الامر ليس بكثرتهم حولك
وانما بمن ياتيك دون ان تناديه
بمن يربت على كتفك
.....
سديم...
شموسة انطيني الصونده اساعدج ب الغسل
شمس_لا حبيبتي رجعي اني اكمل اغسل واروح للمدرسه اليوم اخر امتحان والله تعبت من هل امتحانات
سديم_يلا راح ترتاحين منا وضع البيت هوسة مو تمام وامتحاناتكم انتي والبنات الله يساعدكم
شمس_اي كلش خايفه على حسين صار يومين ميجاوب
_منو حسين
_اخوي
_ليش مو وياكم يعني شنو وضعه
_خيه يدرس بغداد مو هنا وماعرف شصايره مختفي
_لاتقلقين انشالله خير
رفعت دشداشتي وذبيت الماي البارد على رجليه
الصبح تتخلل الشمس الشبابيك البيت هدوء كلهم نيام اله اني اغفة شوية واكعد الساعه ب السته الصبح غسلت الطرمه ويه شمس ودخلت جوا
وكفت تحضر ريوك شمس امتحانها
ب ثمانيه القلق والتوتر مبين عليها
المفروض اني هسه وياها امتحن بس وين
ياريت اشكي من تعب الدراسة على الاقل احصل عوض تعبي الي حرمني منه ابوي
اخذت القوري من ايدها سويت جاي
_روحي شموسة اني اسوي ريوك روحي بدلي
راحت تهرول اجت مبدله ولازمه الكتاب بيدها تطكطك باصابعيها بخوف
صبيتلها جاي وانطيتها لفه جبن كعدنه سوا ناكل ودخل تميم يحجي مستعجل
_صديقي هنا سوو ريوك
شمس_اريد اروح للامتحان كعد امي لان سديم ماتعرف شنو تسويلكم شنو تردون
سديم_ميخالف اسوي مو سويت توا عادي
شمس_يعني تميم اكو واحد يعزم صديقه على ريوك
تميم _ماغير جاي للبصرة الفجر وصل ترا نايم ب الديوانيه
شمس_جا غير تكللنه جنه نغسل الطرمه اصلا همزين لا دخلنه عليه واحنه ماندري
_اي بيها الخير ست شمس منو ياخذج لو اوصلج
_لا ابوي ياخذني
تميم_راح اكعد امي تسوي ريوك
تجاهل كلامي من كتله اني اسوي ريوك وتجاهل وجودي وكاني مامرغوب بوجودي
طلع وباوعت لشمس باستغراب
_اخوج ماينبلع كلش وبعدين اكو وحده عندها امتحان وتكعد تغسل الطرمه والله الج خلك اني من يصير عندي امتحان اضرب الدنيا بعرض الحايط وادرس
_ولج مخلصه دراسة مراجعتها زين بس ارديد اضيع وقت ماريد افكر ب الامتحان حموت
دقيت راسها على كيف
_خبله انتي خبله صار كم يوم من تمتحنين وتجين تكولين مجاوبة اكيد هسه تجاوبين ليش خايفه ترا هيه فيزيا
_عزاا انوب تكولها بسهولة فيزيا
_هههههه ولج جنت احبها واضوج من الكيميا والله اتمنى هسه اني وياج نمتحن حرامات راحت عليه السنه نفرح بمعدلنه ونجاحنه
_اسكتي سديم بطني ضلت تمغصني سمعي شلون تخبط من ذكرتي المعدل
من كلتلي هيج وهيه تاشر على بطنها غصيت ب الجاي طلع من خشمي كمت ركض اغسل وجهي لان اختنكت
_خرب يومج شمس كومي روحي يلا موفقه
_عود روحي نامي ااااخ لو اني مكانج تحرم عليه كعدت الصبح اني هيج ماعندي شي واكعد والله فلا اكعد اااخ بس ينطي جوز للماعنده سنون
ضحكت عليها واني اكلها
