قال لي طيب ، جا قعد في الكرسي المقاصدني و قال لي الحصل انو بعد ما وليد عرس هنادي و جابوها بيتهم خلال فتره وجيزه حصلت مشاكل كتيره بينها و بين أمو ، يعني في كل مره يجي فيها من الشغل يلقى أصواتهم واصله السما و كل وحده تجي تشكي ليهو براها ، شويه شويه النقاشات كترت مع بين هنادي و أم وليد لا بينهم كلهم ، بالحرف بيتهم بقى ما بنقعد لـ وليد و كل يوم جوطه و نقاش بين أمو أو أخواتو مع هنادي ، مرات كان ما برجع البيت بتصل علي و بنمشي شارع النيل و كلو عشان يرتاح من وجع الراس ، لمن المشاكل دي زادت عن حدها وليد أشترى بيت و سكن فيهو هنادي يلي هو البيت الساكنه فيهو حالياً دا ، المهم بعد فتره ياهو أخت وليد عملت عملتها و ماف زول غير ناس بيتها عرف بالحاصل أنا ذاتي ما كنت عارف إلا لمن الفضيحه دي إتسربت و وصلت للإعلام و إنتشرت في قروبات الفيس ، السرب القصه دي ما زول غريب هنادي هي العملت كدا و نشرتها للناس ، وليد لمن عرف جاط معاها شديد و حصلت خلافات بيناتهم و دا بقى الطبيعي حقهم ، العيشه معاها بقت لا تطاق بالنسبه ليهو ، بس كان مطول بالو عشان لو فكر يوم يطلقها حـ يطلقها بـ قناعه و فعلاً اليوم دا جا بسبب نقاشات هنادي مع أهلو و معاهو هو ، قال لي انا عايز أطلقها و بكرا بديها ورقتها بس لمن إكتشف إنها حامل إتراجع عن قرارو دا ، طبعاً الحمل خلى هنادي تتمادى أكتر و تسمع وليد فارغه عشان عرفت إنو الطفل دا نقطة ضعفو و عشانو ما حـ يطلقها أو يناقشها كتير في فترة الحمل دي ، المهم لحدي ما ولدت المشاكل بينها و بين أم وليد كترت يعني لو ما اتلاقوا وجهاً لوجه و اتشاكلوا بنزلوا بوستات في الفيس و كل وحده بتحكي قصه مختلفه و تخلي الناس تردم التانيه و الموضوع دا كان مضايق وليد شديد ، المهم هنادي ولدت و جابت ولد نسى وليد المشاكل و الخلافات البينو و بين هنادي ، الطفل دا بقى شغلو الشاغل و نفسو الطالع و النازل ، فرح بيهو فرحه ما عاديه بس للأسف الفرحه دي ما دامت ، هنادي كترت مشاكلها معاهو شديد و بقت لمن وليد يشاكلها تشيل الطفل و تمشي بيهو لأهلها و مرات كتيره بتمشي تبيت بيهو مع صحباتها من دون علم وليد للسبب دا يوم من الأيام مد يدو عليها و دا الخلاها تعاند أكتر يعني سنتين و هم الإتنين كل يوم بحصل بيناتهم نقاش ، هنادي أكبر مشاكلها كانت إنتِ ، سبب جوطتها دي كلها إنو وليد كان لسه بفتش عليك و ما فقد الأمل و دا الخلاها تتجنن و تكرهو حياتو ، عملت ليهو مشاكل كتيره خلاص و إستفزتو شديد ، فـي يوم من الأيام ، جهزت نفسها و ولدها و جات طالعه ، وليد قال ليها ماشه وين؟ ما ردت عليهو لمن تاني كرر ليها السؤال قالت ليهو ماشه لصحبتي ، قال ليها صحبتك دي منو و ساكنه وين؟ قالت ليهو ما ضروري تعرف ، قال ليها ما حـ تسوقي الولد معاك و جا شالو منها ، بقت تكورك و تقول ليهو دا ولدي و انا حره اسوقو معاي وين ما عايزا و و و ، المهم بعد يومين خلتو يمشي الشغلو و طوالي ساقت ولدها و مشت بيهو بيت صحبتها مع إنو منبها و صراحه صحباتها كلهم فاكات و ما نافعات عشان كدا وليد ما عايز ولدو يكون وسط صحباتها ديل ، المهم مشيت بيهو بيت صحبتها بعدها قرروا يطلعوا قريب كدا و خلت محمد ولدها مع أولاد صحبتها و مشت ، المهم يا زوله الشافع دا وقع براهو و لا الشفع المعاهو لزوهو ما معروف جا واقع من الطابق التاني ، هي لمن عرفت جات و جرت بيهو للمستشفى لحدي اللحظه ديك ما فكرت تتصل على وليد و تكلمو والله إلا صحبتها إتصلت عليهو و كلمتو ، في اليوم داك كنت انا معاهو والله قفل الخط و قام جاري و انا وراهو ما فاهم شي و بسأل فيهو ساي ، ركبت معاهو بس و لمن وصلنا المستشفى اسئلتي كترت و هو كأنو ما سامعني لونو كان مخطوف و مشيهو كان سريع ، لمن وصلنا بقى يجوط في هنادي و يقول ليها مشيتي بيهو وين انتي و و و ، أول ما الدكتور طلع وليد خلاها و مشى عليهو و سألو عنو ، والله يا دهبايه ما حـ اقدر اوصف ليك حالة وليد في اللحظه القال ليهو فيها الدكتور انو الطفل دا وصلنا متوفي ، والله قعد على الأرض و بقى يبكي زي الشفع ، بعدها دخل جوه لـ ولدو و أنا وراهو ، لمن شفت وش محمد غمضت عيوني و موعي غلبتني ، ملامح وشو كلها إختفت لأنو جا واقع على وشو في السراميك ، ملابسو كلها كانت مليانه دموع و الوش دا تلف على الآخر.......أيمن سكت مسافه كان بحاول فيها يمنع دموعو تنزل ، اتنفس كويس و قال لي في الآخر طلقها بس لحدي يوم الليله موتة محمد مؤثره على وليد ، لحدي يوم الليله وليد لو قعد معاي بقول لي هسي محمد كان حيكون عمرو 4 سنوات و يقعد يحكي لي عنو و هو عيونو مليانه دموع ، لحدي اللحظه دي و بعد السنتين ديل لسه وليد بشوف محمد في كل طفل ، وليد جواهو جرح عميق عمرو ما حـ يتداوى لأنو محمد ما حيرجع تاني ، محمد هو الحاجه الوحيده الكانت ماليه دنيتو و سببو نساهو الهموم بس وفاتو كسرتو بالجد والله ، بقت عليهو وجعتين موت حبوبه مستوره أولاً و بعدها بسنه موت محمد 💔
لمن أيمن خلص كلامو أنا كملت البكى كلو ، ضميت رفيف علي و بكيت كويس ، أيمن قال لي اذا إنتِ الما بتعرفي محمد و ما شفتيه مره اول ما سمعتي بقصتو بكيتي فـ كيف حال الشافع محمد و اتكلم معاهو و شالو و العندو معاهو ذكريات سنتين!؟ وليد يا دهبايه دخل في حاله ما علم بيها إلا رب العالمين انا صحبو القريب شديد في الفتره ديك قفل مني و إختفى قصة شهر كدا بس ما إتحسن بالعكس حالتو ساءت و للحظه دي وليد بحاول يتأقلم مع الحياة البدون محمد دي بس أنا متأكد إنو روحو بتنزف دم ، رفيف يا دهبايه هي الوحيده البتقدر تخفف عنو وجعو دا عشان كدا ما تبعديها عنو ، ما تزيديها عليهو يا دهبايه و بعدين وليد دا بحبك حتى لو ما قال ليك كدا أنا متأكد من الحاجه دي لأني صحبو و يمكن هو ما عرف نفسو متعلق بيك زي ما إنتِ متعلقه بيهو إلا في السنوات الإختفيتي فيها دي ، و زي ما متأكد من حب وليد ليك كمان متأكد انك بتحبيهو اضعاف مضاعفه فليه تخربي حياتك و تطلبي منو الطلاق؟ ليه عايزا تنفصلي عنو و في بت في النص بيناتكم! انتِ و رفيف الوحيدات الحـ تقدرو تطيبو جرح وليد دا و هو رغم انو عارف نفسو ما بقدر بدونك و انو بحبك مع ذلك لمن شافك ما عايزاهو و دايماً بتبكي لأنو جابك بالغصب و قعدك معاهو اتخلى عن سعادتو و قدم سعادتك لأنو بالجد اقتنع انك ما محتاجاهو و ما عندك حاجه ليهو ، دي ما تفسيري دا كلام وليد ذاتو عشان ما تستغربي و تعايني لي بنظرات الإستنكار دي ، معقوله إنتِ ما شايفه الحب الفي عيونو ليك ولا اهتمامو بيك دا كلو ما لاحظتي ليهو! معقوله إحساس وليد ما واصلك؟ ما تبقي أنانيه و تحرميهو من وجودكم ، ايوه صح إنتِ زعلانه من وليد بسبب الحصل قبل 4 سنوات بس لو فكرتي كويس حتكتشفي انو وليد أبداً ما غلط معاك ، و لو شك فيك ليهو الحق أولاً لأنك كنت صغيره و عادي أي زول يغشك و يخليك تتواصلي معاهو و ثانياً لأنو كل الأدله كانت تضدك ، حالياً كلنا بقينا عارفين إنو أم وليد و اخواتو هم المسؤولين عن الحصل و لحدي اللحظه وليد ماخد منهم موقف بس ما مقاطعهم لأنو في الأول و الآخر ديل أمو و أخواتو و ما ليهم غيرو خاصة بعد ما أبوهم طلق أمهم......وليد بستاهل دا كلو يا دهبايه ؟ بستاهلو ؟
لحدي سؤالو دا أنا كنت ببكي ساي و ما قادره أسكت نفسي ، فجأه كدا وليد ظهر و بقى ماشي علينا و هو مستغرب عشان شافني ببكي ، لمن شفتو مسحت دموعي طوالي و أول ما وصلنا قال لينا في شنو؟ بتبكي ليه؟
ما قدرت أرد عليهو حسيت حلقي مقفول ، لمن ما رديت عليهو قال لـ أيمن في شنو! مالا بتبكي؟
أيمن عمل ليهو حركه كدا نظام بقول ليك بعدين ، وليد قال لي خلينا نمشي بعد دا ، شال رفيف و مشى بيها قدامي و أنا وراهو و بفكر في الكلام القالو لي أيمن ، وليد إتلفت علي و قال لي مالك إنتِ في شنو؟ قلت ليهو لا لا ماف حاجه ، المهم ركبنا و رجعنا البيت ، بعد ما إتغدينا وليد قال إنو طالع بس ما وراني ماشي وين ، المهم بعد صليت العشا شلت رفيف و مشيت بيها غرفتنا و بقيت أحاول أنومها بس هي حلفت ما تنوم ، شويه كدا تلفوني رن ، لمن شفت المتصل لقيتو طارق لأنو مسجلاهو من اليوم الشلت رقمو من وجدان ، فتحت الخط و قلت ليهو طارق كيفك ، قال لي كويس الحمدلله لكن عرفتي إنو دا أنا كيف؟
قلت ليهو رقمك مسجل عندي ، شلتو من وجدان ، قال لي طيب ليه ما بتتصلي!؟ هسي انا أول ما شلت رقمك الجديد من وجدان إتصلت عليك ، لمن سكت قال لي المهم إنتوا كيف عاملين و رفيف كيف؟
