بقيت منططه عيوني و مخلوعه شديد! بقيت واقفه و ما عارفه اعمل شنو أو اقول شنو ....
دفرتني و دخلت و بقت تعاين في البيت ، إتلفتت علي ، عاينت لي من فوق لتحت و قالت لي بتعملي شنو في بيتي ؟
ما رديت عليها ، قربت علي و رفعت لي أصبعها و قالت لي ما تفتكري إنو عشان غيرتي شكلك و لهجتك و عملتي ليك منظمه معناها وليد حـ يحبك أو يفكر فيك ، ربعت يديني و قلت ليها ايوه صح كلامك هو ما بفكر فيني خالص و ما بحبني عشان كدا أنا موجوده في بيتو 😏
قالت لي دا بيتي و وليد راجلك حتى لو في نقاشات بيناتنا دا ما معناهو اننا بنكره بعض ، متأكده وليد لحدي اللحظه دي بحبني ، كل العالم عارف إنو وليد بحب هنادي و نحنا الإتنين اجمل ثنائي ، قلت ليها طيب هسي موقعك وين يا حبيبة وليد؟ ناسيه إنو طلقك؟
قالت لي ئهه منو القال ليك طلقني؟ يا بت إنتِ بتستهبلي ولا شنو! كنت عارفاك رخيصه و عديمة كرامه لكن ما إتوقعتك تصلي للدرجه دي يعني هو بعد ما طردك من بيتو و عرسني و شاف حياتو معاي جايه تاني و حاشره نفسك في حياتو!؟
قلت ليها كمل حياتو معاك؟ الكانت كلها عباره عن مشاكل و نقاشات ليها أول و ما ليها آخر و بسبب عنادك و لئامتك معاهو خسرتي ولدك!
هنا سكتت و معالم وشها إتغيرت 180 درجه ، بلعت ريقها و قالت لي ما تدخلي في حاجه ما بتخصك ، و شيلي فكرة إني وليد راغب فيك متأكده لو ما البت الما معروف جبتيها من منو دي و لصقتيها فيهو ما كان إتلفت عليك ، قلت ليها هو الجا فتشني ما أنا و بعدين هو غبي ولا ريالتو سايله عشان أول ما اقول ليهو البت دي بتك يحضنها و يسكنا معاهو! يختي في حاجه اسمها الـ DNA بتثبت إنو البت دي بت وليد مع إني ما مضطره أوضح ليك حاجه لكن عشان ما تقعدي تتكلمي فارغ في الموضوع دا ، قالت لي اااا يعني عملتو تحليل DNA؟! يا ربي وليد هو العمل التحليل عشان يتأكد انو هي بتو ولا إنتِ العملتيه عشان تثبتي ليهو انو البت دي بتو؟!! ئهه في الحالتين دا بدل انو وليد كان شاكي انو البت دي ما بتو! معناها ما واثق فيك و متيقن انك ممكن تقلي أدبك مع أي واحد بتلقيهو في الشارع و......من دون ما أتردد كشطها كف هي كمان ما سكتت و رفعت يدها علي و ضربتني بكل قوتها ، رفيف لمن شافتنا بنضارب كدا قعدت تبكي بأعلى حس ، قلت لـ هنادي اطلعي من البيت دا ، قالت لي ما بتطرديني إنتِ يا حيوانه ، رفعت أصبعي و قلت ليها احسن تحترمي نفسك ، قالت لي و اذا ما إحترمتها عايزا تعملي شنو؟ قربت مني و قالت لي ها عايزا تعملي شنو! مسكت أصبعي و لوتو لي و فـ بقيت اتصارع معاها و ألزها مني ، الحقد و الحسد كانو ظاهرين في وشها ، أصلاً من جات جات زولة مشاكل بس فشفاشها مهرود ، في النهايه جريت اصبعي منها و لزيتها بكل قوتي لدرجة إنها قربت تقع ، في اللحظه دي رفيف بقت تصرخ بصوت عالي و هنادي بقت شغاله ليها قفلي يا زفته احسن ما أجي و أحشر ليك الشنطه دي