_غيرج يتمنى هذا التعب التعبينه لان الله حيجازيج ب النهاية
_احم بعيدا عن العاطفه بس احسني حموت اليوم مدري ليش
_عابتلج شهل احساس الزفت روحي احسلج اذا اضل يمج شوية اكتلج
_اكلج بعدني جوعانه كومي جيبي بعد خبزه هاي ماكفتنه
_اهوو شمس كافي مو اكلنه هواي كومي انتي
_احترميني اني طالبه سادس انتي كومي
_اي المفروض عندج امتحان وبطنج تمغصج يعني ماتاكلين بس انتي الله يحفظج اكلتي الاخضر واليابس
_كومي سديم الله عليج
عفت الصينيه واضحك عليها وتمددت ب الكاع يمها الجو حار والسيراميك بارد
_اااخ صدك مال نومه خل اروح اكمل نومتي
_اكلج هذا تميم مو وراح يصيح امي اشو ماجت اني ماسوي رويك
_ولا اني كومي جيبي خبزه احسني جعت
_كومي سديم وراي امتحان جيبي خبزه
_والله ابقى جوعانه وماجيب
جرتني من حجابي وهيه تعت بيه
_كومي لججج لا اكل الخدو عليج
جاي نحجي ونمدت خبزه بيناتنه صفنه وحده بوجه الثانيه واحنه نشوف تميم مقدم خبزه عافت حجابي
كمت من مكاني عدلت كعدتي
تميم_شسالفتكم جهال خوما جهال تتعاركون على خبزه والله يالله بعد انتن شلون تزوجن شلون تربن جهال
شمس_شبيك تميم صرتلي مثل امي شلون تزوجن وشلون تزوجن تحسسني حمضنه على كلبك
من حجت هيج كلت راح يجيبها راشدي يطير وجها لان اني متعوده من افتح حلكي ويه ابوي يجيني الراشدي وحتى تميم خلال كم يوم شفت شكد اطباعه صعبه
بس هلمره شفته ضحك وهوا يغمزلها
_يلا شموسة بعد عيني كملي اكلج وسوي ريوك خطيه الولد يطلع بدون رويك
اخذت منه الخبزه وحطتها ب الصينيه كامت وهيه عافسه وجهها لاحظت عيونها تلالي بالدموع اخذت منها الطاوة التريد تطك بيها بيض
_شبيج شمس اني اسوي ريوك فد نمونه عليمن مدمعه
_مامدمعه بس اكيد راح الامي يكلها على ريوك وكلتله روح الشمس طبعا البنكلادشية شمس موجوده يمته ماتريد جوا ايدها ماتكول هذا المطي من الصبح لليل دراسة لا ليلة ليل ولا نهاره نهار ماتكول هاي الايام تحدد مستقبلها الخايفه عليه
طبعا لان اني بنيه اني مو تميم لو حسين حتى تهتم بيه
تقربت عليها مسحت عيونها الي دموع واكفه بطرفهن
جانت تضحك وياي هسه صار تحجي بحسرة وغصه وصوتها يرجف شكد محمله على امها
_ميخالف حبيبي مهما تكون تبقى امج يجوز حاطه المسؤلية عليكم لان تدري بيجن ماتقصرن بشي اكيد لو ماتدري بيجن ماتكل التميم روح الاختك وحتى هوا تعود عليج جاي اشوفه شنو يريد يجي يطلب منج
_بس سديم اني تعبت الى متى يعني
_خل اكلج شي
ضليت احاجيها وهيه كاعده واني احضر الريوك واسوي بيض واكصص طماطه وخيار
_شموسة انتي عايشه وسط خير اهلج ماكو يوم جعتي صح لو مو صح انتي عايشه بين امج وابوج مهما تكون اطباعهم بس انتي وسطهم ومحد يكدر يدوسلج على طرف بوجودهم وسط اخوانج الي همه سندج وجاي اشوف شكد محبتهم الج جبيره جدج وجدتج يحبوج جاي تدرسين وصديقاتج يمج ليش تكولين تعبت ب العكس حمدي الله على هاي النعمه انتي عايشه حياة غيرج يتمنى ربع منها
