" ယနေ့မှစ၍ နှစ်ပေါင်းတစ်ရာတိုင်ပါစေ "
" Cheers!!!! "
လက်ထဲမှ အရက်ခွက်ကို ကိုယ်စီကိုင်မြှောက်ရင်း ဂုဏ်ပြုအားပေးသံတို့က မင်္ဂလာခန်းမတစ်ခုလုံးကို လွှမ်းခြုံလို့သွားသည်။
" အနမ်းပေးပါ!! အနမ်းပေးပါ!! အနမ်းပေးပါ!! "
နီထွေးသော နှုတ်ခမ်းနှစ်စုံသည် စက္ကန့်ပိုင်းမျှ ပူးပေါင်းသွားပြီးနောက် ဩဘာပေးသံတို့ ပို၍ညံသွားသည်။ သတို့သား၏ ဝံ့ကြွားသောအပြုံးနှင့် သတို့သမီး၏ ရှက်သွေးလွှမ်းသော ပန်းနုရောင် ပါးပြင်ကလေးသည် ဖျတ်ခနဲ လက်သွားသော ကင်မရာထဲတွင်အမိအရ။
" သတို့သား မင် ယွန်း ဂျယ် နှင့် သတို့သမီး ဟာ အွန် ဂျောင်း တို့၏ ထိမ်းမြားလက်ထပ်ပွဲ "
ဆေးတက္ကသိုလ် အဝန်းအဝိုင်းတွင် နာမည်ကြီးလှသော စီနီယာမမနှင့် ဂျူနီယာမောင်လေးတို့ အချစ်ဇာတ်လမ်းလေး၏ ဇာတ်ပေါင်းခန်း။
ပညာသင်ချိန်က ပညာလောဘအလွန်ကြီးသော အလုပ်လုပ်ချိန်တွင်လည်း အလုပ်လောဘကို မလျှော့နိုင်ကြသော ယွန်းဂျယ်နှင့် သူ့မမအွန်ဂျောင်းတို့သည် ဆယ်စုနှစ်မကတော့သော ချစ်သူသက်တမ်းကိုသာ ထိန်းသိမ်းရင်း ကျေနပ်ပျော်ရွှင်ခဲ့ကြသူများဖြစ်ကြသည်။ ထို့ကြောင့် သူတို့နှစ်ဦး၏ ဇာတ်ပေါင်းခန်းဖြစ်သော ဒီနေ့ကို မျှော်လင့်နေကြသူတွေတော်တော်များကြပြီး ကိုယ်တိုင်ကိုယ်ကျ လာရောက်ဂုဏ်ပြုပေးသူတွေလည်းများလှပါသည်။
သတို့သား၏ မိဘနှင့် သတို့သမီး၏ မိဘဟူ၍ နှစ်ဘက်ခွဲကာ မထိုင်ကြသော သူနာပြုဆရာမလေးနှင့် အန်တီမီနာသည် တစ်ယောက်လက်ကို တစ်ယောက်ဆုပ်ကိုင်ကာ သားနှင့်သမီးအတွက် ဝမ်းသာပီတိဖြစ်နေကြသည်။ ငယ်ငယ်ရွယ်ရွယ်နှင့် မုဆိုးမဘဝကို ရောက်ခဲ့ကြရတဲ့သူတို့က အိမ်နီးချင်းတွေအားလုံးထဲတွင် ပို၍ရင်းနှီးမှုရှိခဲ့ကြပြီး အခုလို သားနှင့်သမီးကြောင့် ခမည်းခမက်ဆက်ဆံရေးကို ပိုင်ဆိုင်ရသောအခါတွင်လည်း အတိုင်းထက်အလွန်ဖြစ်ခဲ့ကြရပါသည်။
အားလုံးဝမ်းသာအားရ ဖြစ်နေရပါသော ဒီမင်္ဂလာပွဲကြီးအတွက် ဝမ်းသာလျက်က အနည်းငယ်ဝမ်းနည်းစိတ်ဝင်မိနေသူ တစ်ယောက်လည်းရှိပါသည်။ ထိုသူမှာ တခြားသူမဟုတ်ဘဲ အခုအချိန်ထိ သူ့ကိုကြီး၏ အငယ်လေးဖြစ်နေဆဲ ယွန်းဂီပင်ဖြစ်သည်။
