Dare You Escape?[Completed]

အခန်း(၈)- ရင်းနှီးနေတဲ့ သူစိမ်း

Unicode

ဂေဟာကပြန်လာပြီးထဲက ဝမ်ရိပေါ်ကသူ့အလုပ်တွေနဲ့သူ ရှုပ်ယှက်ခတ်နေပုံရကာ အိမ်မကပ်တာမို့ ရှောင်းကျန့်ကဒီရက်တွေမှာ စိတ်လက်ပေါ့ပါးလို့နေသည်။ ကောင်းတာတစ်ခုလုပ်ပြပြီးရင် အဲ့ထက်အဆမတန်ပိုများတဲ့ ရာဇဝတ်မှုတွေကိုကျူးလွန်တတ်တာက ဝမ်ရိပေါ်ရဲ့ထုံးစံပဲလေ။ အရှေ့ကိုခြေလှမ်းသုံးလှမ်းတိုးခါနီးမှာ အနောက်ကိုခြေတစ်လှမ်းကြိုဆုတ်ပြီး အရှိန်ယူတယ်ဆိုတဲ့ သဘောမျိုးပေါ့။

ဝမ်ရိပေါ်အိမ်မှာရှိတဲ့အချိန်တွေမှာဆို ရှောင်းကျန့်က အခန်းထဲကအခန်းပြင်ကိုထွက်လေ့မရှိတာမို့ ဒီနေ့တော့ခြံထဲမှာလမ်းဆင်းလျှောက်ဖို့စဥ်းစားထားသည်။ ဝမ်ရိပေါ်ကသူ့ကို ဒီအိမ်တော်အတွင်းက နေရာမှန်သမျှကို တံခါးမရှိဓားမရှိသွားလာခွင့်ပိတ်ထားပေမယ့် ခြံအနောက်ဖက်ကဥယျာဥ်ကိုတော့ သူ့ကိုဝင်ခွင့်မပေးပေ။ တစ်နည်းအားဖြင့် ဝမ်အိမ်တော်ရဲ့မြေအောက်ခန်းရှိရာကိုသွားနိူင်တဲ့ တစ်ခုတည်းသောဝင်ပေါက်ရှိရာ နေရာလည်းဖြစ်သည်။

သူဒီအိမ်တော်ကို စရောက်လာခါစက ထွက်ပြေးရင်းနဲ့တစ်ခါရောက်ဖူးပေမယ့် နောက်ပိုင်းတော့ဝမ်ရိပေါ်က အပြင်းအထန်တားမြစ်ပြီး လူစောင့်တွေပါချထားတာမို့ သူဝင်ဖို့ ဘယ်လိုမှအခွင့်မသာခဲ့ပေ။ ဒါကြောင့် ဝမ်ရိပေါ်မရှိတုန်း ဒီနေ့တော့ ခြံအနောက်ဖက်က ဥယျာဥ်ထဲကိုရောက်အောင်သွားဖို့ ဆုံးဖြတ်ထားသည်။

ဝမ်ရိပေါ်မှာတပည့်တွေအများကြီးရှိတဲ့အနက် အချို့က ဝမ်ရိပေါ်နဲ့အတူပါသွားကြတာမို့ အိမ်တော်ထဲမှာ ရှောင်းကျန့်အပြင် အိမ်တော်ထိန်းဦးလေးလီအပြင် အိမ်အကူသုံးလေးယောက်လောက်သာရှိလေသည်။ ပုံမှန်အတိုင်း အောက်ထပ်ကိုဆင်းလာရင်း အိမ်အဝမှာ ဖန်ရှင်းဆိုတဲ့ကောင်လေးကိုတွေ့လိုက်ရတာမို့ ကျစ်ခနဲစုတ်သတ်လိုက်မိသည်။

ဒီကောင်လေးက ဝမ်ရိပေါ်နဲ့အတူပါသွားတာမဟုတ်ဘူးလား။ ဖန်ရှင်းက အခြားလူတွေထက်ပိုစကားများပြီး ပိုစပ်စုတတ်တာမို့ သူကြည့်မရတဲ့လူစားမျိုးထဲမှာပါသည်။ ကံကောင်းတာတစ်ခုက ဖန်ရှင်းအပါအဝင်ဝမ်ရိပေါ်ရဲ့တပည့်အားလုံးက အမြဲတမ်းတစ်သီးတစ်သန့်သာနေတတ်တဲ့သူ့ကို ဝမ်ရိပေါ်နည်းတူကြောက်ကြတာမို့ သူလာတာမြင်တာနဲ့ ခေါင်းကိုသာတွင်တွင်ငုံ့ထားကြလေသည်။