_ليش انتي ماجنتي هيج
هزيت راسي واني اكلها
_اني عبالج مثلج ارجع الكه الغده جاهز لو الكه بشر منتظرني ب البيت لو الكه واحد يحبني لو الكه اب او ام تسندتي احنه جنه عايشين كلمن بحياته امي بحالها ماتدري علينه وابوي هوا والحايط سوا احنه ربينه نفسنه بنفسنه جانت بنفسنه نلبس لبس حلو
دائما ياشمس لاتتبطرين على شي ترا تخسرينه
هزت راسها وهيه تبوسني من خدي
_ارتاحيت هواي الحجيج
التفت اشوف تميم واكف ب الباب وبيده سويج السيارة شرب كلاص ماي وهوا يكل الشمس
_يلا امشي اوصلج ابوي نايم
_ماشي يلا
_سديم دقايق واجي لاتتاخرين ب الريوك
_اي اصلا خلصته احضره وانت اخذه
طلع وشمس ورا دزلي بوسات ب الهوا ضحكت عليها
ب الفتره الاخيره صرنه اني وياها قريبات جنت دائما اساعدها ب الدراسة وبتنظيف البيت لان كلشي عليها
مرت ابوي شكد حاولت اتجنبها بحيث اذا المكان موجوده بي هيه وابوي اني اختفي منه
بشائر الي دوم الكاها صافنه
تغيرت حيل وذبلت اكثر من قبل
صرت احلم احلام مو حلوة دائما احلم ابوي خاطفني
دائما احلم ابوي يقتل امي ويخنك بيها دوم افز مرعوبه من الكوابيس صرت اتمنى مايجي الليل وانام اغلب الايام انام يم بيبي ونرجس وشمس ب الغرفه
اخذت صينيه حطيت بيها كوبين جاي والخبز والبيض الخصروات والاجبان
ضليت كاعده ب المطبخ انتظر تميم وانطي الريوك
الى ان اجه ابوي
خفت منه ومن ابتسامته
الليل كله مو ب البيت هسه اجه معقولة مرته حتى ماتسئله وين جنت
ردت اطلع من المطبخ وكفني صوته
_سويلي زقنبوت
_تمام
راد ياخذ الصينيه واخذتها منه
_يابه هاي يردها تميم هسه اسويلك
خزرني وهوا يشمر الصينيه من ايدي وضربني راشدي
_بت الكلب تفضلين هل ....عليه
رغم اني محاجيته وماسويت اي تفضيل عليه بس هوا فكر بهيج شي
اباوع للماعين مطشره عافهن وطلع وهوا يصيح
وكفت الغصه بلعومي ودموعي ماريدهن يطيحن
مسحت عيوني والملم ب الكزاز المطشر والاكل سمعت صوت سيارة تميم من الكراج
دخل وصوت السويج وهوا يحطه ع الكاونتر
_شنو صاير ليش هيج مطشرة الاكل
التفت عليه وحجيت بصوت متحجر
_وكعت الصينيه من ايدي هسه اسويلك
_شبيه وجهج احد ضربج
_لا مابيه شي بس انتظرني دقايق واسوي ريوك
اخذ الكزاز من ايدي وهوا يكول بهدوء
_لا روحي نامي اني اسوي
هزيت راسي وطلعت من يمه
افرك بصدري اريد اشتم هوا على القهره الاكلتها طلعت ب الطرمه وجهي احتقن احمر من الخنكه
سمعت صوت بقلق
_بيج شي ترحين للمستشفى
_لالا هسه اتنفس مابيه شي
_عمي وياج مو
هزيت راسي بلا غسلت وجهي ب المغسلة البرا ودخلت