جوه خشمك في كسر من الثانيه مشت عليها و مسكتها من خشمها و قالت ليها قفلي بلاعتك دي ، قلبي وجعني شديد و النار ولعت جواي ، جريتها من يدها و ضربتها كف و عدلتها بالتاني ، روحي حرقتني شديد و اتمنيت في اللحظه دي اقطعها حته حته و أرمي لحمتها للكلاب ، دموعها جرت و عيونها بقت زي الشرار ، قالت لي تضربيني انا يا تافهه يا صايعه يا بتاعة الرجال! خمشتني من شعري و بقت تحاول تخربش وشي بيدها التانيه و انا بصارع فيها و أصواتنا بقت عاليه بالإضافه لـصوت رفيف الصارخ ، على الجوطه و الكواريك دي حامد و معاهو اتنين من الحرس جوا داخلين و بقوا بحاولوا يفكونا من بعض و هي حالفه ما تفك شعري ، في الآخر قدروا عليها و فكوها مني ، بقت تقول ليهم فكوني يا حيوانات و أساساً البيت دا بيتي و انتوا كنتوا شغالين تحتي ولا ناسين يا كلاب يا مقطعين! بقت تنبذ و تقول كلام فارغ لينا كلنا ، حامد طلع تلفونو و اتصل على وليد و كلمو ، غطيت شعري و شلت رفيف و بقيت احاول اسكتها ، هي كانت بتبكي من جهه و الكلبه ديك بتنبح من جهه تانيه و البيت بقى عباره عن كواريك بس و انا اتوترت و دمي دا حسيتو بغلي ، شعري كان واجعني شديد و وشي كمان من شدة الكف الضربتني ليهو بس كفوفي ليها كانت أقوى و مع ذلك لسه روحي محرقاني و عايزه بس أمسكها و ازعمطها ، لمن لسه كانت بتتكلم عني فارغ و بتنبذ ، نزلت رفيف بس و ملصت الشبشب الكنت لابساهو و في لمح البصر وقفت قدامها و وقعت ليك فيها خبيت و هي بقت تضرب عشوائي و بتحاول تغطي وشها لأني كنت مركزه عليهو أكتر شي ، يشهد الله لو ما الحرس مسكوها مني كنت بهدلتها بهدلة السواد بس العملتو فيها برد قلبي شويه ، الحرس جروها و طلعوها برا و هي لسه بتجوط و دموعها دي جاريه عشره عشره و بتضرب في الحرس بشنطتها ، سامعاها من برا بتصرخ فيهم ساي ، حضنت رفيف علي و مشيت بيها فوق و قفلت الغرفه علينا و بقيت أحاول أسكت فيها بس هي حالفه ما تسكت ، بتخاف شديد من العنف و المواقف الزي دي ، بالجد يعني أول مره تشوف اتنين بتضاربوا و بتشاكلوا قدامها هي متعوده على الدلال و اللطافه من كل الناس الحوليها ،، بعد مسافه كدا هديت شويه و نامت ، لمن نزلت تحت سامعه صوت وليد و هنادي و هم بجوطوا بأعلى صوت ، قلت يعني الكريه دي لسه ما مشت!!......يشهد الله جاط معاها شديد و شاكلها لمن بقى في رجفه في نبرة صوتها و بقت تبكي بحس عديل ، حسيتو شويه كدا و حـ يضربها ،، طلع كل قهرو و ضيقو و وجعو منها فيها ،، كأنو كان منتظر الفرصه دي و جاتو عشان يطلع الجواهو كلو ،، ما خلى ليها جمله و كلام قاسي ما قالو ليها ،، في الآخر طردتها و قال ليها خلقتك دي ما عايز أشوفها تاني و إلا اقسم بالله ما يحصل خير و قال للحرس تاني ما تدخلوا زول ساي إلا تسألوني حتى لو أمي ذاتا ما تدخلوها إلا ترجعوا لي ،، لمن خلاص حسيتو خلص كلامو و حـ يجي داخل طوالي