور الشفع الكنتِ بتعملي فيها ديك؟
قلت ليهو أمور الشفع دي مش إنت قلت لي بطليها؟ هسي انا خليتها و عايزا أكون زوله واعيه ، هز لي راسو و قال لي تمام ، طلعت منو و مشيت لـ حبوبه ، المهم بنفس الروتين عدت الأيام بس الإتغير إني بقيت أرد علي أي زول يغلط علي ، زمان ما كنت برد على زول حتى لمن كانت ناديه تضربني و تنبذني ما كنت ببكي و ما كنت برد عليها و أساساً ما كنت بشتغل بيها ، بس هسي الوضع اختلف ، بقيت حساسه شديد و أي كلمه بتنقال لي بتضايقني و بتبكيني ، أخلاقي بقت ضيقه بعصب من أتفه الأسباب و ما برضى زول يرفع صوتو علي ، حبوبه مستوره كانت مقدره ظرفي و عارفه المرحله الأنا فيها و كيف هي صعبه علي و على أي بت في عمري عشان كدا ما كانت بتلومني بس كانت بتحاول توعيني ، يوم ناديه كـ عادتها بقت تجوط فيني ولا إترددت طوالي رفعت صوتي عليها و بقيت أتجادل معاها قدامهم كلهم لدرجة إنو وليد استغرب فيني و لمن مشيت غرفتي جا لاحقني و قال لي ليه تتكلمي بالطريقه دي مع الأكبر منك ، ليه ترفعي صوتك على أمي و و و و بقى يشاكل فيني ، هو ذاتو أديتو حقو و رفعت صوتي عليهو لمن سكت و طلع من الغرفه ...
من هنا بدا التغيير و أعصابي بقت تلفانه يمكن الإنسانه الوحيده البتعامل معاها كويس هي حبوبه مستوره ، الفتره ديك انا يادوب دخلت في الـ 14 سنه ، يوم كنت فوق في غرفة حبوبه قاعده براي و زهجانه ، قلت أحسن انزل تحت بدل الملل دا ، أول ما جيت نازله سمعت ناديه بتقول لـ وليد أخيراً حـ تفرحني بيك يا ولدي والله ما قادره أصدق ، ربنا يهنيكم و يسعدكم ، قال ليها آمين يا رب ، قالت ليهو الغريبه اني أمبارح كنت بتكلم مع ناهد بس ما جابت لي سيره و ما قالت لي إنك اتفقت مع بتها هنادي و قررتوا تتخطبوا! !
قال ليها أمها ذاتها ما كانت عارفه ، بعد ما حلينا مشاكلنا و اتفاهمنا اخدنا فتره و بعدها قررنا نخطي الخطوه دي ، قالت ليهو و دا الصح أصلاً إنت و هنادي من نفس الطبقه و مناسبين لبعض ، قال ليها خلاص يا أمي استعجلي لي في الموضوع دا ، قالت ليهو من عيوني يا حبيب أمك ، بعدين حـ أجمع الباقين و نتكلم في الموضوع و نحدد يوم عشان نمشي ليهم ، حبوبه كانت قاعده معاهم ، قالت ليهم بت الناس دي عارفه انو وليد معرس؟
ناديه قالت ليها ما دا كان سبب المشكله الحصلت بيناتهم و بعدين دي أصلاً ما بتتسمى عروس و Yes البت عارفه و عشان هي واعيه و أهلها واعين اتفهموا الحصل و وافقوا يدونا بتهم ، حبوبه مستوره عاينت لـ وليد و قالت ليهو البت المسكينه دي ذنبها شنو؟
قال ليها هي ما عندها ذنب و انا ما عندي ذنب و بعدين زواجي انا و هنادي حـ يفرق معاها في شنو؟ يا حبوبه دي طفله ساي و ما ظنيت حاجه زي دي تفرق معاها أو تأثر عليها و بعدين انا ما مقصر منها و أي حاجه عايزاها بتلقاها قدامها و إن شاء الله ما بقصر منها ، صح انا عرستها بس ما عرستها من فراغ في سبب خلاني أعرسها و لو ما كدا ما كان في شي بجمعنا ، دا كلو ما بمنعني اعرس الإنسانه الكنت مخطط أعرسها من زمان صح؟
قالت ليهو غيتو ما عارفه اقول ليك شنو! قال ليها ماف حاجه بتتقال ، أنا هنادي دي من زمان عايزها و كلكم عارفين الحاجه دي! ، ناديه قالت ليهم و بعدين البت الإسمها دهبه ولا دهبايه دي ذاتها ما من مستوانا لحدي الآن نحنا خجلانين نطلعها قدام الناس ، خلي شكلها إسمها ذاتو بخجل! نحنا أسره معروفه و كل الناس خاته عيونها علينا فـ لازم زوجة ولدنا تكون جميله و مثقفه و من أسره معروفه عشان ذاتنا نقدر نطلعها للمجتمع....