فتحت قران بيبي واني اقرا بي صارت روحي ب القران كل ماضوج اقرا اهدي الامي مرات
اليوم اربعين امي الي محد ذكرها هنا وخصوصا ابوي كانو دجاجه توفت عادي عنده مو كانو مرته حتى ماذكرها بثواب او فد شي استحيت اكلهم نسوي الها ثواب ضليت كل فتره اقرا قران واهديلها يجوز هذا اعظم ثواب يوصللها
مر وقت واني متمدده يم بيبي وبس صافنه ع السقف
اخذت تلفون بشائر اراسل بي زهراء من اجيت لحد هسه اني ماعرف عنها شي ولا محاجيتها
دزيتلها رسالة من رقم بشائر اكيد ماتعرفه
ضليت لازمه التلفون بيدي وانتظر تجاوب
هاي الفتره كلها ماحاولت احاجيها ادري عندها امتحان وماريد اشغلها
دخلت كوثر على بيبي والدموع تنزل بحرارة
_عمه حسين راح يموت كلبي صار يومين ماكو مختفي
_قابل وين يروح حسين يرجع
_لا مايرجع والله عمه احس حركه بكلبي مجاي تبرد
متاكده بي شي
_بيش مفاولة على الولد
طلعت للهول اشوف القلق بوجوه الكل شمس الي جانت ترجع بس تريد تنام هسه كاعده وتفرك بايدها بتوتر
_شموسة بشري مجاوبة
هزت راسها باي بدون ماتحجي شي
لزمت ايدها حسيت راح تجرح ايدها من كد مافركت بيهن
_شبيج ليش هيج تسوين اندعي الاخوج بدل ماتسوين هيج
طاحت دمعتها ومسحتها
_مامرتاحه سديم مو كتلج من مساع احسني راح اموت بعيدا عن الشقه بس احس روحي جاي تطلع
اخذتها من ايدها غسلت وجها ب السنك
اجت جمان تطمنها واجت بنيه هاي ثاني مره اشوفها اخت تميم الاكبر من تميم متزوجه "حنين"
ساعات البيت نكلب
عمو صاير اعصاب وبس يصيح
ابوي وزوجته مختفين مدري وين بس اطفالهم الثنين حسن وحسين يمنه
دك تلفون تميم جاوبهم وجهه احمر وكوه يحجي
_انا مو كتلك يا باقر عينك على حسين ادري بي مايكعد ويسكت وين مولي منو عاتب عليه يولي للحشد
سكت دقايق والطرف الثاني يحجي
ركع تلفونه حيل ب الكاع كعد لازم راسه ومدنك
يحجي بصوت مكسور
_بوية حسين تارك جامعته السنه وتلكاه هسه ب الجهاد ولحد هسه مالاكين اي اثر اصدقائه الوياه كلهم مختفين من فتره
_هذا باااقررر شلللوووونننن مااااخبرنه
_محلفه حسين مايحجي شي
كوثر كعدت تلطم على وجها وتصيح يوميه واحد بيكم لا جمني لجمه
اخذ سويجه وطلع عيوني بس تترقب شنو جاي يصير
جابتلي بشائر تلفونها زهراء تتصل سديت الخط
مو وقت احجي شي مانكر خوف بداخلي لان حسيت فعلا حيصير شي
بشائر ...
بين الاصوات العاليه
تتصارخ النساء كما لو ان هنالك قتيل فعلا
الدمعات تهدر بحرارة والقلوب تحرق
كما لو ان هنالك مصيبه قد حلت
ادرك تماما في هذه اللحظه يصعب على العقل تصديقها لكنه فعلا قد رحل
صوت والدة الشهيد وهيه تنعى باقسى الكلمات
صوت الشهادة تتعالي في الخارج
وضعو التابوت في المنزل فسقطت والدته عليه حارقه نفسها
سقطت دموعي وانا انظر الى هول ماحدث
سديم....