جريت غرفتي دخلتها و قفلت الباب ، مشيت عاينت للمرآيه و بقيت أرتب في شكلي و امسح حبات الدموع الفي رموشي و علامة الكف الكانت على وشي ، ما عايزاهو يفتكر إني ضعيفه و إنو هنادي قدرت علي ، إتنفست بعمق و حاولت أكون طبيعيه لمن سمعت صوت رجليهو على السلم و هو جاي على الغرفه ، مشيت على السرير و شلت تلفوني و عملت نفسي مشغوله بيهو ، أول ما فتح الباب جاي علي بلهفه و قال لي الحصل شنو؟ هنادي عملت ليك شنو؟
قلت ليهو ولا شي! قال لي كيف يعني ولا شي يعني حامد كان بكذب علي! و بعدين انا إتلاقيت معاها جنب الباب و منظرها و الحاله الكانت فيها ما بتقول إنو ما حصل شي، قلت ليهو كـ عادتها جاطت و قالت البيت بيتها و شنو ما بعرف و الحرس طلعها بره ، قال لي كذابه ، خت يدو على خدي و قال لي رفعت يدها عليك!؟ قلت ليهو لا ما حصل ، قال لي بتداري ليها ليه انا ما قادر أفهمك! هددتك يعني عشان ما تحكي لي حاجه!؟ قلت ليهو لا ما هددتني و زي ما قلت ليك جاطت و مشت ، طبعاً بتكلم معاهو من دون ما أعاين ليهو لأني حاسه نفسي حـ أبكي ، خت يدو على حنكي و لفتني عليهو و قال لي حسابها معاي و بوعدك حاجه زي دي تاني ما تتكرر ،، لمن ضماني عليهو ما قدرت أمسك نفسي دموعي طوالي نزلت و بديت أحكي ليهو الحصل و كيف هنادي إتعاملت معاي و مع رفيف ،، اتضايق شديد و قال لي انا بتصرف معاها و البيت دا ما حـ تعتبو تاني و آسف شديد على الحصل ،، مسح دموعي و قال لي خلاص وقفي بكى ما بستحمل دموعك دي ،، بعد هديت شويه قلت ليهو بالمناسبه أنا كمان ما قصرت منها و ضربتها و بهدلتها و لو ما الحرس كانت طلعت جنازه من هنا ،، إبتسم و قال لي آي شفت منظرها و هي جنب الباب صراحة في البدايه إفتكرت انو الحرس هم العملوا فيها كدا بس تاني قلت لا لا هم ما بمدوا يدهم على زول لكن إنتِ ما خطرتي على بالي خالص 😂😂
قلت ليهو بالله! يعني اذا الحرس ما هم الضربوها حيكون منو مثلاً! أكيد ما ضربت نفسها و بهدلتها البهدله دي كلها يا غبي ،، ضحك و قال لي طلعتي شرسه يا حلوتي ،، طبعاً لمن قال لي يا حلوتي جسمي تلج و بلعت لساني و التوتر إتملكني و ما قدرت أعاين ليهو ،، قال لي الله الله على الخجل ،، طوالي قمت و بإستعجال قلت ليهو حـ اجهز الأكل و قمت طالعه بسرعه من دون ما أتلفت عليهو ، وصلت المطبخ و أنا قلبي شغال دق دق بس في نفس الوقت كنت مبسوطه و جاني إحساس حلو شديد زي النسيم البارد و زي ريحة الدعاش ،، جهزت ليهو الأكل بكل حب لحدي ما خلصت كنت بتبسم ساي و حاسه المطبخ دا ما سايعني من شدة الفرح ،، جهزت الفطور و وديتو الصاله و مشيت فوق عشان أنادي وليد و أصحي رفيف لأنها نامت من دون ما تاكل شي ،، لمن مشيت فوق لقيتو ما موجود في الغرفه ،، صحيت رفيف و شلتها مشيت بيها لـ غرفتو لقيتو يادوب طالع من الحمام و لابس لبس البيت ،، قلت ليهو ما راجع شغلك تاني ولا شنو؟!!