بعد ما سمعت كلامهم دا رجعت غرفتي و إنفقعت بالبكى ، بكيت كدا لمن صدعت ، انا ما مبكيني كلام أمو عني أنا المبكيني إنو عايز يعرس و بالبساطه دي كأنو ما خاتيني في حساباتو! طيب اهتمامو بي و خوفو علي و الحاجات الكان بيعملها لي ديك كلها كانت شنو؟
معقوله كان بتعامل معاي كدا لأنو شفقان علي؟ أو يمكن لأنو كان شايفني طفله ساي عشان كدا بتعامل معاي زي الأطفال ، طيب أنا اعمل شنو في نفسي بعد ما علقتها فيهو؟ اعمل شنو أنا لـ لساني الما عندو سيره غير ولييد ولييد! اعمل شنو أنا لـ عقلي الما بفكر في حاجه غيرو! ! اعمل شنو أنا عشان أريح قلبي من الوجع دا؟ 💔
من اليوم داك و أنا اتغيرت أكتر ، أخلاقي بقت أضيق من خرم الإبره و بقيت قاعده على الهبشه بس ، و وليد دا بقيت ما بمشي ليهو خالص بس بكون مراقباهو من بعيد ، لسه بنتظرو لحد ما يرجع من شغلو بس ما بستقبلو زي زمان و بمسك يدو ، يعني فجأه كدا عملت حواجز بيناتنا رغم إني ما عايزا شي غير وجودو جنبي! تغيري المفاجئ دا خلاهو يجيني أكتر من مره و يسألني ، كنت برد عليهو بضيق و زهج ، يوم جطت شديد معاهو و عليت صوتي عليهو و سمعتو كلام ما كويس ، ما رد لي الإساءه طلع و خلاني ، قلت أكيد بعد اليوم دا ما حيتكلم معاي تاني و أساساً ما حـ يعاين لي 💔بس المحير انو بعد يومين رجع و بقى يتعامل معاي بلطافه مضاعفه حتى لمن أتزهج فيهو! !
يوم حبوبه مستوره كانت بتتكلم معاي عن موضوع وليد و هنادي و بتحاول تواسيني ، ما عارفاها فهمت كيف إنو بالجد وليد زا فارق معاي و الحـ يعملو حـ يأثر علي ، بس كنت بكذب و بقول ليها يا حبوبه خليهو يعمل البريحو ، هو ما قصر معاي كفايه إنو أنقذني من أهلي و و و ، المهم حاولت اقنعها انو ما فارق معاي، لأنو حتى لو إعترفت ليها ماف شي حـ يتغير ، قالت لي عايزا اقول ليك شنو ، وليد دا يا بتي ولداً هدي و رضي و قلبو طيب و بساعد البعرفو و الما بعرفو ، انا والله زعلت شديد لمن بقيتي تشاكليهو في الفتره الأخيره ، رغم إنو كلامك كان بضايقو بس مع ذلك ما كان بتجادل معاك و من غير ما يعرف السبب كان بعذرك و لسه مصر يسألك و يعرف إنتِ مالك عشان كدا انا اتكلمت معاهو و فهمتو الفتره و المرحله الإنتِ ماره بيها دي ، قلت ليها بصدمه لاااااا يا حبوبه ما كنتِ تقولي ليهو! أودي وشي منو وين تاني؟
قالت لي يا بت هوي دي حاجه عاديه و حتى لو ما حكيتيها لزول حـ تظهر مع الأيام ، ناسيه إنك حـ تصومي رمضان الجاي دا؟ ناسيه انو في تغيرات حتظهر عليك؟
قلت ليها برضو ما كنتِ تكلميهو كان تخليهو لو فهم براهو خلاص و لو ما فهم يكون أحسن ، قالت لي بري احسن شي اني كلمتو عشان ما يكون زعلان الزمن كلو و هو ما فاهم إنتِ مالك....