قلت ليهو كويسه الحمدلله طمني على مها كويسه هي؟ قال لي ايوه كويسه دقيقه أديك تتكلمي معاها ، قلت ليهو بإستعجال لا لا ما......فجأه جاني صوت مها و هي بتقول لي كيفك؟
قلت ليها نحنا كويسين الحمدلله إنتِ اخبارك شنو و كيف عامله؟ قالت لي كلو تمام و و و المهم اتكلمنا عادي مع إني طول مدة مكالمتها معاها بتذكر في الكلام القالتو لي المره الفاتت و الفكره الهي خاتاها عني ، في الآخر طارق شال منها التلفون و قال لي رفيف حبيبتي نامت؟
قلت ليهو صاحيه ما سامع صوتها! قال لي طيب أديني اتكلم معاها ، أديت رفيف التلفون و قلت ليها يلا اتكلمي ، لمن سمعت صوت طارق بقت تتكلم معاهو عادي و بتضحك ، إتكلم معاها فتره طويله بعدها قفلنا منو ، نزلت رفيف على الأرض و طلعت أشوف وليد جا ولا لسه ، لقيتو لسه ما جا قلت يا ربي مشى وين؟
رجعت غرفتي و شلت تلفونو و أنا متردده اتصل ولا لا اتصل ولا لا ،، في الآخر سمعت صوت قلبي و اتصلت عليهو لمن فتح الخط سكت ساي و ما عرفت اقول شنو ، قال لي آلو سامعاني؟ في شنو؟ رفيف كويسه؟
قلت ليهو ايوه كويسه.....سكت و بقى منتظرني أوريهو اتصلت ليه ، قلت ليهو اتصلت لأنو رفيف كانت بتسأل عنك و حاولت أنومها بس ما نامت لي ، قال لي ما مشكله هسي انا ماشي على البيت ، قلت ليهو طيب و قفلت الخط و طوالي جريت المطبخ و جهزت ليهو العشا ،، قعدت في الصاله و بقيت منتظراهو ، بعد مسافه لمن سمعت صوت الباب ما مشيت فتحتو طوالي عشان ما يقول إني منتظراهو ، لمن ضرب الباب كتير مشيت فتحت ليهو الباب ، دخل و قال لي كنتِ فوق ولا شنو لأني من قبيل بضرب في الباب ، قلت ليهو اي كنت فوق ، قال لي رفيف هناك صح!؟طوالي مشى ليها بعدلو ،، دخلت المطبخه خلط عصير و خليتو جاهز ، لمن مشيت فوق لقيتو شايل رفيف و بطبطب عليها و بقول ليها بعد دا نومي يا حبيبة بابا ، دخلت و قلت ليهو نامت؟ قال لي قربت ، المهم بقى واقف بيها كدا و بطبطب عليها لحدي ما نامت ، رقدها و باسها مسافه و طلع ، قلت في نفسي لسه بارد معاي و سافهني و بعترف إنو حركاتو دي بتوجعني ، غطيت رفيف كويس و طلعت مشيت ليهو في غرفتو لقيتو دخل الحمام ، نزلت تحت و جهزت الأكل و العصير و شلتهم وديتهم ليهو في غرفتو ، دخلت براحه براحه ختيتهم ليهو و أول ما جيت طالعه هو فتح باب الحمام ، لمن إتلفت عليهو لقيتو مره يعاين لي و مره للصينيه الجبتها ليهو ، اتوترت و أحاسيسي جاطت خاصة بعد نظرتو دي ، قلت ليهو و انا بتمتم اعمل اعمل ليك قهوه؟
قال لي لا ما عايز ، شال الصينيه و جا بيها علي قال لي أنا اتغديت برا ما كان تتعبي نفسك ، بالجد كلامو زعلني و الزعل كان واضح في وشي يعني انا لي مده واقفه في المطبخ عشان أجهز ليهو الأكل يجي يقول لي إتغديت برا!؟