قال لي لا ما راجع و جا شال مني رفيف و قعد يبوس فيها ،، قال ليها المره الشريره ديك رفعت صوتها عليك! بكت لي بتي!؟ طبعاً لمن قال عن هنادي شريره قعدت أضحك و اقول في سري فعلاً شريره ،، لمن لقاني بضحك بقى يعاين لي و هو مبتسم ،، اتوترت شديد و وقفت ضحك ،، قلت ليهو احم الفطور جاهز ،، قال لي تعالي طيب لأني جعان شديد ، نزلنا تحت و بدينا نفطر و طبعاً رفيف عامله لينا شغب و جو حلو ، لكن لمن بقت تمسك الأكل و ترميهو على الأرض نهرتها و قلت ليها عيب تعملي كدا فطوالي كشرت وشها و كانت حتبكي لو ما وليد طلع ليها تلفونو ،، قال لي حاولي ما ترفعي صوتك عليها لأنها ما بتتحمل الصوت عالي و زعلها و بكاها كعب شديد و ما بترضى بسهوله ، قلت ليهو بس برضو لازم تتعلم الصح من الغلط! قال لي هي هسي صغيره و ما حتفهم ليك الصح من الغلط و كلامك دا كلو ما حيدخل عقلها ،، قلت ليهو متأكده دلعك ليها دا حـ يخرب طبعها ،، قال لي خليها تدلع ساي عندي كم رفيف أنا! قلت ليهو كويس بعدين حتشوف نتيجة دلعك دا ،، ضحك و قال لي هسي إنتِ زعلانه كدا مالك!؟.....بالمناسبه يعني ما عندي مانع أدلع رفيف و أم رفيف ،، قلت ليهو بري بتخرب طبعي ،، ضحك و قال لي جادي أنا ، قلت ليهو انا كمان جاده طبعي حـ يخرب لو دلعتني صدقني حـ تتعذب شديد معاي و تضطر تعمل لي العايزاه في أي وقت و في أي مكان ،، قال لي حبابو العذاب البجي منك 🙈💜 ،، خجلني خجل ،، شلت الصينيه و انا بحاول أخفي بسمتي و هو قاصد يوترني ،، قال لي خلي الصينيه برفعها أنا ،، قلت ليهو لا حـ أشيلها معاي و اعمل قهوه بالمره ،، وقف على حيلو و مسك مني الصينيه و قال لي خليك مع فراشتنا دي ،، قعدت جنب رفيف و انتبهت إنو شعرها منكشف ،، فـ بقيت أسرحو ليها و هي تتململ ساي نهاي ما بتحب زول يلمس ليها شعرها ، مرات بضطر أسرحو ليها و هي نايمه ،، بعد شويه كدا وليد عمل القهوه و عصير فراوله لـ رفيف و جا بيهم ، أثناء ما نحنا بنشرب كدا قال لي أهلك ما إتصلوا عليك؟
لمن جاب لي سيرتهم قربت أشرق ،، قلت ليهو قصدك منو تحديداً ؟ لأنو الباقين ما عندهم تلفونات!
قال لي لا أمك معاها و أنا أديتها رقمك أمبارح ، قلت ليهو دقيقه دقيقه هي جابت ليها تلفون من وين؟ و كيف أبوي خلاهو معاها؟
قال لي قبل يومين كدا في كذا نفر من طاقم التصوير التابع للقناة مشوا على الإتجاهات ديك فـ وصيت الصادق زميل يمشي ليهم هناك و يوصل ليها التلفون دا ، قلت ليهو و أبوي طيب عمل شنو؟
قال لي ما عارف والله عشان كدا سألتك اذا اتصلت عليك ولا لا ،، قلت ليهو ما أظن نقدر نتواصل مع بعض أبوي ما حـ يخليهم ،، سكت ساي و بعد مسافه قال لي بتتحل إن شاء الله ، بعد شويه كدا فقدت تلفوني ، لمن مشيت فوق لـ غرفتي لقيتو على السرير لمن شفتو لقيت 3 مكالمات من وجدان ، قلت أكيد عايزا تقول لي جدول الإمتحانات نزل لأنو قالوا حينزل خلال الأسبوع دا و هي عايزا تتجرس و تبكي لي من هسي ،، رجعت ليها و ردت علي بعد مكالمتين ،، أول ما فتحت الخط قلت ليها عايزا تقولي لي الجدول نزل صح؟
قالت لي و هي بتبكي طارق عمل حادث و هسي هو بين الحياة و الموت 💔
كلامها خلعني شديد و صدمني ،، حسيت نفسي بحلم و ما قدرت أصدق السمعتو! قلت ليها شنو؟ كيف عمل حادث! متين الكلام دا و هسي هو في مستشفى شنو؟