المهم يوم وليد جاني داخل و جاب لي معاهو تلفون ، فرحت شديد و بقيت أنطط من الفرح ، قلت ليهو بس ما بعرف أستخدمو! ! قال لي ما مشكله أنا بعلمك ، قضينا اسبوع و يومين و هو كل يوم بعلمني حاجه ، فهمت الحاجات المهمه و الأساسيه زي بتصلوا من وين و برسلوا الرسايل كيف ، قال لي حـ اعمل ليك صفحه في الفيس ، و فعلاً عملها لي و رسل طلب صداقه من صفحتي لـ صفحتو ، بقيت 24 ساعه ماسكه التلفون و بلعب بيهو ساي ، يوم حبوبه جات داخله قالت لي خلي النصيب دا و أمشي صلي ، قلت ليها طيب ، مشيت صليت و جيت راجعه و مسكت التلفون ، شويه كدا دخلت الفيس و بقيت أعاين ليهو ساي و ما فهمت ليهو شي لأني ما بعرف اقرا ، بوستات الفيس بالنسبه لي كانت زي الطلاسيم ، فجأه كدا ظهرت لي صورة وليد ، في البدايه إنخلعت بس تاني اتذكرت انو وليد قال لي عادي انو الواحد ينزل صور من هنا و وراني كيف أنشر و وراني كيف اقبل طلبات الصداقه و كيف أحذفها و انا عاد أي زول رسل لي طلب صداقه بقبلو ، في ناس كتار رسلو لي رسايل في الماسنجر بس ما فهمت ليها شي ، عشان ما بعرف أقرا.....
المهم مرت فتره كدا وليد بقى مشغول شديد و معظم وقتو برا البيت و لمن يجي راجع بكون ماسك تلفونو و بتكلم بيهو مره إتصنت عليهو و فهمت إنو بتكلم مع هنادي ، يوم قال ليها اها ابوك لسه ما جا؟ عشان الموضوع دا طال! يعني لو ما غياب أبوك كنا هسي مخطوبين لبعض! ما عارفه قالت ليهو شنو بس قال ليها أهلي كلهم ما عندهم مانع و أمي ليها فتره بتخطط و منتظراني اقول ليها ارح للجماعه ديل بس انا قلت ليها انك منتظره أبوك يرجع من السفر.....المهم يا زوله ما عندي خيار غير الإنتظار ، إنتظرت كتير و باقي شويه 💜
بعد مكالماتو الكتيره دي أنا نفسيتي تعبت و اتأزمت شديد ، في البدايه زعلت منو زعل شديد ، بس تاني قلت ليهو حق ، أصلاً هو عرسني غصب عنو ، و ما قصر مني و شالني في راسو و عيونو بس دا ما معناهو انو حياتو حتقيف عندي ، انا بالنسبه ليهو مزهريه أو إضافه ثانويه أو مجرد وحده مسكينه أهلها استغنوا عنها و هو حن عليها و قرر يعمل فيها حسنه 💔
بقيت بحاول اتجنبو و بشغل نفسي بالتلفون الما قادره أقرا فيهو شي دا ، بعترف إني في الفتره ديك كنت مفتكره إنو التغير الآخير في تصرفاتي مع وليد حـ يلفت نظرو و كـ العاده حـ يخليهو يجيني و يسألني الحاصل شنو بس للأسف ما حصل و دا الزعلني زياده بس في نفس الوقت خلاني أعرف انا شنو و منو ....
"لا يلتقي الرائعون في بداية العمر أبدًا ..
لا يلتقي الرائعون الا بعد رحلة طويلة من التعب.. ولا يحدث الحب الحقيقي الا متاخرًا.. يحدث بين قلبين عاشا في حياة مختلفة وكان مستحيلًا ان يلتقيا.. لهذا لا شيء يصف فرحة كل شخص عثر على نصفه الاخر 💜🥀
يتبع.......