مسكت منو الصينيه بخاطر مكسور بس أول ما إتحركت من جنبو مسك يدي و لفتني عليهو ، شال مني الصينيه و دخلني معاهو جوه ، قعدني و قعد ، شال لقمه و وجهها لخشمي قلت ليهو بزعل ما عايزا ، قال لي ماف حاجه إسمها ما عايزا و دخلها لي في خشمي بقى مره ياكل هو و مره يأكلني و أنا ما إعترضت لأنو قلبي عايزا كدا بعيداً عن عقلي ، لمن خلصنا ، شال الصينيه وداها المطبخ و غسلها ، لمن جا راجع لقاني لسه قاعده ، قعد جنبي و قال لي أحكي لي قبيل كنتِ بتبكي ليه؟
قلت ليهو ماف شي و أساساً ما كنت ببكي ، قال لي يا زوله أنا شفتك ، طوالي عيوني إتملت دموع لمن ختيت عيوني في عيونو و شفت كمية الحزن الجواهو ، تاني دموعي إنهمرت زي الشلال ، طوالي ضماني عليهو و بقى يقول لي هسس كفايه بكى ، ضمتو دي بكتني زياده ، مسكت فيهو شديد و بكيت كويس و هو بطبطب علي و بمشي يدو على شعري ، حركتو دي إحتوتني شديد و ملت الفراغ الجواي بالجد كنت محتاجه ضمتو دي و ريحة عطرو المميزه و دافيه ، بعد مسافه قال لي أنسي الكلام القالو ليك أيمن انتِ قلبك رهيف ، طوالي فهمت انو ايمن حكى ليهو انا بكيت لشنو ، قلت ليهو بس إنت ما كويس و انا عارفه الحاجه دي ، قال لي وجودك حـ يبقيني كويس أنا متأكده ، قلت ليهو ما كان تعرسها بسببها انت إنكسرت قال لي عادي ما إنتِ ذاتك كسرتيني ، زحيت منو و قلت ليهو أنا ما أذيتك زيها و ما تنسى انك أذيتني أكتر ، قال لي فعلاً و إنتِ جيتي عشان تنتقمي مني ، قلت ليهو إنت الجيتني ما أنا ، قال لي امممم يعني انتِ مستغنيه عني صح؟
قال كدا و هو بعاين لي جوه عيوني لمن وترني ، نزلت عيوني و بقيت بسمع في دقات قلبي الشغاله دق دق دق ، قال لي هااا جوابي مستغنيه عني صح؟ عشان لو ايوه أديك حريتك و أطلقك ، كلامو زعلني و غاظني شديد ، بزهج ضربتو على صدرو و قمت منو زعلانه و مشيت غرفتي و انا بقول عايز ليهو سبب بس عشان يطلقني بيهو ، رقدت جنب رفيف و انا واصله الحد من الزعل ، بعد شويه كدا لمن حسيت انو الباب حـ يتفتح غمضت عيوني طوالي و بقيت سامعه صوت رجلين وليد و هي ماشه علي لحدي ما وقف جنب راسي ، نزل راسو و باسني على خدي و همس لي : أكيد ما نمتي بالسرعه دي يا زعيييله ، إنتِ هينه لا رخيصه عشان استغني عنك.....طبعاً كلامو وترني و عيوني بقوا يتحرك عشان انا صاحيه ما نمت ، قال لي أفتحي عيونك ياخ! ....أبيت افتحهم ، تاني باسني و قال لي عارفك لسه متعلقه فيني زي زمان و لسه بتحبيني و شايف الحاجه دي في عيونك بس كيف تخلي المكابره! .....برضو ما رديت و عملت فيها نايمه و هو عارفني ما نايمه ، قال لي بالمناسبه انا بحبك لا بعشقك ، أنا ولهان بيك و ما قادر اتخيل حياتي من دونك و ما فتحت ليك موضوع الطلاق دا إلا عشان أنبهك انو انتِ ما حتقدري بدوني و أنا كذلك ، نحنا الإتنين بنكمل بعض و بتنا حبيبتنا مزينه دنيتنا تاني عايزين شنو؟!