قالت لي نحنا في مستشفى البراحه ،، قلت ليها هسي حـ أجي عليكم ،، نزلت مخلوعه و قلت لـ وليد طارق عمل حادث و هسي هو في مستشفى البراحه ، قال لي لا ياخ متين الكلام دا؟
قلت ليهو بإستتعجال ما عارفه حاجه انا المهم عايزا أمشي ليهم ،، قال لي طيب جهزي نفسك مسافة اشوف العربيه ، جريت بسرعه اتناولت لي طرحه و عبايه و جيتو مارقه و طول الطريق بتصل على وجدان بس ما ردت علي إلا لمن قربنا للمستشفى ،، وصفت لي هم وين في أي طابق و أي غرفه ،، لمن وصلناهم لقينا مها و وجدان بس و حالة مها كانت حاله ،، لمن وصلناهم قلت ليها وجدان طارق كيف هسي و الدكاتره قالوا ليكم شنو؟
مها طوالي جات علي و لمن وصلتني قالت لي الجابك شنو؟ ....قلت ليها مها كيف يعني الجابني شنو؟
قالت لي جايه تشوفيه اذا مات ولا لسه؟
قلت ليها مها ما.....قاطعتني و قالت لي بنبره عاليه دا كلو بسببك إنتِ الله ينتقم منك ، ياخ شنو الخلانا ندخلك حياتنا و نشاركك تفاصيلنا ،، وجودك ما ضاف لينا حاجه بس غيابك خسر طارق كل حاجه ، قلت ليها ما فاهمه بتقولي في شنو إنتِ؟
وليد قال ليها مقدر االحاله الإنتِ فيها بس دا ما معناهو تتهمي الناس بحاجه هم ما ليهم دخل فيها!
قالت ليهو هي عارفاني بقول في شنو! بس خلي في بالك إنو لو حصلت حاجه لأخوي أنا ما حـ أرحمك ،، سكت و قلت أحسن ما أتناقش معاها بس ما كنت فاهمه أنا علاقتي شنو بـ الحادث الحصل مع طارق !
بعد مسافه الدكتور جا طالع ،، مها سألتو عن طارق ، طلع نظارتو و قال لينا ما أكذب عليكم ، المريض حالتو صعبه شديد ، فـ خليكم جاهزين و إتوقعوا أي حاجه ،، هنا مها إنهارت تماماً و بقت تبكي بأعلى حس ، وجدان بقت تبكي معاها و تحاول تقومها من الأرض بس ما قدرت عليها ، انا ذاتي دموعي غلبتني ، طارق ما زول هين و وقفتو و مواقفو معاي ما شويه ، هو ما مجرد شخص عابر و ما مجرد معرفه ، هو شخص أنا من دون ما أتردد بقدر أصنفو من أسرتي ،، لمن جيت عشان أواسيها و رفعها من الأرض مع وجدان ، لزتني و قالت لي إنتِ بالذات ما تقربي مني أصلاً الحصل كلو بسببك إنتِ ، قلت ليها مها الموضوع ما صعب عليك براك والله كلنا حالتنا واحده ، قالت لي ما تكذبي و تقعدي تمثلي لي إنك مهتمه و انو طارق فارق معاك ،، بسببك هو حالياً بين الحياة و الموت ،، قلت ليها فهميني بس أنا علاقتي شنو بالحادث الحصل مع طارق! قالت لي ئهه علاقتك شنو؟ ما إنتِ الدمرتي نفسيتو و خربتي حياتو و إستغليتينا كلنا و في الآخر استغنيتي عننا ، انا خلينا على جنب ، طارق دا حصل حوجك حاجه؟ حصل اتعاملك معاك بطريقه ما كويسه أو حاول يستغلك رغم انو كان بقدر يعمل كدا خاصة إنك معانا في البيت؟
قصر منك؟
قصر من بتك؟ ياخ دا لمن إنتِ كنتِ نافره من بتك و ما متقبلاها ،، كان بحممها ليك و بغير ليها و بأكلها و بشربها و لمن تبكي بطلع يلف بيها بره لحدي ما ينومها و لمن تمرض بساهر معاها و إنتِ ولا على بالك ، ياخ العملو ليك و ليها أهلك ما عملوا ليك في النهايه تجازيهو كدا؟
قلت ليها بصوت باكي مها أنا ما ..... قالت لي و هي بتصرخ إنتِ ما شنو؟
ما كنتِ شايفه إهتمامو بيك ولا ما كنتِ فاهمه تلميحاتو ولا ما كنتِ عارفاهو بحبك ؟
في اللحظه دي أنا و وليد في نفس اللحظه عيونا وقعت في بعض ....🎬
يتبع.......