طلعت اتوضى وصوت الاذان يبث الراحه
طلعت شمس برا وراها جمانه تصيح عليها
من البارحه محد نايم
صح كلمن بغرفته
بس كلمن همه شكل
طلعت عمه كوثر تصرخ
جمدت بمكاني واشوفها فاقده وتلطم على نفسها
شمس دمعه ماطاحت منها بس تهز براسها بلا
استوعبت كلشي صار بهاي اللحظه
كل الي ب البيت يصرخون ويبجون بوجع
قشعر جسمي واني اشوفهن كاعدات وسط الطارمه
صوت كوثر وهيه تصرخ وتشلع بشعرها
_وليدي ما استشهد لا تكولين هيج ما استشهد وليدي هسه يجي يحط راسه بحضني مايحط راسه ب القبر
بلعت ريكي بغصه
اعرف شعورها حاليا اعرف شكد متمنيه هيه بداله اعرف تحس كلشي جاي يصير حلم
امتزجت اصوات الصريخ ويه صوت الاذان الجيران الي اجو يواسون اهل "الشهيد "
دموعي تنزل بغزارة على منظرهن جمان الي مثل الطير المذبوح تبجي بحركه اخذتها بحضني اريدها تهدأ
تهز بيه وتصيح
_مامات سديم مامات لاتكولين هيج والله عايش هسه تشوفين هسه يجي من الباب بطوله يدخل
شلون انطاه كلبه يعوفنه
شوغت كلبي بحجيها
ماعندي كلمه اكولها الها غير لازمتها ماريدها تطلع من الباب
شمس الي بس واكفه وتباوع اي ملامح بوجها ماكو
عفت جمان بين حركتها ورحتلها
حضنتها واني اكلها
_شموسه لاتسوين بروحج هيج اخوج استشهد تقبلي
تهز براسها بلا وتبتسم عافتني وصعدت فوك
رحت وراها واني ارجف
دخلت الغرفتها واخذت تلفونها تخابر على حسين
حجت بصوت صامد
_باعي هسه يجاوب حسين هوا كال بس اخلص امتحانات ارجع وهمه امتحنتو قبلنه اكيد هسه يرجع
_شموسه اخوج استشهد مايرجع بعد
_طلللعييي براااا لاتحجين هييييج اله اكلللل التميممم علييييج برااااا ااااخ ياقهرتي انتم بس تحجون ماتدرون المقابل شيصير بي كتلج حسين يرجع لاتضلين تجفصين
اخذت منها مبايلها اسايرها ب الكلام
نامت وغطت نفسها
_طلعي سديم طفي الضوا ومن يجي حسين كليلي
طلعت مثل ماكالت
بعدني ع الدرج وسمعت الصريخ صار عالي صوت من برا البيت "لبيك ياعراق"
حطيت ايدي على حلكي اكتم شهكاتي واني اشوف امه حاضنه تابوته وماتقبل يشيلونه اشوف تميم راسه على راس امه ويبجي بصوت مثل امه
بيبي المنتهيه وهيه تلطم
ريم الي لازماتها النسوان مفرفحه بيدهن
رجف كل جسمي من هل موقف
دخل جدو منصي راسه
وعمو رافت بس اجتافه تهتز من البجي
رفعو التابوت وتميم لازم امه حيل علمود لاتطلع وياهم
تتوسل بس تحضر دفنته وهوا ماقبل اخر شي بيبي خلتهم ياخذوها طلعنه وراهم واحنه نشوفهم يثبتون التابوت على سيارة عالية
بيبي الودعت حفيدها من بعيد
وهيه تردد
_عرسك ب الجنه وليدي
طلعت جمان تصرخ بعلو صوتها تريد تروح وياهم
لزمتها حيل اريد اسيطر عليها ماكدر
_جمانه حبيبتي تعالي يمي هناك يم شمس امشي
رددت باذني بصوت مبحوح
_سديم راحت روحي مو حسين سديم روحي معلكه بروحه شلون يعوفني هوا كلي بس ارجع اخطبج
كلماتها طحنتني طحن
ماعرف شنو البكلبها لان ماحبيت
ماعرف شنو الشوغه التحسها
رخت بيدي واني اشوفها مغمي عليها
تصويت♡
YOU ARE READING
قلوب بليده
Romanceانا عينيك الثالثه انا نفسك الثاني انا قلبك الذي لا يتوقف فكرك الذي لا يهدأ انا حرب لاتنتهي انا عصف حياتك انا كل عثراتك