لمن قالت كدا حركت عيوني كترت و قلبي عمل شحححح قربت افتح عيوني و اتنفس بحركه سريعه ، ضحك و قال لي منظرك حلو و إنتِ في الحاله دي ، ايوه مثلي كويس يا أستاذه ، المهم تصبحي على خير يا كل الخير ،، لمن إتأكدت انو طلع فتحت عيوني و قعدت في نص السرير و ختيت يدي على قلبي عسى و لعل يهدى شويه من الربكه و الرجفه الهو فيها ، إبتسمت إبتسامه عريضه كدا و قلت في نفسي وليد قال بحبني! إعترف لي و أخيراً ، إنبسطت شديد و حسيت الدنيا دي إتلونت و بقت جميله ، رقدت على السرير و حضنت المخده ، جاني احساس انو عايزا أمشي ليهو هسي و ما أفارقو ،، من الفرحه بقيت اتبسم ساي و اتقلب على السرير ، يمكن ساعه و انا لسه صاحيه و بتبسم و بسرح بعيد بخيالي ، بعد مسافه شلت رفيف و مشيت بيها على غرفتو ، طبعاً موضوع موتة ولد وليد حزني شديد رغم غيرتي و كرهي لـ هنادي لأنو وليد عرسها، خسارتو لولدو الأول خلتني اشيل رفيف و أمشي ارقدها في حضنو و ما اكذب قربت أنوم جنبو و اخت رفيف في نصنا لكن قلت الصباح اقول ليهو شنو!؟
ختيت رفيف بس و أول ما إتحركت من جنبو مسك يدي و قال لي يا ريت أم رفيف ذاتها تنوم معانا ، قلت ليهو لا لا انا بنوم في غرفتي ، جراني عليهو و قال لي لا حتنومي معانا هنا ، قلت ليهو لا ما.....قاطعني و قال لي عشاني ممكن؟
سكته و مشيت طرف السرير التاني و رقدت هو طوالي جاب رفيف علي و قرب مني و بقى شبه ضامينا الإتنين ، ديك كانت أكتر ليله حسيت فيها نفسي مرتاحه و ما عندي أي هم ، اول ليله انو فيها هادية البال و مطمنه و الأهم حاسه بكمية من الحب و الحنيه تذوب الجليد ، إتمنيت الساعات دي تقيف في الليله ديك ، إتمنيت الصباح ما يجي و نفضل كدا ، حرفياً فضيت عقلي و مسحت أي حاجه و نمت مرتاحه جنب وليد و رفيف حبيبتنا و فراشتنا 💕🥀
تاني يوم لمن صحيت ، لقيت رفيف قاعده قدامي و موجها تلفون وليد علي و هو شغال يضحك ساي ، قمت طوالي و خطفت منها التلفون لمن إكتشفت إنهم بصوروا فيني بالخلقه الصحيت بيها من النوم ، وليد جا علي و قال لي إياك تحذفي الصور ، قلت ليهو دي صور ذله لازم تتحذف ، استعجل و جا علي و قبل ما أحذف حاجه خطف مني التلفون ، بقيت أحاول اشيلو منو لكن هو برفع يدو فوق عشان انا ما أحصل التلفون و بضحك علي ، قلت ليهو وليد ما بهاظر معاك أنا خليني أحذف الصور دي ، قعد يضحك بس و يقول لي لو لحقتي التلفون أحذفيها طوالي ، قلت ليهو ما تتبايخ ياخ احذف الصور دي 😭😭
فجأه كدا رفيف قعدت تضحك ضحكه تخليك تلقائياً تتبسم انا و وليد في نفس اللحظه إتلفتنا عليها و بقينا نضحك معاها و في نفس اللحظه مشينا عليها الإتنين و بقينا نبوس فيها ، وليد قال ليها إنتِ شدة ما حلوه و لذيذه حاسي نفسي عايز آكلك ، شاغلها شويه كدا و قال ليها يا الله من الشغل الحـ يخليني أكون بعيد عنك بس اعمل شنو!
دخل استحمى و انا مشيت اعمل ليهو الشاي بسرعه عشان هو طالع ، لمن جبتو و جيت راجعه لقيتو بصلي ، ختيت ليهو الشاي و دخلت اتسوكت و سوكت معاي رفيف و اتوضيت و جيت صليت بعدو و بقيت أعاين ليهو و هو بشرب و بدي رفيف و بدعي في سرعي إنو ربنا يحفظهم لي ، بعد ما شرب لبس و رش شويه من عطرو المميز الأنا بحبو ، قال لي اليوم عندك جامعه؟ قلت ليهو لا ما عندي ، قال لي تمام حـ اطلع أنا و لو احتجتي حاجه اتصلي علي ماشي؟ ....إبتسمت و هزيت ليهو راسي ، المهم بعد ما طلع بساعتين كدا سمعت صوت الباب ، قلت معقوله يكون دا هو جا بالسرعه دي؟
مشيت على الباب و انا بقول أكيد وليد دا نسى ليهو حاجه ، أول ما وصلت الباب و فتحتو بقيت منططه عيوني و مخلوعه شديد! بقيت واقفه و ما عارفه اعمل شنو أو اقول شنو ....
يتبع........
